Read Biblija - Pe Baltitko Romani čib (Romanes) 2019 Baltic Romani Bible Ekliesiastos 2 Bible Online

Ekliesiastos 2 - Biblija - Pe Baltitko Romani čib (Romanes) 2019 Baltic Romani Bible bible

Ekliesiastos 2

¹Me phendjom dro péskiro iló: “Jav! Me sprobinava tut radymakire sabnasa, paldavá jav lošalo (viesjolo) pherdés. Ne, ake, davá isyn adiáke-pac' xarnypén.

²Me phendjom pal saben: “Bigodiakiriben!” I pal rádyma sabnasa: “So davá déla?”

³Me rozĥaljovavas péskire ilésa, syr te lošakirav (te usladinav) miré masá moliasa (vinosa), ne, sob (kaj) miro iló te jačél godedyr, i adiáke-pac' te rikiravpe ke dylnypén pe adákicy, kicý trej, sob (kaj) te dykháv, savó lačhipén isyn vaš manušéngire čhavénge te kerén tel bolybén dre saré dyvesá dro léngiro džiibén.

⁴Me kerdjom péske baré butiá, me ĥazdyjom péske kherá, i me začhudjom péske vinagrádniko (drakhin).

⁵Me kerdjom péske unty (sady) i parki, i me začhudjom saré-sortengire fruktytka kaštá (drevy).

⁶Me kerdjom péske sažalki (venderiniá), savéndyr me počhuvava paniésa rošča (veladín), kaj kaštá (drevy) barjona.

⁷Me kindjom péske dynar'jén i dynaricen, i sys mánde dynárja, kon bijándyja dro miro kher. Čačó, mánde adiáke-pac' isys but ĥurty i bakréngire stády; butedýr saréndyr, savé sys dro Jerusalimo angíl mánde.

⁸Me skedyjom adiáke-pac' rup i suvnakái, i drieván vykedyné kučipena (sokroviščy) kral'jendyr i phuvjákire rigéndyr. Mánde sys bagaibnaskire i bagaibnaskirja-dová, so drieván radynela manušéngire čhavén, i saré bašaibnaskire strumiénty.

⁹I me jacjom baró i piribarijom sarén, kon sys angíl mánde dro Jerusalimo. Saró miro godypén adiáke-pac' jaciápe mánca.

¹⁰I saró, sob (kaj) miré jakhá zoralés te prityrdenpe, me na rikirdjom dre rig péstyr: me na dyjompe pale miré ilésa kažnoné radymátyr, pal-dová so miro iló drieván radyndiape miré pharé butiátyr, i davá isyn mirí bažyn saré miré pharé butiátyr.

¹¹Tén'ci me podykhcjom pe saré butiá, so miré vastá kerdé, i pe sarí pharí butý, so me kerdjom pharés, i, čačó, saró isyn xarnypén i, syr te tradespe pal balvál. Na sys kófo tel kham.

¹²I me riskirdjom godý ke davá-pac' godypén, bigodiakiriben i dylnypén: xačy, so manúš javéla králi, saštý te kerél pal kralíste, isyn kakaná? Ci jekh dová, so uže sys kerdó?

¹³I me dykhcjom, so godypén isyn fedýr dylnypnastyr, so dud (svéto) isyn fedýr kalypnástyr (ciamlypnastyr).

¹⁴Godé manušéste jakhá isyn dro léskiro šeró, ne dylynin'ko psiréla dro ciamlypén; ne me adiáke-pac' kokoró ĥalyjom xor, so jekh kónco (jagóro) užakiréla i jekhés, i javirés.

¹⁵Me phendjom dro péskiro iló: “Syr davá kerélape dylynin'konesa, davá adiáke-pac' javéla te kerélpe i mánca, i, sóske tedy me som godó?” Tén'ci me phendjom dro péskiro iló, so saró davá adiáke-pac' isyn xarnypén.

¹⁶Pal-dová so manušá na javéna te ripirén godes pe saré viéki, syr i dylynin'kones; pal-dová so saró uže bistrena dre beršá, so javéna. I syr davá isyn, so godó manúš meréla adiáke-pac', syr i dylynin'ko?

¹⁷I me lyjom zoralés te na dav čol (te na ceninav) džiibén. Pal-dová so butý, so sys kerdy tel kham, pharjakirdia miro iló; pal-dová so saró isyn xarnypén i sýrby te tradespe pal balvál.

¹⁸I me lyjom zoralés te na dav čol saré miré pharé butiake, so me kerdjom pharés tel kham, pal-dová so me ž jačkirava manušéske, kon javéla pal mánde.

¹⁹I kon džinéla, ci jov javéla godó ci dylynin'ko? Ne jov ža javéla te xulainél pe mirí sarí pharí butý, so me kerdjom butý pharés, i dro so me sykadjom péskiro godypén tel kham. Davá isyn adiáke-pac' xarnypén.

²⁰Tén'ci me riskirdjom péskiro iló i lyjom te otphenavpe saré pharé butiátyr, so me kerdjom butý pharés tel kham.

²¹Isyn manúš, kon kerdiá butý pharés godypnasa, džinybnasa i kerdiá, i jov jačkiréla péskiro mištypén manušéske, savó na kerdiá butý pharés pašýl léste. Davá isyn adiáke-pac' xarnypén i bari bibáht.

²²So ž manušéske javéla saré léskire pharé butiátyr i iléskire tugatyr, kiéli jov kerdiá butý pharés tel kham.

²³Pal-dová so saré léskire dyvesá isyn dukhane, i saré léskire butiendyr isyn túga pe iló, až dro rat léskiro iló na otkhinjola. Davá isyn adiáke-pac' xarnypén.

²⁴Nane nisó fedýr vaš manušéske, sob (kaj) jov te xal, i te p'jel, i, sob (kaj) léskiro iló te radynélpe zoralés léskire butiátyr. Davá isyn adiáke-pac', me ĥalyjom, Devléskire vastéstyr.

²⁵Pal-dová so, kon saštý te xal, ci kon saštý te radynélpe butýr bi Léskiro?

²⁶Devél déla godypén, i džinybén, i rádyma odolé manušéske, kon isyn lačhó vaš Léske; ne Jov déla butý i grehitkoné manušéske, te skedel i te čhuvél khetané, sob (kaj) jov moginelas te otdél kodoléske, savó isyn lačhó vaš Devléske. Davá isyn adiáke-pac' xarnypén i, sýrby te tradespe pal balvál.