Read Biblija - Pe Baltitko Romani čib (Romanes) 2019 Baltic Romani Bible Ekliesiastos 3 Bible Online

Ekliesiastos 3 - Biblija - Pe Baltitko Romani čib (Romanes) 2019 Baltic Romani Bible bible

Ekliesiastos 3

¹Vaš saró, so kerélape dro davá svéto (lot), isyn péskiro uliago (pora), i isyn časo (cýro) kažnoné rendoske tel kham;

²i časo te obkošen dová, so isyn počhudo; časo te bijandjon, i časo te merén; te počhuven dre phuv,

³časo te muliakirén, i časo te sastiakiren; časo te phagiren telé, i časo te ĥazdén kher;

⁴časo te tuginen zoralés, i časo te khelen; časo te rovén, i časo te sanpe;

⁵časo te oblen, i časo te obrikirenpe oblyibnastyr; časo te čhurdén krig bará: i časo te ukeden bará;

⁶časo te rodén, i časo te našaven; časo te rakhén, i časo te čhurdén krig;

⁷časo te riskirén, i časo te syven; časo te javén štyl, i časo te rakirén;

⁸časo vaš maribén, i časo vaš ramánjo (miro); časo te sykavén patýv, i časo zoralés te bidykhen.

⁹Savó kófo isyn butiarneske daléstyr, pašýl so jov kerdiá butý pharés.

¹⁰Me dykhcjom namilo pharí butý, so Devél dyjá manušéngire čhavénge te kerén pharés.

¹¹Jov kerdiá saró šukár dro péskiro časo, adiáke-pac' Jov dyjá džinybén pal svéto (lot) dre léngire ile; ne saroiekh manúš naštý te ĥaljol dová keriben, so Devél keréla anglypnástyr ke kónco (ke jagóro).

¹²Me džinóm, so nisó nane fedýr vaš lénge, syr te radynénpe zoralés te kerén lačhipén dro léngiro džiibén;

¹³i adiáke-pac', sob (kaj) manúš te xal, i te p'jel, i te radynélpe zoralés lačhipnastyr saré léskire butiátyr-davá isyn taláno Devléstyr.

¹⁴Me džinóm so, sob (kai) Devél te na kerél, davá javéla pe saré viéki. Nisó naštý te dočhuves ke dová, i nisó naštý te otles daléstyr. Devél džinéla te kerél adiáke, sob (kaj) ame te daras angíl Léste.

¹⁵Davá, so isyn, uže sys ĥarym-ĥará, i dová, so javéla, tež uže sys, i Devél janéla pale dová, so sys.

¹⁶Adiáke-pac' me dykhcjom tel kham: odój, kaj sendytko štéto, odój isys fuipén. I odój, kaj štéto vaš čačipén, odój sys bibáht.

¹⁷Me phendjom dro miro iló: “Devél javéla te sendiakirél čačunó i fujé manušén, pal-dová so odój javéla časo vaš kažno vykedyiben i vaš kažno butý.”

¹⁸Me phendjom dro miro iló: “Adiáke isyn manušéngire čhavénca, so Devél sprobinela len, sob (kaj) jone moginénas te dykhén, so jone isyn sýrby murdalá (žyvotna).

¹⁹Pal-dová so, so kerélape manušéngire čhavénca, adiáke-pac' kerélape murdalénca: jekh dólia: syr jekh meréla, adiáke-pac' javír muljola.

²⁰Saré džána dro jekh štéto: saré isyn prahostyr, i saré risjona dro práho.

²¹Kon džinéla, ci manušéngire-čhavéngiro dúho (fáno) džála upré? I ci murdalengiro dúho (fáno), ci jov džála dre phuv?

²²I me dykhcjom, so nisó nane fedýr, syr manušéske te radynélpe zoralés léskiro butiendyr, pal-dová so davá isyn léskiri dólia, ne kon janéla les te dykhél, so javéla pal léste?