Read Biblija - Pe Baltitko Romani čib (Romanes) 2019 Baltic Romani Bible Ekliesiastos 4 Bible Online

Ekliesiastos 4 - Biblija - Pe Baltitko Romani čib (Romanes) 2019 Baltic Romani Bible bible

Ekliesiastos 4

¹I me risijom i dykhcjom, syr pritasavéna manušén, i davá kerélape tel kham: i dykh! Manušéngire jasva, konés pritasavéna, ne lénde nane nikón te podrikirél léngiro dúho (fáno), ne pe kadalengiri rig, kon pritasavela sys zor, ne lénde nane nikón te podrikirél léngiro dúho (fáno).

²Paldavá me šardjom mulen, savé uže myné, butýr dalendyr, savé isyn džidé.

³Ne, čačes, fedýr, kadalé dujendyr isyn kodová manúš, kon iščo (inké) na sys pe svéto (lot), kon na dykhciá bibahtaly butý, so kerélape tel kham.

⁴I me dykhcjom, so pal kažno pharí butý i kažno rangiri butý, manúš zevlynela javire manušéske. Davá isyn adiáke-pac' xarnypén i sýrby te tradespe pal balvál.

⁵Dylynin'ko isyn beštó, sčhuvi vastá khetané i xála kokoró pes.

⁶Davá isyn fedýr te doreses burnyk (prigoršnia) ramanjosa (mirósa), syr pherdé duj vastá namile pharé butiátyr i tradypnasa pal balvál.

⁷I me risijom i dykhcjom xarnypén tel kham.

⁸Isyn jekhdžinó manúš i léste nijékh nane te javél pašýl léste; léste nane ni pšal, ni čhavó: ne nane kónco (jagóro) léskire pharé butiake i léskire jakhá nane čale barvalypnastyr i phučela jov: “Vaš konéske me keráva butý pharés i otphenava péske lačhipnastyr.” Davá isyn adiáke-pac' xarnypén i butý, so pharjakirela iló.

⁹Dujenge isyn fedýr, syr jekhéske: pal-dová so lénge javéla lačhí mazúri (nagrada) pal léngiri khetaný butý:

¹⁰kóli jekh dujendyr peréla, tedy javír 'gazdela péskire drogoné males. Ne bída javéla odoléske, kon isyn jekhdžinó: kiéli jov peréla, léste nane javír manúš te pod 'gazdel ĥodlel les.

¹¹Adiáke-pac', kóli dujdžiné pasjona khetané, tedy jone tatjona jekh jekhestyr, i syr jekhdžinó moginéla te tatjol?

¹²Ne kóli manúš saštý te pirizorjakiren jekhdžines javirés, tedy dujdžiné saštý te otmarenpe, i triné — thavengiro šelo nasyg i košelape.

¹³Čororó i godó ternó manúš isyn fedýr phurestyr, ne dylynin'ko isyn králi, savés naštý butýr te sykliakires te prirakhelpe.

¹⁴Pal-dová so davá ternó manúš saštý te javél kadasavó, kon gijá javrí bešybnastyr pe kralipén, mek jov i te bijandjol čororó dro péskiro kralipén.

¹⁵Me dykhcjom, syr saré džidé, kon isyn tel kham, sys pal javire manušéste, savó terdijá pe léskiro štéto.

¹⁶Nane kónco (jagóro) manušénge, angíl konéste jov jaciá kralísa, ne odolé, kon javdiá korigedýr (pozžedýr), na javéna zoralés te radynénape léstyr. Pal-dová so saró davá isyn xarnypén i sýrby te tradespe pal balvál.

¹⁷[Dykh kučes pal ĥerój, kiéli tu džása andré dro Devléskiro Kher, i rískir kan butýr te šunés, so rakiréna, syr te des svénta janybená, i dylynin'ka keréna dová-pac': pal-dová so jone na džinéna, so jone keréna bibáht.-r.s.]