Read Biblija - Pe Baltitko Romani čib (Romanes) 2019 Baltic Romani Bible Ekliesiastos 6 Bible Online

Ekliesiastos 6 - Biblija - Pe Baltitko Romani čib (Romanes) 2019 Baltic Romani Bible bible

Ekliesiastos 6

¹Davá isyn bibáht, so me dykhcjom tel kham, i davá isyn sýrby so dyvés maškír manušénde:

²manúš, konéske Devél dyjá adákicy barvalypén, mištypén i patýv, so léske uhtyléla (dósi) saró, sob (kaj) jov te na zakamel; ne Devél na déla zor léske te lel kófo dalé saréstyr, ne čúžo manúš léla kófo péske léstyr: davá isyn xarnypén i bibahtaly dukh.

³Kóli manušéste lathenape šel čhavoré, i jov prodživela baré beršá, so javéna but but dyvesá dro léskiro džiibén, ne kóli léskiro di na javéla čalo lačhipnastyr, ci les garavena nakučes, tedy me phenavas, so muló tyknomas, savó isyn dro dákiro per, isyn fedýr kadasavé manušéstyr;

⁴pal-dová so jov javéla vaš nisó, i jov džála krig dro kalypén (ciamlypén), i léskiro lav isyn čhakirdo ciamlypnasa;

⁵i mek jov na dykhciá kham, i mek jov na džindiá nisó, usajékh léske isyn butýr ramánjo (pakojo), syr kodolé manušéste, konéste sys saró.

⁶Ne mek jov i te dživél duj móly pir tysjonco berš, ne kóli jov na dykhciá lačhipén, tedy so léske daléstyr? Ci na saró džála dro jekh štéto?

⁷Manúš keréla pharí butý vaš péskiro muj, ne léskiro di nijékhvar isyn na čalo.

⁸Pal-dová so saví l'góta (lačhipén) isyn godé manušéste angíl čororé manušéste, i saví l'góta isyn čororé manušéste, kon féni džinéla, syr te lydžál pes pe manušénde?

⁹Isyn fedýr te lel lačhipén doléstyr, so jakhá dykhéna, syr ŭsa te tyrdespe diesa ke vari-so javír. Davá isyn adiáke-pac' xarnypén i sýrby te tradespe pal balvál.

¹⁰Sareske, so kakaná isyn, ĥará angíl sys dynó lav i davá isyn džindló, savó kažno manúš isyn, i so jov naštý te lydžál réndo proti odoléste, kon isyn zoraledýr léstyr.

¹¹Pal-dová so isyn but réndy i lavá, sóstyr isyn butýr xarnypén; savó ž lačhipén isyn manušéske?

¹²I kon džinéla, so dasavo isyn lačhipén vaš manušéske dro léskiro džiibén, dre saré dyvesá léskire džiibnastyr, so prodžála syr zer (tienjo)? I kon saštý te phenél manušéske, so javéla paló léste tel kham?