Read Biblija - Pe Baltitko Romani čib (Romanes) 2019 Baltic Romani Bible Ekliesiastos 7 Bible Online

Ekliesiastos 7 - Biblija - Pe Baltitko Romani čib (Romanes) 2019 Baltic Romani Bible bible

Ekliesiastos 7

¹Lačhó lav isyn fedýr kučoné drabestyr te khosen, i meribnaskiro dyvés isyn fedýr dyveséstyr, kiéli vari-kon bijandjola.

²Davá isyn fedýr te džas dro kher, kaj rovena pal muleste, syr te džas dro kher, kaj svenkinena, pal-dová so davá isyn kónco (jagóro), so užakiréla saré manušén, i džidé manušéske trej davá te prilel ke iló.

³Túga isyn fedýr sabnastyr, pal-dová so, kóli muj isyn smentno (skučno), tedy iló jačélape fedýr.

⁴Godé-manušéskiro iló isyn dro kher, kaj rovena pal muleste, ne dylynin'konengiro iló isyn dro kher, kaj radynénape sabnasa.

⁵Davá isyn fedýr vaš manušéske te šunén, kóli godé manušá sykavéna bang túke, syr te šunés dylynin'konengiri gilý.

⁶Pal-dová so dylynin'konengiro saben isyn fedýr syr phusadytka xrústy, so pharadjona dre jag tel pirí. Davá isyn adiáke-pac' xarnypén.

⁷Čačó, kóli godó manúš pritasavela javire manušés, tedy jov dylnjola, i počastunko (podarko) [myto-ju.o.] xasiakiréla manušéskiro iló.

⁸Kónco (jagóro) isyn fedýr anglypnástyr dro kažno réndo, a manúš, savó zrikirela péskiro dúho (fáno) isyn fedýr kodolestyr, kon isyn phut'kirdo dro dúho (fáno).

⁹Na xoliasov sýges dro tyró iló, pal-dová so dylynin'ko manúš rikiréla xolý dro kolýn.

¹⁰Na rákir: “Syr davá isyn, so vagedyr (ĥaredyr) dyvesá sys fedýr, syr kakaná?” Paldová so davá nane godó phučiben.

¹¹Godypén isyn adiáke-pac' lačhó syr mištypén, i kofitko (poliezno) vaš odolénge, kon dykhéla kham.

¹²I godypén, adiáke-pac' i lové zaterdjona pal manušéste, ne džinybén isyn fedýr dro dová, so godypén déla džiibén odoléske, konéste jov isyn.

¹³Pridykhpe ke dová, so Devél kerdiá: kon saštý te kerél rovno dová priedmieto, so Devél kerdiá bangó.

¹⁴Kiéli tyré dyvesá isyn mište, rádynpe zoralés, ne kiéli dyvesá isyn fuj, tedy obdumin jekh: Devél čhudiá jekh pal javiréste, sob (kaj) dro kónco (jagóro) manúš te na džinél, so javéla pal léste.

¹⁵Me dykhcjom saré dalé načačipena dre miré xarnypnaskire dyvesá: čačunó manúš, kon xasjola péskire čačipnása, i bibahtaló manúš, kon dživéla ĥará (dlenges) péskire bibahtalé rendénca.

¹⁶Na jav čačunó butýr mieratyr; na jav godó butýr mieratyr: vaš so túke te xasiakires pes? Na jav dylynin'ko butýr mieratyr, vaš so túke te meres angíl uliago (pora)?

¹⁷Davá isyn lačhés, sob (kaj) tu te rikirespe ke jekh, i adiáke-pac', sob (kaj) tu te durjakires tyró vast javirestyr: pal-dová so kon daréla Devléstyr, odová javéla te lel kófo dujendyr koterendyr.

¹⁸Godypén zorjakirela godé manušés, i jov isyn baredýr deše foróskire barydyrendyr.

¹⁹I nijékh nane čačuné manušés pe phuv, kon keréla lačhipén i kon na keréla gréhi.

²⁰Adiáke-pac' i na prilé ilésa saré lavá, so manušá phenéna, sob (kaj) tu te na šunés tyré dynarís te košel tut.

²¹Pal-dová so adiáke-pac' i tyró iló but móly džindiá, syr tu adiáke-pac' koscian javirén.

²²Saró davá me sprobindjom pir miro godypén, i me phendjom: “Me javáva godó”, ne davá sys durál mándyr.

²³Saró, sob (kaj) te na javél, isyn durál i drieván xor, kon saštý te uĥaljol davá?

²⁴Me riskirdjom péskiro iló, sob (kaj) te džináv, te rozĥaljovav, i te vyrodav godypén i pričyna, sóske saró adiáke kerélape?

²⁵I te udžinav, saví bibáht lydžála dylnypén, i duredýr bigodypen, i tedy manúš sýrby zdžála godiatyr.

²⁶I me lathjom (lastjom), so džuvlý isyn kirkedyr meribnástyr, savjate iló isyn sýrby felý, ci khudý (siet'), savjate vastá isyn sýrby zandirjá (cépi) pe ĥerá. Ne manúš kon keréla, syr isyn lačhó Devléske, zrakhélape látyr, ne grehítko manúš javéla lynó dre lákire feliá.

²⁷Dykh! Se me lathjom”, — phendiá Sykliakiribnáskiro pal Devléste, — syr me dočhuvava jekh čačipén ke javír, sob (kaj) te uĥaljovav, sóske saró davá kerélape.

²⁸So iščo (inké) miro iló rodéla, ne so me naštý te lathav, davá isyn: maškír baré manušénde me lathjom jekhe muršés, ne me na lathjom ni jekha džuvliá maškír kadalé sarénde.

²⁹Dykh! So me lathjom: Devél sozdyjá manušés devlytkonesa; ne manušá lathné javír i but so pridumindle péske.