Read Biblija - Pe Baltitko Romani čib (Romanes) 2019 Baltic Romani Bible Ekliesiastos 8 Bible Online

Ekliesiastos 8 - Biblija - Pe Baltitko Romani čib (Romanes) 2019 Baltic Romani Bible bible

Ekliesiastos 8

¹Kon isyn godó manúš? I kon džinéla te rosphenel pal saré réndy, syr len trej te kerén? Manušéskiro godypén začhuvela léskiro muj te ziainel, i nakovlo léskiro muj parudjola.

²Me phenáva: “Kande, so králi priphenela te kerés vaš patýv pal tyrí sovláh Devléske.”

³Na jav sýgno te džas krig Léskire jakhéndyr. Na terdjov dre stonka pal bibahtaló réndo, pal-dová so králi keréla dová, so isyn lačhó léske,

⁴pal-dová so kralískiro lav isyn zoraló, i kon saštý te phenél léske: “So tu kerésa?”

⁵Kon rikirélape ke léskiro priphenybén, kodoléske na javéla bibáht i godé-manušéskiro iló rozĥaljola časo (cýro) i drom, syr trej te kerél?

⁶Pal-dová so vaš kažno réndo isyn péskiro časo i drom, syr trej te kerél? Bari bída tasavela manušés;

⁷pal-dová so jov na džinéla, so javéla; kon moginéla te phenél léske, kiéli, i, syr saró davá javéla?

⁸Nijekheste nane zor pe dúho (fáno), sob (kaj) manúš te rikirél zoralés dúho (fáno), i nijekheste nane zor dro dyvés, syr meréna. Naštý nisyr i te otphandespe maribnastyr proti meribén, adiáke-pac' i bibáht na vyrakhela odolén, kon prisyklyne te kerén adiáke.

⁹Saró davá me dykhcjom i riskirdjom péskiro iló ke kažno butý, so kerélape tel kham: isyn časo, kiéli manúš rikiréla zor pe javiréste i dukhavela les.

¹⁰I me adiáke-pac' dykhcjom, syr garavenas fujé manušén, savé javénas i džánas krig adiáke, sýrby jone kerénas pir čačipén, i, kiéli manušá udžanas sventoné štetóstyr i, tedy jone bistrenas pal lénde dro fóro, kaj jone kerdé bibáht. Davá adiáke-pac' isyn xarnypén.

¹¹Syr séndo pe odolénde, kon keréna bibahtalé butiá, nasyges kerélape, adiáke-pac' pal-davá manušéngire-čhavéngiro iló isyn xor zalymo, sob (kaj) te kerél bibáht.

¹²Mek grehítko manúš te kerél bibáht šel móly i te dživél ĥará, ne me džinóm mištés, so javéla lačhés odolénge, kon daréla Devléstyr, kon daréla angíl Léste.

¹³Ne na javéla lačhés fujé manušénge, ci sýrby zer (tienjo) jov na javéla ĥará te dživél, pal-dová so jov na daréla angíl Devléste.

¹⁴Davá isyn xarnypén, so kerélape pe phuv: čačuné manušénca kerélape dová, so trieindia te javél fujé manušénca pir léngiri butý; i isyn fuj manušá, konesa kerélape dová, so treindiá te javél čačuné manušénge pir léngiri butý. Me phendjom, so davá isyn adiáke-pac' xarnypén.

¹⁵I me šardjom, sob (kaj) manušá te sanpe radymása, pal-dová so nisó nane fedýr tel kham syr te xan, te p'jen, i te javén radymakiresa, pal-dová so davá pomoginela léske dre léskiri pharí butý, so Devél dyjá léske tel kham.

¹⁶Kiéli me riskirdjom miro iló te udžinel godypén, i te rozdykhel namilo pharí butý, so kerélape pe phuv: i adiáke-pac' nijékh manúš nane, sob (kaj) te sovél ci dyvesé, ci ratý;

¹⁷tedy me dykhcjom Devléskiri sarí butý, so manúš naštý te ĥaljol sarésa, so kerélape tel kham. Mek manúš i te kerél butý pharés, i te džinél butýr, ne saroiekh jov na ĥaljola sarésa; adiáke-pac', kóli godó manúš duminéla, so jov džinéla davá, ne jov naštý davá te ĥaljol sarésa.