Read Biblija - Pe Baltitko Romani čib (Romanes) 2019 Baltic Romani Bible Ekliesiastos 9 Bible Online

Ekliesiastos 9 - Biblija - Pe Baltitko Romani čib (Romanes) 2019 Baltic Romani Bible bible

Ekliesiastos 9

¹Pal saró davá, me rozdumindjom péskire ilésa, sob (kaj) te rozgaljovav butýr saró davá: čačó, i čačuné, i godé manušá, i léngire butiá isyn dro Devléskiro vast: nijékh manúš na džinéla, ci javéna te sykavén patýv léske, ci javéna te bidykhen les pal davá: saró davá isyn angíl lénde.

²Saró adiáke kerélape sarénca pir jekh drom: jekh taláno vaš čačunenge i vaš fujé manušénge; vaš lačhé, i vaš bibahtalé, žužé i nažužé manušénge. Vaš odoléske, kon janéla svénto dyibén, i vaš odoléske, kon na janéla svénto dyibén: adiáke lačheske, adiáke-pac' i grehitkoné manušéske; adiáke odoléske, kon sovlahala, adiáke-pac' i kodoléske, kon na sovlahala.

³Davá isyn bibáht maškír sarénde, so kerélape tel kham — so jekh taláno (sud'ba) užakiréla sarén: čačó, manušéngire-čhavéngire ile isyn pherdé bibahtiasa, i bigodypen isyn dre léngire ile, paka jone dživéna, a paló (poslie) dová jone džána krig odorík, kaj mulé isyn.

⁴Ne odová, kon isyn maškír džidende, iščo (inké) užakiréla lačhipén angíl, pal-dová so džidó džukel isyn fedýr mulé ščerestyr (lievostyr).

⁵Džidé manušá džinéna, so jone meréna, ne mulé na džinéna nisó, i adiáke-pac' nane lénge butýr mazúri (nagrada), i manušá bistyrde sarésa pal lénde.

⁶Adiáke-pac' i léngiri patýv ke javír manušá, i odová, so jone zoralés bidykhne, i léngiro zevlynypén kakaná xasiné — adiáke-pac' lénge nane butýr i bažyn dro dová, so kerélape tel kham.

⁷Džá i xa péskiro maró radasa, i pi mol radymakire ilésa; pal-dová so Devléske ĥará jačné lačhé tyré butiá.

⁸Mek tyré ídi te javén parné, mek te uhtylel (te javél dósi) olivítko dzet (jeliejo) pe tyró šeró.

⁹Dživ i rádynpe romniása, savjá tu kamésa saré dyvesá dro tyró xarnypnytko džiibén, so Devél dyjá túke tel kham pe saré dyvesá dro tyró xarnypnytko džiibén; pal-dová so dasaví isyn tyrí bažyn dro džiibén i dre butý, so tu kerésa tel kham.

¹⁰Saró, so tyró vast lathéla te kerél, ker davá saré tyré zoralypnastyr, pal-dová so nane ni butý, ni priduminesa nisó, ni džinybén, ni godypén dre maĥila (dre kula), karik tu kedesape te džas.

¹¹Me risijom i dykhcjom, so kerélape tel kham: so prizo vykhelela na odová, kon isyn naj sygedýr, ci maribén na odová, kon isyn naj zoraledýr, ci maró na odová, kon isyn naj godedyr, ci barvalypén na odová, kon isyn naj god'varedyr, ci láska, na odová, kon isyn naj fededýr; ne isyn časo i vakancyja (slučajo) vaš kažnoné manušéske.

¹²Pal-dová so manúš adiáke-pac' na džinéla péskiro časo: jov poperelape syr mačhé dre bibahtaly khudý (siet'), syr čirikliá dre felý, adiáke-pac' i manušéngire čhavé isyn dre feliá dro bibahtaló časo, kiéli jekhátyr bari bída peréla pe lénde.

¹³Ake, adiáke-pac' isyn jekh godypén, so me adiáke-pac' dykhcjom tel kham i so sykadyjá baró vaš mánge:

¹⁴ĥáda, sys jekh forico, kaj isys nábut (kutý) manušá, i baró králi gijá maribnása pe davá forico, i jov obgija trusciál davá forico xaladenca, i jov ĥazdyjá baré vánty te lel davá forico.

¹⁵Ne, ĥaljov, jekh čororó, ne godó manúš lathiape dro forico, i jov vyrakhcia davá forico péskire godypnasa. Ne nijékh manúš na ripirelas kadalé čororé manušores.

¹⁶Tén'ci phendjom me: “Godypén isyn fedýr zoralypnastyr”, ne saroiekh — čororé-manušéngiro godypén isyn na dre patýv i léskire lavá na šunéna.

¹⁷Godé-manušéngire lavá šunéna butýr, so štylés phenenape syr odoleskiri gódla, kon xulainela pe dylynin'konende.

¹⁸Godypén isyn fedýr maribnytkoné sastyrendyr; ne jekh grehítko manúš xasiakiréla but lačhipén.