Read Biblija - Pe Baltitko Romani čib (Romanes) 2019 Baltic Romani Bible Giliengiri Gilý 1 Bible Online

Giliengiri Gilý 1 - Biblija - Pe Baltitko Romani čib (Romanes) 2019 Baltic Romani Bible bible

Giliengiri Gilý 1

¹Gilý giliendyr, saví sčhudia o Solomóno.

²Mek jov te čamudel man péskire ušténca; pal-dová so léskiro piramnipén (kamiben) isyn fedýr, syr mol (vino).

³Pal-dová so, syr kuč drab te khosen déla gudlý sung(aromáto); tyró lav isyn kuč drab te khosen, so čhuvélape angíl, paldavá patyvalé terné džuvliá otdena iló pal túte.

⁴Pritýrde man ke pe, i ame našasa túsa. Králi jandiá man dre péskire-kralitka komory (xaromy), sob (kaj) ame te javas ráda i zoralés te radynaspe; ame javása te ripiras tyró piramnipén (kamiben) butýr, syr mol. Nane dívo, so patyvalé čhaja otdena iló pal túte.

⁵Jerusalimóskire čhajale! Me som c'miano, ne me som šukarni džuvlý, me som syr Kidaroskire šátry, me som syr začhude (zaviesy) Solomonóskire.

⁶Na dykhén adiáke pe mánde, so me som kaljori, pal-dová so khamoro pekcia man. Miré-dákire čhavé xoliasyne pe mánde; jone čhudé man te rakhav vinagradýtko únta [(drakhin)] (sado), ne me na rakhcjom mirí vinagradýtko únta.

⁷Phen tu mánge, konés me kamám, kaj tu čaravesa péskire bakrengiri stády, kaj jone javéna te otkhinjon dro paš dyvés? Sóske mánge trej te čaravav pale tyré drogoné-malengire (drugengire) stády.

⁸Kóli tu na džinesas, naj gožedyr maškír džuvliende, džá pir bakréngire špery (sliady), i čarav péskire buznoren (kozloren) pašýl čhupnar'jengire šátry,

⁹Me priravnindjom (priparudjom) tut, mirí piramníje (kamly), miré naj drogedyr grasniasa dro Faraonóskiro maribnýtko vurdén.

¹⁰Tyré čhama (ščoki) isyn gožedyr mirikliendyr, Tyrí men isyn ĥožakirdy suvnakuné zandiror'jenca.

¹¹Ame kerása túke šukár suvnakuný vierigori (podviazka) rupuvé jakhor'jenca.”

¹²Kiéli králi isyn beštó pal léskiro skamínd, miro nardo déla lačhé-sungakiro khandypen.

¹³Sýrby drógo bužoro mirostyr vaš mánge, miro piramnó (kamlo), kiéli jov isyn paštó ratý pašýl miré kolyna.

¹⁴Miro piramnó vaš mánge isyn sýrby randjori xnatyr (kipierostyr), saví luludjola (cvecinela), dre vinagradýtko únta [(drakhin)] Jengieda (En-Gieda).

¹⁵O, saví gožo-šukár tu san, mirí piramníje, — tyré jakhorja isyn syr golumbicate.

¹⁶O, savó gožo-šukár tu san, miro piráno, savó gudló i amaró čhuibén isyn adiáke-pac' syr vyčhudo zelenyben.

¹⁷Amaré kheréskire strehi isyn syr kiedrytko veš, i amaré-bergakire bel'ki (stropily) isyn syr kiparisoskire kaštá!