Read Biblija - Pe Baltitko Romani čib (Romanes) 2019 Baltic Romani Bible Giliengiri Gilý 2 Bible Online

Giliengiri Gilý 2 - Biblija - Pe Baltitko Romani čib (Romanes) 2019 Baltic Romani Bible bible

Giliengiri Gilý 2

¹Me som Šaronoskiro narcyso, me som lilija maškír doly.

²Syr lilija isyn maškír phusadýtka xrústy, adiáke-pac' isyn mirí piramni maškír patyvalé terné džuvliende.

³Syr phabelyn, saví isyn maškír vešytka kaštá (drevy), adiáke-pac' isyn miro piramnó maškír ternende. Mánge isyn pir iló te bešav dre lákiri zer (tien'), i lákire barjakirdé (plódy) isyn gudlé vaš miro muj.

⁴Jov jandiá man dro kher, savó sys pherdó moliása (vinosa), jov sýrby čhudiá sciago, so léske drógo som me.

⁵Podrikér man te na perav moliása (vinósa), neviakirén man phabénca, pal-dová so me nábut so na meráva piramnipnástyr (kamlypnastyr).

⁶Léskiro zérvo (liévo) vast isyn tel miro šeró, i léskiro čačó (pravo) vast oblela man.

⁷Me zasovlahava tumen, Jerusalimóskire čhajale, gazelienca ci feldakire mirgénca (siernenca), sob (kaj) tumé te na džangaven, te na ĥazdén rat angíl dová, syr javéla lačhó léske.

⁸Ake, miré piramnéskiri zan. Ĥáda, jov džála? Jov piriuhtela pir bérgi? Jov uhtela pir bérgicy.

⁹Miro drúgo (mal) isyn syr gazel', ci syr ternó šynguno (olienjo). Ake, jov isyn terdó pal vánta, Jov dykhéla pirdál feštry, Jov prodykhela pirdál sastruné ratnícy (stavni).

¹⁰Miro piramnó lyjá te rakirél i phendiá mánge: “Uštý, mirí piramníje, mirí šukarni, i jav javrí.

¹¹Dykh ža! Ivant (zima) progijá (nakhtija), bryšýnd pirijaciá i nane butýr:

¹²luludiá sykadjona pe phuv, i čirikliá lyné te bagán, lákiro bagipen šunéla amarí phuv.

¹³Inžyritkone-kaštengire zelena phabá loljona, i vinagradýtko kaštoro luludjola i déla lačhé-sungakiro khandypen. Uštý, mirí piramníje, mirí šukarni, i jav ke me.

¹⁴Mirí golumbica isyn dre skalengire nišy, dre garadé štéty pir sámo krutyma, mánge te dykháv tyró muj, mánge te šunav tyrí zanori, pal-dová so tyrí zan (glos) isyn gudly, tyró mujoro isyn šukár.”

¹⁵Uhtylén lokhnien (lisicen), tykné lokhnor'jen, savé xasiakirena vinagradýtko bar; pal-dová so amaré vinagradýtka barja luludjona.

¹⁶Miro piramnó isyn miro, i me som léskiri. Jov čaravela (léskire-bakrengiri stada) maškír lilii,

¹⁷Angíl, syr dyviesjola, i zerjá (tieni) našéna, risjov, miro pirámnie: jav syr gazel', ci syr ternó šynguno maškír bérgi.