Read Biblija - Pe Baltitko Romani čib (Romanes) 2019 Baltic Romani Bible Giliengiri Gilý 3 Bible Online

Giliengiri Gilý 3 - Biblija - Pe Baltitko Romani čib (Romanes) 2019 Baltic Romani Bible bible

Giliengiri Gilý 3

¹Pe miro čhuibén me rodyjom ratý kodolés, ke savó miro di prityrdela: me rodyjom les, ne me na lathjom (lastjom) les.

²Me uštava fedýr i obprastava fóro, vulícy (gásy) i štéty, kaj manušá kedenape; me javáva te rodav les, ke savó miro di prityrdela; me rodyjom les, ne me na lathjom (lastjom) les.

³Rakhibnaskire (stražy), savé psiréna pir fóro, lathné man — me phucjompe: “Ci dykhné tumé kodolés, ke savó miro di tyrdelape.”

⁴Nábut me gijom krig léndyr, kiéli me lathjom (lastjom) kodolés, ke savó me tyrdavape: me rikirdjom les i me na mekavas les, angíl, syr me lydžáva les dre miré-dákiro kher, i dre lákire kherítka komory (xaromy), kon bijandiá man.

⁵Zasovlahava tumen, Jerusalimóskire čhajale, gazelienca i feldytkone mirgenca (lanienca), sob (kaj) tumé te na džangaven, te na ĥazdén miro iló angíl, syr javéla lačhó léske.”

⁶“Kon adavá isyn, savó uštéla čhučé prahendyr, sýrby baró thuv ĥazdélape, savó isyn thuvliakirdo mirósa i gudlé smolasa, i kažnoné lačhé-sungakire drabenca tylgar'jendyr (kupcendyr).

⁷Dykhén! Ake, isyn Solomonóskire-kralítko čhuibén: bidaripnaskire šovdešá muršá isyn pašýl léste, jone isyn naj zoraledýr dro Izrailjo.

⁸Lénde sarénde isyn kurtála, jone isyn spiecy te marénpe; kažnoné manušéste isyn kurtála pašýl léskiri ĥerój, sob (kaj) te na darén ratý.

⁹Králi Solomóno kerdiá péske trono, so sčhuvelape.

¹⁰Jov kerdiá rupuvé stylbicy dro trono, léskiri phalia te čhuvél kuniá (lokotniki) isyn suvnakástyr, léskiro štéto te bešél isyn purpurostyr; Jerusalimóskire čhaja vykhude andrál davá trono péskire ilésa.

¹¹Džán te dykhén, Sionóskire čhajale, ake, isyn králi Solomóno, dre kralítko stadyk (viánka), saví léskiri daj čhudiá pe šeró, dro dyvés, kiéli jov lyjá sovláh, dro dyvés, kiéli léskiro iló radyndiape.