Read Biblija - Pe Baltitko Romani čib (Romanes) 2019 Baltic Romani Bible Giliengiri Gilý 4 Bible Online

Giliengiri Gilý 4 - Biblija - Pe Baltitko Romani čib (Romanes) 2019 Baltic Romani Bible bible

Giliengiri Gilý 4

¹O, saví šukarni tu san, mirí piramníje, o saví šukarni tu san; syr golumbicate tyré jakhá dykhéna tel krenco čhur (kosa); tyré balá isyn sýrby buznengiri stada, saví džála telé bergátyr Galaadoskirjatyr.

²Tyré dandá isyn dasavé parné syr občhindlé bakriá, savé ziainena, i savé javné moribnastyr, kažno léndyr janéla pir duj blizniatki (dujore), i nijékh nane jalovo (nakhabný) maškír lénde.

³Tyré uštá isyn syr jarko loló thavoro, i tyró muj isyn dasavo šukár. A tyré čhamá (ščoki), so isyn tel krenco čhur, isyn syr kuskicy granatytkone phabendyr.

⁴Tyrí men isyn syr Davidóskiro stýlbo, so kerdó te čhuvén sastyrá maribnýtka: odój ublade bar sastruné ščýty, syr isyn zoralypnaskire-muršeskire ščýty.

⁵Tyré kolyna isyn sýrby duj tyknore-blizniatki date-gazeliate, saví čaravela len maškír lilii.

⁶Angíl dová, syr javéla dyveseskiro ránko, i syr zerja (tieni) našéna krig, me džáva péske pe mirroskiri bérga, i pe gudlé-smolákiri (fimiamoskiri) bérgica.

⁷Saví šukarni tu san, mirí piramníje, i nisaví doš nane dre túte.

⁸Jav mánca Livanostyr, mirí terný, jav mánca Livanostyr; jav sygedýr telé Amanoskire vučipnástyr, Sieniroskire i Jermonoskire vučé šteténdyr, jav xaščéndyr/venténdyr (logovéndyr), kaj ščerá (lievy) dživéna, bergendyr, kaj isyn lieopardy.

⁹Tu zadivakirdian miro iló, mirí phen, mirí terný; tu zadivakirdian miro iló dykhibnasa tyré jakhéndyr, jekhe zandirorjasa tyré mirikliendyr.

¹⁰Syr šukár tyrí láska isyn, mirí phen, mirí terný! I pe kicý fedýr lačhé-sungakiro khandypen saré aromatytkone makhibnendyr.

¹¹Tyré uštendyr, mirí terný, thadéla žužó avgín, avgín i thud isyn tel tyrí čib; i lačhí sung tyré idiendyr isyn sýrby lačhí sung Livanostyr.

¹²Mirí phen, mirí terný, isyn sýrby zaphandly únta (sado), sýrby pitomniko, so isyn pe klydyn, sýrby ĥanýng, so isyn pe čergenorí (piečat').

¹³Jone barjona syr luludiá dre raitko únta, kaj isyn granatytka phabelynia vykedyné phabenca i lačhé-sungakire xnasa i nardoskire randjorjasa.

¹⁴Odój isyn nardo i šafrano, ajero i karica, i saré xrústy gudlé smolasa, mirro i aloe, saré rangire aromatytkone makhibnenca.

¹⁵Fontano (folahár), dre únta džidé-panieskiri ĥanýng, i sygna rekicy Livanostyr.”

¹⁶“Džangadjov, paš-ratiakiri balvál, i jav, paš-dyvesýtko balvál! Phúrde pe mirí únta, sob (kaj) te rozdžanpe lákire aromatýtka sungá. Mek te javél miro piramnó dre léskiri únta (sado) i mek jov te xal gudlé phabá léskire.”