Read Biblija - Pe Baltitko Romani čib (Romanes) 2019 Baltic Romani Bible Giliengiri Gilý 5 Bible Online

Giliengiri Gilý 5 - Biblija - Pe Baltitko Romani čib (Romanes) 2019 Baltic Romani Bible bible

Giliengiri Gilý 5

¹“Me javdjom dre péskiri únta (sado), mirí phen, mirí terný; me skedyjom miro mirro miré pripravenca; me xajom péskiro avginytko soto miré avginesa; me pijom péskiri mol (vino) thudesa.” “Han, míre malóre, p'jen, i p'jen čalés, miré piramne [dróga míre manušále-ju.o.]!”

²“Me som suty, ne miro iló isyn na sutó. Ĥáda, isyn zan, miré piramnéskiri! Jov marela dro vudár: “Otphande mánge, mirí phen, mirí piramnoríje, mirí golumbica, mirí naj fededýr. Pal-dová so miro šeró isyn učhakirdo pahlyniasa (rosasa), miré krenca balá isyn ratitkoné sapanypnasa.

³Me zlyjom miro uribén kustykasa syr me saštý te urjavav pale les? Me mordjom péskire ĥerá, syr me saštý te meliakirav len?

⁴Miro piramnó čhudiá péskiro vast dre vudareskiri ščel'; i miro iló andrál mánde potyrdyjape ke jov.

⁵Me uštyjom te otphandav miré piramneske, i miré vastá sapaniné mirrósa, i miré angušta (pal'cy) jačné kindle mirrosa pe klydynéskiro vastoró.

⁶Me otphandjom miré piramneske; ne miro piramnó dyjape pale, jov gijá krig: miro di košelaspe javrí, kiéli jov rakirdiá, me rodyjom les, ne me na lathjom les; me khardjom les, ne jov na otphendiá mánge.

⁷Rakhibnaskire (stražy), savé obdžana fóro, lathné man; jone pekade man, jone dukhade man; rakhibnaskire pe foritko vánta lyné krig mándyr mirí dlengi cérga [saví rakhelas vánta-r.s.].

⁸Me zasovlahava tumen, Jerusalimóskire čhajale! Kóli tumé lathéna miré piramnes, so tumé phenéna léske? So Me meráva piramnipnástyr!”

⁹Sósa fedýr isyn tyró piramnó (kamlo) javire piramne manušéndyr, Tu, kon san naj šukaredyr maškír džuvliende? Sósa ž fedýr isyn tyró piramnó javire piramne manušéndyr, so tu adiáke zasovlahasa amen?

¹⁰Miro piramnó isyn parnó i lolé-čhamengiro (ščokengiro), jov isyn raj manúš maškír dešé tysjoncy manušénde,

¹¹léskiro šeró isyn sýrby vykedyno suvnakái, léskire krenca balá kuninenape, jone isyn kalé syr korakoste (voronoste).

¹²Léskire jakhá isyn syr golumbicate, so isyn pašýl sygna rekicy, savé isyn syr morde dro thud, savé isyn zor i zoralés bešté.

¹³Léskire čhama isyn syr bétki (griady), kaj pripravy barjona, syr vučé betki gudlé-sungákire čar'jenca, léskire uštá isyn syr lilii, savéndyr thadéla thaduno mirro.

¹⁴Léskire vastá isyn syr suvnakuné desté, so isyn počhude xrizolitenca; léskiro per isyn ziaindlone slonoskire kokalostyr, savó isyn piričhudo sapfirenca.

¹⁵Léskire ĥerá isyn syr stýlby mramorostyr, so čhudé pe fundámiento vykedyné suvnakástyr; léskire-moskiri mina isyn sýrby Livanoskiro baripén, naj kučedyr, syr kiedry.

¹⁶Léskiro muj isyn naj gudledyr; čačó, jov isyn šukár pir saró. Ake, savó isyn miro piramnó, ĥáda, isyn miro mal, — tumé, Jerusalimóskire čhajale!