Read Biblija - Pe Baltitko Romani čib (Romanes) 2019 Baltic Romani Bible Isajos 1 Bible Online

Isajos 1 - Biblija - Pe Baltitko Romani čib (Romanes) 2019 Baltic Romani Bible bible

Isajos 1

¹Ake, isyn Isajoskiro[1], Amosóskire-čhavéskiro dykhibén, savó jov dykhélas pal Judéia i Jerusalimo, dre dolé dyvesá, kiéli Ozíia, Iofámo, Aházo i Jezekíia sys Judejákire králja.

²Šunén, bolybena, pošun, phuv, pal-dová so phenéla Raj Devél: “Me barjakirdjom, ĥazdyjom čhavén, a jone ĥazdynépe pe Mánde.

³Gurúv džinéla péskire xulás, a óslo (miegári) — péskire-ráskiri štála, ne Izrailjo na džinéla Man, na ĥaljola Miro narodo.”

⁴Ai, grehítka manušále, narodo, savó isyn pherdó péskire grehénca, nálačho ródo, xasibnýtka čhavé! Tumé jačkirdé Ras-Devlés, čhurdyné sventoné Izrailjoskire Devlés, risiné pale.

⁵Syr iščo (inké) te maráv tumen, kóli tumé usajékh na kandéna? Saró šeró isyn nasvaló, saró iló zamyjá.

⁶Ĥeréndyr ke šeró nane léste sastó štéto: fuiá (jazvy), šuvlypená, čyl'čáki (narývy) isyn na žužakirdé, na obphandlé, na kovliakirdé jeliejosa.

⁷Tumarí phuv isyn čhučí (pusto), tumaré fórja isyn shačkirdé jagása; tumaré féldy xána čúža manušá angíl tumaré jakhá; saró isyn čhučó syr tén'či, kóli čúža manušá rosčorénas.

⁸I jaciápe Sionóskiri čhaj, syr šátra dre vinogradóskiri únta (sado), syr šalášo dre bar (ogorodo), syr fóro, pe savó ĥazdynépe (zauhtylde) vérgi.

⁹Kóli b na jačkirdiá Raj Devél, bolybnáskire-jangoléngiro, aménge nabaró jačaibén, to sámas by ame, syr Sodómo, ame zdžásas (podžásas) by pe Gomóra.

¹⁰Thagárja (kniázi) Sodomóskire! Šunén Ráskire-Devléskiro lav! Narodo Gomorátyr, pričhuvén kan ke amaré-Devléskiro Zakóno!

¹¹“Pe so trej Mánge but tumaré svénta dyibená? — rakiréla Raj Devél, — Me čalyjom bakréngire xačkiribnasa, čalyjom thulypnastyr, Me na kamám butýr guruvorengiro, bakrorengiro i buznengiro rat.

¹²Kiéli tumé javéna te sykavenpe angíl Mánde, kon mangéla tumen, sob (kaj) tumé te štaven (te topčynen) ĥerénca Miré gredy (dvory)?

¹³Na janén butýr dáry, — davá isyn ivjá (naprásnes), — tumaré kadilakire thuva isyn džungalé (brydka) Mánge; neve čhoná i sávaty (suboty), svenkitko skedyibén Me naštý (na mogináva) te vyrikirav: čoripén i svénko!

¹⁴Na priléla Miro di tumaré neve čhoná i uphendle svénki; davá isyn pharipén vaš Mánge, pharés te lydžav len.

¹⁵I kóli tumé protyrdena tumaré vastá te mangénpe, Me zakerava tuméndyr Miré jakhá; kóli tumé mangénape, Me na šunava: tumaré vastá isyn pherdé dro rat.

¹⁶Vymorenpe, javén žužé; zalen tumaré nalačhé réndy Miré jakhéndyr; pirijačen te kerén čoripén.

¹⁷Vysykljon te kerén lačhipén, rodén čačipén, zrakhen čorores, uštén (zaterdjon) pal bidadeskireste / pirotoste (sirotaste), podrikiren pivlia (udova).

¹⁸“Tén'ci javén, javása te sendiakiras (te roskedaspe),” — rakiréla Raj Devél. “Kóli javéna tumaré gréhi lolé, syr rat, jačéna parné, syr iv, kóli javéna lolé, syr jag jačéna parné, syr výlna (šers') Me parniakirava.

¹⁹Kóli tumé zakamena i javéna te kandén, to tumé javéna te xan lačhipén phuvjákiro.

²⁰Ne kóli tumé otphenenape, i javéna narta (uporna), to kurtála pohala tumen,” pal-dová so uštá Ráskire-Devléskire phenéna adiáke.

²¹Syr biladžakunes parudiape čačipnáskiro šerutno fóro, savó sys pherdó čačuné sendosa! Čačipén dživelas dre léste, a akaná dživéna zamaribnarja (rozmaribnarja).

²²Rup tyró jaciá blatasa, tyrí mol (vino) isyn khetané paniésa.

²³Thagárja (kniázi) tyré na keréna pir čačipén, léngire drúgi (malá) isyn čora. Saré jone kaména myto, prastána pal lové. Jone na uštena (zaterdjona) pal pirotende (sirotende) i pivliakiro (udovakiro) réndo na dodžála ke jone.

²⁴Paldavá adiáke phenéla Raj Devél, bolybnáskire-jangoléngiro, Zoraló Izrailjoskiro: “O, ĥazdáva Me Pes pe odolénde, kon nane Mánca, Me sykaváva Miré vergénge!

²⁵I Me protyrdava ke tu Miro vast, Me žužakirava tut šlakostyr, zlava tútyr sarí bláta.

²⁶I javáva te dav sendar'jen túke, syr angledýr i junkaren/godý-dyibnaskiren (sovietniken), syr sys angledýr; tén'či javéna te rakirén pal túte: Fóro, kaj isyn čačipén; davá baró fóro isyn patiaibnýtko.”

²⁷Zrakhélape Sióno čačuné sendosa, a čhavé léskire, savé javné ke Devél, čačipnása.

²⁸A sarénge, kon gijá krig Rástyr-Devléstyr, kon isyn grehítko-xasibén; odolé, kon jačkirdiá Ras-Devlés — xasjona.

²⁹“Jone javéna ladžakirdé pal dembitka vešá, savé adiáke tuménge isyn pir iló, i tumé loljona pal unty (sady), savé tumé vykedyné péske.

³⁰I javéna tumé, syr dembo, kóli spyne telé léstyr patria (listy), syr únta (sado), kaj nane paní.

³¹Zoraló javéla syr šmata, i léskiro réndo syr jag; javéna te xačon khetané i nikón na murdiakirla.”