Read Biblija - Pe Baltitko Romani čib (Romanes) 2019 Baltic Romani Bible Isajos 11 Bible Online

Isajos 11 - Biblija - Pe Baltitko Romani čib (Romanes) 2019 Baltic Romani Bible bible

Isajos 11

¹I vybarjola otbaripen Jesiejoskire kornjostyr (rukhestyr); kadavá rukh vybarjakirela neví rand'.

²Javéla čhudo pe léste Ráskire-Devléskiro Dúho (Fáno), dúho, savó déla Devléskiri godý i godypén phuvitko; savó déla podphenyben i zor, dúho pir džinybén i pir svénto džiibén.

³Ráskire-Devléskire darása pherdjola Jov, i javéla Jov te sendiakirél na adiáke, syr dykhéna Léskire jakhá, na adiáke, syr šunéna Léskire kaná.

⁴Jov javéla te sendiakirinel čororen čačipnása; kodolengire, kon stradynela pe phuv, réndy čačipnása rossendiakirela; Jov Péskire vuštengire destesa marela phuv, Péskire vuštengire duhósa zamarela grehitkoné manušés.

⁵I obphandelape Jov čačipnása pir trušula (čriesly), čačipén javéla Léskiro obphandypen upré pir ĥerá.

⁶Tén'ci ruv javéla te dživél khetané bakroresa, rič javéla paštó khetané buznoresa; guruvoro, ternó ščer (liévo) i ruv khetané javéna; tyknó bijáto javéla len te lydžál.

⁷Gurumny javéla te čaravelpe ričihasa, čhavoré léngire javéna pašté khetané; ščer (liévo) javéla te xal phus, sýrby guruv.

⁸Bijáto javéla te khelel (te broinel) pašýl sapeskiri nora, jov protyrdela péskiro vast ke saplyniakiri gniázda (kúfo).

⁹Na javéna te kerén xolý ci doš pe Mirí svénto bérga, pal-dová so phuv pherdjola Devléskire džinybnasa, syr mórjo (derjáv) pherdjol paniésa.

¹⁰I javéla dro dová dyvés: ke kornjo (rukh) Isiejoskiro, savó jačéla syr sciago te prikharel narody, obrisjona Najudýtka nácyi, i baripnasa javéla léskiro otkhinyben.

¹¹Javéla dro dová dyvés adiáke: iščo (inké) protyrdela Raj Devél Péskiro vast, sob (kaj) te riskirél jačaibén Péskire narodóstyr, savó jačélape ke Asuro, dro Jegípto, ke Patroso, ke Xuso, ke Jelamo, ke Sienaaro, ke Jemafo, pe ostrovy, savé isyn pir mórjo (derjáv).

¹²I kharéla ke Pe Najudýtka nácyi i skedéla Jov vytradyné manušén Izrailjostyr, i rosčhurdyne Judén skharela štaré jagorendyr pe phuv.

¹³Jefriémo pirijačéla te del jakhalo (te zavidynel), saré, kon ĥazdyjápe pe Judaste, javéna xas'kirde; Jefriémo na javéla te del jakhalo Judáske, Juda na gazdelape pre Jefriemoste.

¹⁴Priurniana pe Filistimlianengire psiké ke zapado (ke pal-panitko rig); občorena sarén čhavén vastokóstyr, protyrdena péskiro vast ke Jedomo ke Moávo; Amonoskire čhavoré javéna léngire butiarnenca.

¹⁵I vyšut'kirla Raj Devél reka (len'), so isyn pašýl mórjo (derjáv) Jegiptóskiro, protyrdela Jov Péskiro vast ke reka (len') dre zoralý balvál, rozmarla la pe eftá javír rekicy, adiáke, so dre triviki javéna la te piridžan.

¹⁶Tén'ci vaš jačaibén Léskire narodóstyr javéla baró drom, syr davá sys vaš Izrailjo, kóli jov vydžálas Jegiptóskire phuvjátyr.