Read Biblija - Pe Baltitko Romani čib (Romanes) 2019 Baltic Romani Bible Isajos 19 Bible Online

Isajos 19 - Biblija - Pe Baltitko Romani čib (Romanes) 2019 Baltic Romani Bible bible

Isajos 19

¹Angilphenybén pal Jegípto. — Ake, Raj Devél isyn beštó pe bolybén i javéla dro Jegípto. I izdrana Léskire móstyr ídoly Jegiptóskire, i iló Jegiptóskiro biladjola (rostainela) dre léste.

²“Me ĥazdáva Jegiptianen pe Jegiptianende, javéna te marénpe pšal pšalesa, mal malesa, fóro forosa, kralipén kralipnasa.

³I dúho (fáno) Jegiptóskiro xasjola, Me rozmarava léskiro godypén (sovieto) i prastána jone ke ídoly, ke manušá, savé isyn čovahane (magi), savé vykharena mulen, savé zumavena.

⁴I otdáva Me Jegiptianen dre zahale kralískire vastá; zahalo králi javéla xuláj léngiro”, — rakiréla Raj Devél, Raj Devél, bolybnáskiro-jangoléngiro.

⁵I vyšutjola paní dro mórjo (derjáv), i reka (len') pirijačéla te thadel i vyšutjola.

⁶I zašutjona réki (leniá), i dre kanaly Jegiptóskire, kaj paní thadelas saró vyšutjola; zašutjona sil (kamyšo) i triščyna (trosniko).

⁷Félda pašýl reka (len'), piró bregi pašýl reka (len') i saró, so pašýl reka (len') barjolas, zašutjola, rosphurdelape i xasjola.

⁸I zarovena mačhibnarja, zarovena odolé, kon začhurdelas vendka dre reka (len') i odolé, kon čhuvelas khudia (sietki) dro paní, peréna péskire diesa.

⁹I javéna te ladžan odolé, kon barjakiréla čar, savjátyr syvena i odolé, kon keréla (khuvela) parné pohtana.

¹⁰I javéna roskušne khudia i saré, konéste isyn miriežy te uhtylén džidé mačhen, peréna dro dúho (fáno) [r.s.]

¹¹Adiáke! Zgine godiatyr thagárja (kniázi) Coanoskire; godypén (sovieto) god'varé manušéngiro, savé podphenenas Faraonóske, jaciá dylynó. Syr tumé phenéna Faraonóske: “Me som čhavó god'varé-manušéngiro, ĥaratuné-kral'jengiro čhavó.”

¹²Kaj isyn jone? Kaj isyn tyré god'varé manušá? Mek jone te phenén túke akaná; mek te ĥaljon, so Raj Devél, bolybnáskire-jangoléngiro, priphendiá pal Jegípto.

¹³Zgine godiatyr thagárja (kniázi) Coanoskire, xohade isyn thagárja (kniázi) Miemfisostyr, domardé šeralé manušés pe kherítka ródy Jegiptóskire droméstyr.

¹⁴Raj Devél bičhadiá dre léste dúho (fáno) matybnaskiro; jone xohade Jegípto dre saré léskire réndy, adiáke, syr mato psiréla pir bláta, savjása jov čhadyja.

¹⁵I na javéla dre Jegípto dasaví butý, saví b kerénas šeró i pori, pal'ma i destó.

¹⁶Dro dová dyvés jačéna Jegiptiáni syr džuvliá, izdrana i javéna te darén (daran) Ráskire-Devléskire, bolybnáskire-jangoléngire vastéstyr, savó Jov ĥazdéla pe lénde.

¹⁷Phuv Judaskiri javéla darása vaš Jegípto; kon priripirela pal láte, odová izdrala Rástyr-Devléstyr, Léskire priphenybnastyr, savó Raj Devél otdyjá pal Jegípto.

¹⁸Dro dová dyvés pandž fórja pe phuv Jegiptóskiro javéna te rakirén Xanaanytkone čibása i te sovlahan Rása-Devlésa, bolybnáskire-jangolengiresa; jekh léndyr kharlape khamitkone forosa.

¹⁹Dro dová dyvés štéto, kaj janéna dyibená Ráske-Devléske javéla maškír phuv Jegiptóskiri i ripiribnytko štéto pal Raste-Devléste — pašýl phuvjákire rigá.

²⁰Jov javéla syr ĥiertýk (znamiénijo) i syr dosykaiben pal Raste-Devléste, jangoléngire-bolybnaskireste, pe phuv Jegiptóskiri; pal-dová so jone prikharena Ras-Devlés, kóli javéna vérgi, i Jov bičhavéla lénge zrakhibnaris i zaterdypnaskires (zastempnikos) i zrakhéla len.

²¹I Raj Devél sykavéla Pes dro Jegípto: i Jegiptiáni dro dová dyvés udžinena Ras-Devlés, i janéna svénta dyibená i déna lav (sovláh) Ráske-Devléske i spolninena.

²²I lélape Raj Devél pal Jegípto meribnytkone dukhasa, lélape i vysastiakirela; jone obrisjona ke Raj Devél i Jov šunéla len i vysastiakirela.

²³Dro dová dyvés javéla baró drom Jegiptóstyr ke Asirija; i zadžála Asuro dro Jegípto, a Jegiptiáni dre Asirija, i Jegiptiáni khetané Asirijanenca javéna te dynarinén Ráske-Devléske.

²⁴Dro dová dyvés Izrailjo javéla tritone Jegiptosa i Asirijasa; bahtiakiribén javéla maškír phuv,

²⁵saví bahtiakiréla Raj Devél, bolybnáskire-jangoléngiro i phenéla: “Bahtiakirdó isyn Miro narodo — Jegiptiáni, i Miré vastengiro réndo — Asirija, i Miro meknó mištypén — Izrailjo.”