Read Biblija - Pe Baltitko Romani čib (Romanes) 2019 Baltic Romani Bible Isajos 2 Bible Online

Isajos 2 - Biblija - Pe Baltitko Romani čib (Romanes) 2019 Baltic Romani Bible bible

Isajos 2

¹Lav, savó sys dynó dro dykhibén Isajoske, Amosóskire čhavéske, pal Judéia i Jerusalimo.

²I javéla dro palatuné (posliednia) dyvesá: Devléskire-Kheréskiri bérga javéla čhudý uprestyr, syr javír bérgi, i javéla ĥazdyny vučedýr, syr javír nabaré bérgicy i vydžána ke joj saré narody.

³I džána but narodengire manušá i phenéna: “Javén, ĥazdasape pe Ráskire-Devléskiri bérga, dro Jakovóskire-Devléskiro Kher, Jov vysykliakirela amen, i ame javása te psiras Léskire droménca,” pal-dová, so vydžála Zakóno Sionóstyr, a lav Ráskire-Devléskiro — Jerusalimóstyr.

⁴Jov javéla te sendiakirél but narody, Jov sykavéla sendariskiro lav ke but ródy; pirikerena péskire kurtaly (miečy) pe plugi (pharadia) i čhurdypnytka bustiá (kop'i) pe čhindlé (sierpy), na javéna te sykljon syr, te lydžán maribén.

⁵O, Jakovóskiro kher! Javén, javása te psiras dro Ráskire-Devléskiro dud (svéto).

⁶Ne tu jačkirdian tyró narodo, kher Jakovóskiro, pal-dová so jone but pirilyne vastokóstyr: manušá, savé isyn čorahane-podphenybnaskire, isyn lénde, syr ke Filistimliáni, čužoné čhavénca jone keréna khetané réndy.

⁷Pherdija léngiri phuv rupésa i suvnakása; na piriginesa léngiro barvalypén; pherdija léngiri phuv grenca i na piriginesa léngire vurdená.

⁸Pherdija léngiri phuv idolenca: jone mangénpe doléske, so kerdé léngire vastá, doléske, so kerdé léngire angušta.

⁹Pyjá manúš pe čangá, prilyjá murš ladž, i Tu na primangesa lénge.

¹⁰Džá ke bérga, garadjov dre phuv Ráskire-Devléskire darátyr i Léskire šaribnastyr.

¹¹Prodžála manušéskiro phut'kiribén, peréla manušéngiro vučipén, jekh Raj Devél javéla vučó dro dová dyvés.

¹²Pal-dová so džála dyvés Ráskire-Devléskiro, bolybnáskire-jangoléngiro pe saró phut'kirdo i pe saró ĥazdynó, saró ĥazdynó, saró davá javéla ladžakirdó.

¹³Pe saré kiedry Livanoskire, so isyn vučé i ĥazdyné, pe saré demby Vasanoskire, —

¹⁴pe saré vučé bérgi, pe saré nabaré bérgicy, so isyn ĥazdyné.

¹⁵Pe kažno vučó kher, pe kažno zoralý vánta.

¹⁶Pe saré pármy (korabli) Farsisososkire, pe saré léngire ukedybena.

¹⁷Peréla manušéskiro phut'kiribén, peréla manušéngiro vučipén, jekh Raj Devél javéla vučó dre dová dyvés.

¹⁸A ídoly sarésa xasjona.

¹⁹I ĥazdénape manušá, dre ĥiebará (pieščery) maškirál skaly te garavenpe Ráskire-Devléskire darátyr i Léskire šarde baripnastyr, kóli ĥazdélape Jov te xasiakirél phuv.

²⁰Dro dová dyvés manúš vyčhurdela péskire ídoly, rupuvé i suvnakuné, savé kerdiá, sob (kaj) te mangélpe lénge,

²¹sob (kaj) te ĥazdelpe (te zadžál) pe bérgi Ráskire-Devléskire darátyr i šarde Léskire baripnastyr, kóli Jov ĥazdélape te xasiakirél phuv.

²²Pirijačen te duminen, so podrikirla tumen manúš, konéste dúho (fáno) isyn dre léste kokoreste, so keréla adavá manúš?