Read Biblija - Pe Baltitko Romani čib (Romanes) 2019 Baltic Romani Bible Isajos 20 Bible Online

Isajos 20 - Biblija - Pe Baltitko Romani čib (Romanes) 2019 Baltic Romani Bible bible

Isajos 20

¹Dro dová berš, kóli Tartano javdiá ke Azoto, a les bičhadiá Sargono, králi Asirijákiro, jov i marelaspe Azotosa i lyjá les.

²Dro dová dyvés phendiá Raj Devél Isajoske, Amosóskire čhavéske: “Džá, zle tyró uribén, zle triviki tyré ĥerendyr.” Jov kerdiá adiáke; psirdiá nango i pirango.

³I phendiá Raj Devél: “Syr Miro pishári (rabo) Isajo psirelas nango i pirango trin berš, sob (kaj) te sykavél i te del angilphenybén pal Jegípto i Efiopija,

⁴adiáke lydžála Asirijákiro králi zauhtylde manušén plienonen Jegiptóstyr, manušén, savé piritradyne Jefiopijatyr; lydžála ternen i phuren, jone džána nange i pirange, sob (kaj) te ladžakiren Jegípto.

⁵Tén'ci javéna te darén i te ladžan Jefiopijatyr, péskire nadejatyr, i Jegiptóstyr, savésa jone šarenaspe.

⁶I phenéna dro dová dyvés manušá, savé odój dživénas: “Ake, savé isyn odolé, pe konéste isys amarí nadiéia, ke kon prastandyjam pal podrikiribén, sob (kaj) te zrakhaspe Asirijákire kralístyr! I sýrby ame zrakhasape?”