Read Biblija - Pe Baltitko Romani čib (Romanes) 2019 Baltic Romani Bible Isajos 21 Bible Online

Isajos 21 - Biblija - Pe Baltitko Romani čib (Romanes) 2019 Baltic Romani Bible bible

Isajos 21

¹Angilphenybén pal šukí phuv pašýl mórjo (derjáv), pal Vavilóno. — Syr zoralé balvalia vurniana pe paš-dyvés (jugo), adiáke džála jov šuké phuvjátyr, darane i čhučé phuvjátyr.

²Darano dykhibén sykade mánge: o čor čorela, o prahari otlela; zadžá, Jelamo, ĥazdepe, Mido, saré jasva me zalava.

³Daléstyr izdrana miré, Isajoskire, masá pe trušúl; me menčynavape, syr džuvlý, kóli joj bijanéla, me na lathava štéto doléstyr, so me šunava; me piridživava doléstyr, so me dykháva.

⁴Izdrala miro iló; marela man izdrany; mirí lačhí rat jaciá vaš mánge darása.

⁵Keréna skamínd, rosčhuvena pohtana, xána, p'jena. Uštén, rajole-thagárja, vydžán po maribén!

⁶Adiáke phendiá mánge Raj Devél: “Džá, čhuv rakhibnaris, mek jov te rosphenel, so jov dykhéla.”

⁷Jov dykhciá, so tradéna uklisté manušá pe grénde, manušá pe oslende, manušá pe vierbliudende, tradéna piró duj, i zoralés jov prišunelaspe.

⁸I zagodlyja syr ščer (liévo): “Rajo miro! Me rakhavas saró dyvés, i ratienca pe miro štéto me jačavaspe.

⁹Ake, tradéna manušá, tradéna uklisté pe grénde, pir duje manušénde.” Tén'ci jov zagodlyja i phendiá: ‘Pyjá, pyjá Vavilóno, i saré léskire ídoly, saré devloré isyn pašté pe phuv rozmarde.’”

¹⁰O, domardo miro, čhavó miré feldatyr! So šundjom Rástyr-Devléstyr, bolybnáskire-jangolengirestyr, Izrailjoskire Devléstyr, dová i phendjom me tuménge.

¹¹Angilphenybén pal Duma. — Godlena mánge, Sieirostyr: “Rakhibnari! Kicý časo ratiatyr jaciápe? Rakhibnari! Kicý časo ratiatyr jaciápe?”

¹²Phenéla rakhibnari: “Syg javéla zlóko (ránko), ne iščo (inké) isyn rat, kóli tumé adiáke domarenpe te phučenpe, tén'či obrisjon i javén.”

¹³Angilphenybén pal Aravija. — Rat'kiren dro veš Aravijakiro, karavany Diedanostyr!

¹⁴Manušále Fiemaskirne phuvjátyr! Lydžán paní odolénge, kon isyn dre smega (trušalo), vydžán marésa ke odolé, kon prastala.

¹⁵Pal-dová, so jone kurtalátyr našéna, kurtalátyr i lukostyr i zahale maribnastyr.

¹⁶Adiáke phendiá mánge Raj-Devél: “Iščo (inké) berš dasavo, syr berš butiariste (butiarneste), savó keréla butý pal lové, i saró baripén Kidaroskiro xasjola.

¹⁷I jačélape nábut (kutý) kurtaly nadarane Kidaroskire čhavénde; adiáke phendiá Raj Devél, Devél Izrailjoskiro.”