Read Biblija - Pe Baltitko Romani čib (Romanes) 2019 Baltic Romani Bible Isajos 23 Bible Online

Isajos 23 - Biblija - Pe Baltitko Romani čib (Romanes) 2019 Baltic Romani Bible bible

Isajos 23

¹Angilphenybén pal Tíro. — Rovén, pármy (korabli) Farsisostyr, pal-dová, so jov isyn rosphagirdo; nane kherá, nikón dre kherá na zadžála. Adiáke phendló lénge Kitimoskire phuvjátyr.

²Javén štyl, manušále, kon dživéla pe phuv maškír mórjo (derjáv), kaj pherdó sys Sidonoskire tylgar'jenca (kupcenca), savé pir mórjo (derjáv) tradenas.

³Pir baró paní janénas léske ziárki (siemiany) Sihoroskire, umaloto (urožajo) baré rekátyr (leniátyr), sys daja phuv štetosa, kaj narody biknenas.

⁴Ladža, Sidono, pal-dová so adiáke rakiréla mórjo (derjáv), zoralypén morjoskiro (derjavéskiro): “Sýrby me na menčynavaspe, kóli me i na bijanavas, i na barjakiravas čhavén i čhajén, i me na davas pale patyvalé džuvlién.”

⁵Kóli šunéna nevipen (viestia) Jegiptiáni, kóli šunéna pal Tíro, to strahadjona jone!

⁶Piritraden dro Farsiso, rovén, manušále, savé dživéna pe ostrovy!

⁷Ci davá isyn tumaró fóro, fóro, savó ziainelas radymátyr, fóro ĥaratuno? Léskire ĥerá lydžána les te stien'kinelpe (te psirél bi rendoskiro) pe čúžo rig.

⁸Kon priphendiá, sob (kaj) te javél adiáke Tirosa, savó rozdelas vianki, léskire kúpcy (tylgárja) sys thagárja (kniázi), kofarja (torgovcy) pir manušénde, savé odój biknenas, i sarí phuv džinelas len.

⁹Raj Devél, bolybnáskire-jangoléngiro, priphendiá davá, sob (kaj) te na phutjol nisavó baripén, sob (kaj) te ladžan saré, kon priléla patýv pe phuv.

¹⁰Psir pir tyrí phuv, čhaj Farsisoskiri, psir, syr reka (len'): nikón butýr pe tyró drom na terdjola.

¹¹Jov protyrdyjá Péskiro vast pe mórjo (derjáv), Jov piritrinskirdia kralipená; Raj Devél priphendiá pal Xanaano, sob (kaj) te rosphagiren léskire tvárdymi (krieposti).

¹²I phendiá: “Na javésa tu butýr te radynespe, patyvalý terný džuvlý, saví sys ladžakirdy, čhaj Sidonoskiri! Uštý, džá dre Kitimo, ne i odój tu na otkhinjosa.”

¹³Ake, isyn phuv Xaldiejengiri. Na sys angledýr davá narodo; Asuro kerdiá les manušéndyr, savé dživénas pe šukí phuv. Jone čhuvéna péskire vučardia (bašni), rosphagirena léskire rajkane kherá, phagirena len sarésa.

¹⁴Rovén, pármy Farsisoskire! Rovén, pal-dová so zor tumarí isyn phagirdy.

¹⁵I javéla dro dová dyvés: bistrena Tíro pe eftadešá berš, pe adákicy, syr jekh králi dživéla. A kóli prodžána dalé dyvesá, javéla Tirosa dová, so bagana pal biladžakuné džuvliáte.

¹⁶“Le bašady, psir pir fóro, bistyrdy biladžakuny džuvlý! Bašav kuč, baga but giliá, sob (kaj) te priripiren pal túte.”

¹⁷I javéla: kóli eftadešá berš prodžána, to Raj Devél zadžála ke Tíro, jov léla péskiri bažyn, jov léla nevés te kerél biladžakire réndy saré kralipnenca pir sarí phuv.

¹⁸Ne léskiro biknyben i léskiri bažyn javéna otdyné Ráske-Devléske; jone na javéna garadé, pal-dová so ke odolé, kon dživéla angíl Devléskiro muj, piridžala bažyn, sob (kaj) te xan i te čaljon, sob (kaj) te javél lénde zoraló uribén, savó ĥará saštý te ur'jel.