Read Biblija - Pe Baltitko Romani čib (Romanes) 2019 Baltic Romani Bible Isajos 24 Bible Online

Isajos 24 - Biblija - Pe Baltitko Romani čib (Romanes) 2019 Baltic Romani Bible bible

Isajos 24

¹Ake, Raj Devél xasiakiréla phuv ke čhučipen (pusto), keréla adiáke, sob (kaj) te na janel joj barjakirdó (plódo), i piriparuvela, rosphurdela kodolén, kon dživéla pe láte.

²I so javéla narodosa, dová-pac' (tože) javéla rašása; so javéla dynarisa, dová-pac' javéla léskire xulása; so javéla dynaricasa, dová-pac' javéla lákire xulaniasa; so javéla odolesa, kon kinela, dová-pac' javéla odolesa, kon biknela; so javéla manušésa, savó zalela lové, dová-pac' javéla odolesa, kon déla léske lové.

³Phuv isyn občordy sarésa i čhučí, phuv sarésa isyn rosčordy, pal-dová so Raj Devél phendiá davá lav.

⁴Tanginela, rovela phuv; pyjá duhósa, na radynélpe baró svéto, dre bibáht (bída) isyn manušá, savé ĥazdenaspe pe phuvjákiro narodo.

⁵Phuv isyn magirdy manušéndyr, savé dživéna pe láte, pal-dová so jone otčhurdyne zakóny, parude statúto (ustavo), jone phagirdé viéčno zavieto.

⁶Paldavá prokošybén xála phuv, priléna bibáht manušá, savé pe phuv dživéna; shačkirdé isyn manušá, savé dživéna pe phuv i nabutka len jaciápe.

⁷Rovela sóko (xum) (neví mol) nevoné-mur'jengiro pe senko (suko); dukhala rand' vinagradoskiri; ĥazdéna di pharés saré, kon radynelaspe ilésa.

⁸Pirijaciá rádyma (loš) bašaibnasa pe bubny, na radynénpe butýr manušá, kon radynelaspe, jone na bašavena butýr pe cymbaly.

⁹Na p'jena butýr mol (vino) i na bagana, kirki isyn bravinta vaš odolénge, kon p'jela la.

¹⁰Rosphagirdo isyn čhučó fóro, saré kherá zakerde pe klydyn, naštý te zadžas.

¹¹Rovena pe vulícy (gásy) pal mol (vino), gijá krig rádyma, vytradyné viesjolyma (loš) phuvjátyr.

¹²Čhučó isyn fóro i pórty isyn rosphadine.

¹³A maškír phuv, maškír narody, javéla adiáke, syr sys, kiéli obmarenas masliny i skedenas vinagrado, kóli saró ukedenas.

¹⁴Zagodlena zoralé zaniása, javéna te radynénpe dro Ráskire-Devléskiro rajkanypen, i javéna te godlen morjostyr (derjavestyr).

¹⁵Šarén Ras-Devlés pe vastóko, pe ostrovy, šarén Ráskire-Devléskiro, Izrailjoskire-Devléskiro lav!

¹⁶Phuvjákire jagoróstyr (koncostyr) šunasa ame gilý: “Te slavinelpe Čačipnáskiro Devél!” I phendjom me: “Bida mánge, bída mánge! Čora čorena, čora čorena zlydnitkes.”

¹⁷Dar, ĥanbín (jama) i felý uhtylena tut, manúš, savó dživéla pe phuv!

¹⁸Tén'ci odová, kon prastándyja, kóli zagodlyne darátyr, peréla dro xor štéto, a kon vydžála odothýr, poperla dre felý, pal-dová so fenštry bolybnáskire vučipnástyr psiradjona (roskernape) i phuv izdrala.

¹⁹Phuv izdrala, phuv rosperelape, phuv izdrala baré zorjása.

²⁰Kuninelape (kačynelape) phuv, syr mato manúš, kuninelape i grého lákiro pe láte: joj peréla i butýr na uštéla.

²¹I javéla dro dová dyvés: zdžála Raj Devél te kerél kára pe nalačhé dúhi, savé isyn dro bolybén i pe phuvitkone kral'jénde, savé isyn pe phuv.

²²I javéna jone skedyné khetané dro rovo (xohói), i javéna zakerde dro bešyben, i priléna kára, kóli prodžána but dyvesá javéna te sendinén.

²³I čhon loljola, i kham ladžala, kóli javéla Raj Devél, bolybnáskire-jangoléngiro kralísa pe bérga Sióno i dro Jerusalimo, i angíl léskire phurydyrende javéla baripén (sláva).