Read Biblija - Pe Baltitko Romani čib (Romanes) 2019 Baltic Romani Bible Isajos 25 Bible Online

Isajos 25 - Biblija - Pe Baltitko Romani čib (Romanes) 2019 Baltic Romani Bible bible

Isajos 25

¹Rajo Dévla! Tu san miro Devél, me láva te šaráv Tut, me šarava ke vučipén Tyró lav, pal-dová so Tu kerdián dívo; dová, so priphendian ĥará, davá isyn čačipén, amín'.

²Tu rosphagirdian zoralý tvárdyma sarésa, rajkano kher (xaromo), savó kerdé manušá, butýr nane dro fóro, butýr nikoli les na ĥazdéna.

³Paldavá javéna te šarén Tut zoralé narody; fórja, kaj darane kherítka ródy dživéna, javéna te darén Tútyr.

⁴Tu sánas zrakhibnasa vaš čororeske, zrakhibnasa vaš čororé manušéske, syr sys pharó léske; zrakhibnasa zoralé balvaliatyr, i khamestyr. A xoliamó phurdypen nalačhé manušéndyr sys syr balvál, kóli joj pe vánta ĥazdélape.

⁵Syr xačkiribén pe štéto bipanieskiro, Tu rozmardian vergengiro šumo; syr čačipén pirijačéla bryšyndestyr, adiáke Tu pritasadian rádyma odolengiri, savé pritasavéna.

⁶I keréla Raj Devél, bolybnáskire-jangoléngiro pe daja bérga lačhó xabe vaš saré narody; odój javéla žužy mol (vino), thulypen kokalendyr; sámo žužy (čysto) mol.

⁷I xasiakiréla pe daja bérga učhakiriben, savó učhakiréla saré narody, savó pe saré ródy isyn pašlo.

⁸Meribén xasjola sarésa, i vykhosela Raj Devél, Devél jasva saré mujendyr i zlela ladž Péskire narodóstyr pir sarí phuv, pal-dová so adiáke rakiréla Raj Devél.

⁹I phenéna dre dová deves: “Ake, Jov isyn amaró Devél! Pe Léste sys amaró lačhó užakiribén i Jov zrakhciá amen! Kadavá isyn Raj Devél; pe Léste sys amaró lačhó užakiribén; lása te radynaspe Léskire Zrakhibnastyr.”

¹⁰Vast Ráskire-Devléskiro pasjola pe daja bérga i Moávo javéla domardo pe péskiro štéto, syr phus zmarena ĥerénca dro gnejo.

¹¹Mek te protyrdel jov péskire vastá, syr manúš, savó plyvinela (déla plima) akaná, rostyrdela vastá te plyvinel (te del plima), ne čhuvéla telé Devél pal léskiro phut'kiribén, pal xohaibén, savó léskire vastá kerénas.

¹²I tvárdyma, tyré zoralé i vučé vantendyr rosphagirela, Jov rozmarela, čhurdéla pe phuv, dro práho.”