Read Biblija - Pe Baltitko Romani čib (Romanes) 2019 Baltic Romani Bible Isajos 27 Bible Online

Isajos 27 - Biblija - Pe Baltitko Romani čib (Romanes) 2019 Baltic Romani Bible bible

Isajos 27

¹Dro dová dyvés čingirela Raj Devél péskire kurtalása, saví isyn pharí, bari i zoralý Lieviafonos (drakonos), sapes, savó mamúj (priames) prastala, i Lieviafonos, sapes, savó vykrencynelpe (dind'kirelape), i muliakiréla Raj Devél dolé darane rupučos, savó dživéla dro mórjo (derjáv).

²Dro dová dyvés “Bagán pal léste pal vinagrádniko, savó isyn pir iló mánde.

³Me, Raj Devél, rakhava les; kažno menta (minuta) Me dáva léske paní; ratý i dyvesé Me rakhava les, sob (kaj) nikón odorík te na džal.

⁴Nane Mánde xolý. Ne kóli vari-kon čhuvéla proti Mánde dre léste phusadé čarjá, to Me džáva pe léste maribnása, sarésa les shačkirava.

⁵Ne kóli jov/joj pomangela Miro zrakhibén, i javéla te mangél ramánjo (miro) Mánca, mek tén'či jone te prilén ramánjo (miro) Mánca.”

⁶Dre dyvesá, savé javéna, zoraló javéla Jakovo, vybarjola i rozmekelape luludienca (cvetenca) Izrailjo, baró svéto javéla pherdó barjakirdesa (plodosa).

⁷Ci marelas les Raj Devél adiáke syr javire manušén? Ci zamarelas les adiáke, syr javirén zamarelas?

⁸Tu phucian léstyr, syr trej, kóli Tu, Dévla, otgijan léstyr; vyčhurdyjan les Péskire zoralé phurdypnasa, syr dro dyvés, kóli phurdela vastočno balvál.

⁹I dalésa zlelape (vykhoselape) grého Jakovóskiro, zlelape grého léstyr, kóli jov rozmarela saré bará altarjostyr (žertvienikostyr) dre koterá zvjoskakire, na javéna terdé dembitka veladinia (roščy) i ídoly khameske.

¹⁰Pal-dová so zoraló fóro čhučó javéla, kherá javéna čhurdyné, syr čhučí phuv. Odój guruvoro javéla te čaravelpe, odój jov javéla te pasjol i te xal léskire randiá.

¹¹Kóli léskire randiá zašutjona, len obphagirena; javéna džuvliá (manušnia) i shačkirena len. Pal-dová so jone isyn narodo bigodiakiro, Jov na potanginela len, Odová, Kon saró sozdyjá.

¹²Ne javéla dre dová dyvés adiáke: Raj Devél lélape paló saró, baré rekátyr (leniátyr) ke reka (len') Jegiptóskiri, i tumé, čhavé Izrailjoskire, skedénape jekh ke jekh.

¹³I javéla dre dová dyvés: baró roĥo (truba) zabašavela i javéna odolé, kon našadiape pe phuv Asirijakiri, konés vytradyné pe phuv Jegiptóskiri. Saré jone peréna angíl Raste-Devléste te den patýv pe svénto bérga dre Jerusalimo.