Read Biblija - Pe Baltitko Romani čib (Romanes) 2019 Baltic Romani Bible Isajos 28 Bible Online

Isajos 28 - Biblija - Pe Baltitko Romani čib (Romanes) 2019 Baltic Romani Bible bible

Isajos 28

¹Bida phut'kirdé kralitkone viankake [koronake-ju.o.], saví isyn pe mate Jefriemlianende, luludiake (cvetoske) léskire gožone uribnastyr, savó zašutija, savó isyn pe lačhí félda, kaj pasjona mate moliátyr (vinostyr).

²Ake, sastó i zoraló isyn Raste-Devléste syr baró bryšýnd barénca, syr xasiakiribnytko balvál, syr šumno paní, savó ĥazdyjápe i zorjása čhurdéla pe phuv.

³Marena manušá ĥerénca phut'kirdy viánka mate Jefriemlianendyr.

⁴I zašutine luludiasa léskire gožone uribnastyr, saví isyn pe lačhí félda, keréna adiáke, syr smokvasa, saví sýges vybarija angíl sroko, i paldavá, kon dykhéla la, jekhátyr (srázu) léla vastésa i xála jekhe ĥlytankosa.

⁵Dro dová dyvés Raj Devél, bolybnáskire-jangoléngiro, javéla gožone viankasa i šukarone diademasa vaš jačaibén Léskire narodóstyr.

⁶I duhósa, savó sendinela pir čačipén vaš kodoléske, kon bešéla pe séndo, i muršypnasa vaš odolénge, kon marelape vergenca.

⁷Ne kadalé peréna moliátyr (vinostyr), zmarenape droméstyr, pal-dová so piné sikiera (bravinta); rašáj i proróko matine, zgine godiatyr; na dykhéna dykhibén, jone na sendiakirena, syr trej.

⁸Saré skaminda jone zamakhne, isyn nažužo (čysto) štéto.

⁹I iščo (inké) rakiréna: “Konés kaméla jov te sykliakirél, konéske isyn pir iló te rakirél lav? Odolénge, kon naĥara pirijaciá te p'jel dákiro thud?”

¹⁰Ake: priphenybén paló priphenybén, priphenybén paló priphenybén jekh zakóno paló javír zakóno, adáj nábut i odój nábut.

¹¹Paló dová javire ušténca i javire čibása (čibjasa) léna te rakirén ke davá narodo.

¹²Lénge rakirénas: “Ake, isyn otkhinyben, den, sob (kaj) te otkhinjol khino manúš, ake, isyn štylypen.” Ne jone na zakamle te šunén.

¹³I jaciá lénge lav Ráskire-Devléskiro: “Priphenybén paló priphenybén, priphenybén paló priphenybén, jekh zakóno paló javír zakóno, jekh zakóno paló javír zakóno,” pal-dová jone džána i peréna, i rozmarnape, i jone javéna uhtyldé.

¹⁴Šunén Ráskire-Devléskiro lav, košybnarja, dalé rajo načačipnaskire narodoskire, savé dživéna ke Jerusalimo.

¹⁵Pal-dová, so tumé rakiréna: “Ame dorakirdiampe xore štetosa tel phuv liunosa (adosa) i meribnasa: kóli prodžála čhupny, saví xasiakirla saró, ke ame joj na dodžála, pal-dová so xohaibnasa ame zrakhasape i načačipnasa pes zakerasa (phandasape).”

¹⁶Adiáke rakiréla Raj Devél: “Ake, Me čhuváva bar po Sióno, bar vyrikirdo, drógo (kuč), bar zoraló: kon patiála dre léste, na javéla te ladžal.

¹⁷Me keráva adiáke, so javéna te mierinen sendosa i čačipnása; bará xasiakirena štéto, kaj xohaibén garadiape, paní začhuvela davá štéto.

¹⁸Tumaro dorakiribén meribnasa rosperelape, dorakiribén liunosa (adosa) na vyterdjola. Kóli džála čhupny te xasiakirél, to domarela tumen ke ĥerá.

¹⁹Kóli syg joj (čhupny) javéla to uhtylel tumen; javéla te psirél kažno dyvés i kažno rat, syr šunéna pal láte, to léla dar.”

²⁰Nabaró javéla čhuibén, sob (kaj) te pasjon, nabugly učhakirdy javéla, sob (kaj) lása te zapat'kiraspe (te zakrencynaspe).

²¹Ĥazdelape Raj Devél, syr pe bérga Pieracymo, xoliasóla syr pe félda Gavaoskiri, sob (kaj) te kerél Péskiro réndo (diélo), baró réndo, sob (kaj) te kerél Péskiri butý, bari butý.

²²Na kerén perasa / šutki (na prezentynenpe), sob (kaj) te na prilén iščo (inké) butýr, pal-dová so me šundjom Rástyr-Devléstyr, Rástyr-Devléstyr bolybnáskire-jangolengirestyr, so xasibén pe sarí phuv javéla, adiáke priphendlo.

²³Prišunen kanenca, pošunen mirí zan, vyšunen i lav, so me phenáva tuménge.

²⁴Ci saré dyvesá keréla butý manúš, savó obkerela phuv te čhuvél ziárka, savó rozriskirela (rozmarela) komki i randela phuv?

²⁵Nad, kóli jov rozroŭninela phuv, to jov čhuvéla dre láte vika, ci rosčhuvela kmino, jov barjakiréla giv riadenca, barjakiréla džov dro štéto, savó vaš davá vykedyjá, barjakiréla pašýl léste proso.

²⁶Adiáke isyn, syr sykliakiréla Devél léskiro; Devél déla godý léske.

²⁷Pal-dová so na vymarena vika rotasa, i ukedybnytka róty na katynena pir kmino, a kaštesa vymarena giv i kmino.

²⁸Vymielinena maró, ne na rozmarena les i lydžána pir léste obmaribnytka róty léngire grenca i na roskhosena (na rostrinskirena) les.

²⁹Saró davá — Rástyr-Devléstyr, bolybnáskire-jangoleskirestyr, dívna dúmy Léskire, bari isyn Léskiri godý!