Read Biblija - Pe Baltitko Romani čib (Romanes) 2019 Baltic Romani Bible Isajos 29 Bible Online

Isajos 29 - Biblija - Pe Baltitko Romani čib (Romanes) 2019 Baltic Romani Bible bible

Isajos 29

¹Bida Ariiloske, Ariiloske, foroske, kaj dživdiá Davído! Pričhuvén berš ke berš, mek te zamarén dová, so džála, sýrby svénto dyibén.

²Ne Me tasavava Ariilo, javéna te godlen, javéna te rovén, i jov jačélape Mánde, syr Ariilo.

³Me ĥazdavape pe Túte trusciál (krugom) maribnytkoné taborosa, i Me stasavava tut stregasa te dykhén pal túte, i Me čhuváva zoralý vučardý (bašnia) proti túte.

⁴Tu javésa tykniakirdo ke ladž, tu lésa te rakirés phuvjátyr, zan tyrí na šunéna prahostyr, zan tyrí javéla syr zan muleskiri; prahostyr javéla te šepčynel (te zembinel) tyrí čib.

⁵Tyré-vergengiro butypen jačéla syr drobno práho, i zahalo; baró ke dar xaladybén rosphurdelape, savó syr phusa, saró davá javéla, kóli na užakiréna, jekhátyr, dre jekh menta (minuta).

⁶Raj Devél, bolybnáskire-jangoléngiro, javéla ke tu gromosa i zoralé zaniása, so phuv javéla te izdral, zoralé balvaliasa, jagása, saví saró shačkiréla.

⁷Syr sunó, syr dykhibén ratiákiro, jačéla narodonengiro butypen, savé javéna te marénpe Ariilosa, savé javéna te ĥazdénape pe léste i stasavena les.

⁸I syr bokhalé manušéske, savó dykhéla suné, so jov xála, a uštyjá — ničí nane, syr savó drieván kaméla te p'jel manušéske, savó dykhéla suné, so jov p'jela, ne uštyjá i ničí nane, di léskiro mlieinela (isyn trušalo), adiáke javéla narodo léngire butypnasa, savé marenape bergasa Sionosa.

⁹Prilén davá pal dívo: jone korjakirde javirén i kokoré korine, jone isyn mate, ne na pal-dová, so piné mol (vino), jone kuninenape (kačynenape), ne na paldová, so sikiera (bravinta) piné.

¹⁰Dyjá tuménge Raj Devél soibnytko, zakerdia tumaré jakhá, proróki, zakerdia tumaré šeré, džinybnarja (magi).

¹¹I kažno angilphenybén vaš tuménge isyn syr lavá dre zakerdy lylvarí. La podena manušéske, savó ginéla i rakiréna: “Gin la!” Ne jov phenéla: “Na proginava, pal-dová so joj isyn zakerdy (phandly).”

¹²Tén'ci piridena lylvarí odoléske, kon na džinéla te ginel i rakiréna: “Gin la!”, — ne jov rakiréla: “Me na džináv te ginav.”

¹³I phendiá Raj Devél: “Paldová so davá narodo džála ke Me péskire ušténca i šarela Man péskire čibása, ne iló léskiro dur otgijá Mándyr, i dová, so jone ĥazdéna Mánge patýv dre dar dolesa, so sykliakiréna manušéngire uphenybená,

¹⁴to, ake, Me adiáke keráva dalé narodosa divnes, syr nikoli na sys; xasjola godý léskire god'varé manušénde, zalelape (na javéla) godý godé manušénde.”

¹⁵Bida kodolénge, kon duminéla te garadjol dro xor štéto, sob (kaj) te na džinél Raj Devél léngire dúmy, savé keréna péskire réndy dro kalypén i rakiréna: “Kon dykhéla amen? Kon ĥaljola pal aménde?”

¹⁶Savó dylnypén! Ci priléna butiaris pir ĥleja (glina) pal léskiri butý ĥlejatyr? Ci phenéla sozdynó priedmieto pal Kodoleste, Kon les sozdyjá: “Na Jov sozdyjá man”, — ci phenéla pal péskire xulaste: “Jov na ĥaljola?”

¹⁷Iščo (inké) nábut, sarésa nábut, i ci na pirikerelape Liváno dre únta (sado), na javéna ci te šarén únta, syr veš?

¹⁸Dro dová dyvés kašuke manušá šunéna lavá lylvarjatyr, kororengire jakhá léna te dykhén.

¹⁹I ramanjona (mirna) manušá iščo (inké) butýr javéna te radynénpe pal Raste-Devléste, čororé manušá javéna zoralés te radynénpe pal Sventoné-Izrailjoskire Devléste.

²⁰Pal-dová so nikón butýr lénge na javéla te kerél bibáht, košybnari xasjola, i xasiakirena sarén, kon na keréla pir čačipén.

²¹Ci kon zapentynela manušés dre lavá, ci uhtyléla manušés, savó mangéla séndo pašýl pórta, kon na priléla čačuné manušés.

²²Paldavá adiáke rakiréla pal kher Jakovóskiro Raj Devél, Savó vykindia Avraamos: “Tén'ci Jakovo na javéla te ladžal i muj léskiro na parnjola.

²³Kóli dykhéla jov péste péskire čhavorén, savén dyjom Me léske, jone déna patýv Miré lavéske, déna patýv Sventoné Izrailjoskire Devléske, i jone javéna te darén radymása Izrailjoskire Devléstyr.

²⁴Tén'ci odolé, kon blendynela duhósa, priléla godý, a kodolé, kon na kandéla, sykljona, syr te kandén.”