Read Biblija - Pe Baltitko Romani čib (Romanes) 2019 Baltic Romani Bible Isajos 30 Bible Online

Isajos 30 - Biblija - Pe Baltitko Romani čib (Romanes) 2019 Baltic Romani Bible bible

Isajos 30

¹“Bida čhavénge, savé na kandéna,” — rakiréla Raj Devél, — “savé obrakirena réndy (diély) bi Miro, dorakirenpe na pir Miro dúho (fáno), a sob (kaj) te pričhuvén grého ke grého.

²Na phučenape Mándyr, a džána dro Jegípto, sob (kaj) te podrikiren pes faraonóskire zorjása i te garadjon dro Jegípto.

³Ne zor faraonoskiri jačéla vaš tuménge ladžasa, i kóli tumé garadjona dro Jegípto, to ladžavo tuménge javéla.

⁴Pal-dová, so thagárja (kniázi) léskire isyn dro Coano, bičhadé manušá (posly) léskire doginé ke Xanieso.

⁵Saré jone javéna ladžakirdé pal narodo, savó lénge na trej, nisavó podrikiribén léstyr na javéla, jekh ladž i bizlado.”

⁶Pharipén pasjola pe grénde, savé džána pe paš-dyvés (jugo), pir phuv, kaj tasavena i pritasavéna, katýr vydžána saplynia i karmusa (myšy), savé vurniana; jone lydžána pe oslende péskiro barvalypén i pe vierbliudende péskiro kučipén, lydžána ke narodo, savéstyr ničí lačhó na priléna (nisavó lačhipén na javéla).

⁷Na podrikiréla len Jegípto, paldavá Me phendjom lénge: “Léngiri zor — štylés te bešén.”

⁸Akaná poddža, začhin saró davá pe phal, začhin dre lylvarí, sob (kaj) te jačélpe davá pe dyvesá, savé javéna, pe saró časo (cýro).

⁹Pal-dová, so jone isyn buntiaritko narodo, (savó nikonés na kandéla), xohané čhavoré, savé na kaména te šunén Ráskire-Devléskiro Zakóno.

¹⁰Save rakiréna odolénge, kon dykhéla čačipén: “Pirijačen te dykhén!”, — a ke proróki: “Na angilphenen aménge čačipén, rakirén aménge lačhé lavá.

¹¹Zdžan droméstyr, udžan droméstyr, zalen amaré jakhéndyr Sventoné-Izrailjoskire Devlés.”

¹²Paldavá adiáke rakiréla Svénto Izrailjoskiro Devél: “Kóli tumé na priléna ke godý davá lav, a isyn tumarí nadiéia pe xohaibén i načačipén, so davá tumen podrikiréla,

¹³to tén'či davá grého javéla vaš tuménge, syr rosphagirdy vánta, saví phadjola, kóli na užakiréna.

¹⁴Jov rosphagirela la, syr rozmarena khoró, rozmarena i na tanginena te rozmaren adiáke, so na jačélape koteroro, so butýr na lésa, vangar jagatyr ci paní ganyngatyr.”

¹⁵Adiáke rakiréla Raj Devél, Devél Svénto Izrailjoskiro: “Kóli b tumé jačnépe pe jekh štéto, tén'či by tumé zrakhnepe; štylypen i nadiéia isyn zor tumarí, ne tumé na zakamle.

¹⁶I rakirénas: “Nad, ame pe grénde našasa”, — pal davá i našéna”, “Našasa pe lačhé grénde”, — paldavá potradenape pal tuménde sýges.

¹⁷Jekhe manušéstyr, darátyr našela tysjonco, pandžé manušéndyr našéna adiáke, so jačaibén tumaró javéla syr destó pe vučí bérga, syr maribnýtko špéra pe bérgica.

¹⁸Paldavá Raj Devél iščo (inké) ničí na keréla (užakiréla), sob (kaj) Jov te potanginel tumen, užakiréla, sob (kaj) te tanginél tumen; Raj Devél isyn Devél čačipnáskiro; bahtalé saré, konéste isyn nadiéia pe Léste!

¹⁹Narodo javéla te dživél pe Sióno ke Jerusalimo, tu but na javésa te roves, — Jov potanginela (požalinela) tut, kóli tu zagodlesa, Jov šunéla tyrí zan i otphenéla túke.

²⁰I déla tuménge Raj Devél maró dre bibáht i paní dre bída; tyré sykliaibnarja na javéna te garavenpe i jakhá tyré javéna len te dykhén.

²¹I kaná tyré šunéna lav, savó rakiréla palál túte: “Ake, isyn drom, džán pir léste”; kóli tu zdžasa droméstyr pe čačí (pravo) rig ci pe zérvo (liévo) rig.

²²Tén'ci tumé ĥaljona, so nálačho isyn idolengiro ukedyiben tyré rupéstyr i tyré suvnakástyr; tu čhurdesa péskire ídoly, syr magiripén, i phenésa lénge: “Džán krig adathýr.”

²³I Jov déla túke bryšýnd, kóli zasieinesa félda i maró, savó janéla phuv syr barjakirdó (plódo), lačhó maró déla túke; tyré guruva léna te čaravenpe dro dová dyvés pe lačhé féldy.

²⁴Guruva i grajo, savé keréna butý pe félda, léna te xan londo xabén, xabén žužakirdo i pirivieindlo ĥandladiasa (lopatasa).

²⁵I pe kažno bérga, pe kažno bérgica thadéla paní, davá javéla dre baró maribnýtko dyvés, kóli vučé kherá peréna.

²⁶Čhon javéla te xačol syr kham, a khamitko jag javéla dre eftá móly jasnedyr (zoraledýr); saró davá javéla dro dová dyvés, kóli obphandela Raj Devél dukhano štéto léskire narodoskiro, vysastiakirela léskire dukhá.

²⁷Ake, lav Ráskire-Devléskiro džála durál, xačola Léskiri xolý, xačola zoralés; uštá Léskire pherdé xoliása, čib Léskiri syr jag, saví saró shala.

²⁸Léskiro phurdypen — syr paní, savó iščo (inké) ke men ĥazdélape, sob (kaj) te rozphurdel narody sarésa; dre léngiro muj javéla savari, so lydžála ke xohaibén (bléndo).

²⁹A ke tumé javéna giliá syr ratiákiro pe svénto svénko, i javéla radypnytko (lošalo) / te radynélpe iló syr odoléste, kon bašavela i ĥazdélape pe bérga Ráskire-Devléskiri svirol'kasa, ke zoralypén Izrailjoskiro.

³⁰I déla Raj Devél, sob (kaj) te šunén bari zan Léskiri i sykavéla vast Péskiro, savó zmekelpe dre zoralý xolý, dre jag, saví saró shala, dre xoliami balvál, dro paní, savó ĥazdelpe pe phuv, dro bryšýnd barénca.

³¹Ráskire-Devléskire zaniatyr izdrala Asuro, savés marena destesa.

³²I pekavela les davá destó, destó, savó Raj Devél vylydžala pe léste bubnenca i arfenca; i Jov javéla pe Léste baré maribnása.

³³Pal-dová so Tofieto ĥará kerdó; jov sys kerdó vaš kralíske, jov isyn xor i buglo; dre jag léskiri but kaštá čhudé; phurdypen Ráskire-Devléskiro les zahačkirela les syr xačkirdy siéra (dzevélia).