Read Biblija - Pe Baltitko Romani čib (Romanes) 2019 Baltic Romani Bible Isajos 32 Bible Online

Isajos 32 - Biblija - Pe Baltitko Romani čib (Romanes) 2019 Baltic Romani Bible bible

Isajos 32

¹Ake, králi javéla te kralinél pir čačipén i thagárja (kniázi) javéna te xulainen pir zakóno.

²Kažno léndyr javéla syr zrakhibén balvaliatyr, syr zrakhibén bryšyndestyr, syr paní pe šukí (čhučí) phuv, syr bérga, saví zakerela khamestyr čhučí phuv.

³I jakhá odolengire, kon dykhéla, na zakernape, i kaná odolengire, kon šunéla, javéna te šunén.

⁴Iló odolengiro, kon ni palsó na duminéla, priléla godý; bičibakire (kon fujes rakiréla) léna te rakirén jasnes.

⁵Odoléske, kon ničí na džinéla na déna butýr patýv, pal xohaibnariste [zahaleste-r.s.] na phenéna, so jov keréla pir čačipén.

⁶Pal-dová so buro manúš (nieviežda), rakiréla dylnypén, léskiro iló duminéla pal čoripén, sob (kaj) te kerél xohaibnasa, te kaliakirel Ras-Devlés, te lel maró bokhalestyr i pibén manušéstyr, savó kaméla paní.

⁷Frento (xoliamó) manúš keréla xasibnýtka réndy: jov duminéla, pal fuipén, sob (kaj) te xasiakirél čorores xohané lavénca i tedy, kóli čororó keréla pir čačipén.

⁸A patyvalo manúš duminéla pal patýv; jov tvardes terdó dro čačipén.

⁹Džuvliale (manušniale) balvalitka! Uštén, šunén kutý (nábut) mirí zan! Čhajale, savé ni palsó na duminéna! Šunén miré lavá!

¹⁰Iščo vari-kicý dyvesá butýr beršestyr i jačéna te darén, balvalitka (birakhibnaskire)! Pal-dová so na javéna te skedén vinagrado, na javéna te keden maró.

¹¹Darén, balvalitka (birakhibnaskire), darén odolé, kon ni palsó na duminéla (narakhibnytka)! Zlen ídia, rozur'jenpe, obphanden péskire masá pe trušúl.

¹²Dro kolýn javéna pes te marén pal lačhé féldy, pal lačhí rand' vinagradoskiri.

¹³Pe miré-narodoskiri phuv javéla te barjol phusady čar i xrústy suv'jenca, syr i pe saré radymakire kherá dro fóro, savó radynélape.

¹⁴Rajkane kherá (xaromy) jačkirena, fóro, savó šuminela, jov čhurdynó javéla. Ofielo i vučardý (bašnia) javéna štetosa, kaj garavenape osly (miegárja) i stády, savé čaravenape.

¹⁵Ke dová dyvés, kóli čhuvélape pe aménde Dúho (Fáno) upralestyr i čhučí phuv pirikerlape dre únta (sado), a únta (sado) na javéna te prilén (te ginen) pal veš.

¹⁶Tén'ci séndo javéla te rikirél zor pe kadaja čhučí phuv, i čačunó séndo javéla te dživél pe lačhí félda.

¹⁷I javéla ramánjo (miro) kažnoné čačipnaskire rendostyr, a čačunó séndo janéla štylypen, i na javéna te darén nikonestyr dre saré dyvesá (viéki).

¹⁸Tén'ci miro narodo javéla te dživél pe štéto, kaj isyn ramánjo (miro), pe štéto, kaj na daréna, pe bahtalé štéty, kaj otkhinjona.

¹⁹Na dykhí, so grado peréla pe veš, fóro pe dólo telé zmekelape.

²⁰Bahtalé isyn tumé, kon sieinela pašo paní, i kon bičhavéla odorík guruvés i oslós.