Read Biblija - Pe Baltitko Romani čib (Romanes) 2019 Baltic Romani Bible Isajos 33 Bible Online

Isajos 33 - Biblija - Pe Baltitko Romani čib (Romanes) 2019 Baltic Romani Bible bible

Isajos 33

¹Bida túke odová, kon isyn mižeh čor, konéstyr na otlenas, i čor, konéstyr na čorenas! Kóli občoresa saró [mekesa te čores-r.s.], tútyr otlena, kóli pirijačesa te čores, tútyr čorena.

²Rajo Dévla! Zrákh amen! Pe Túte isyn amarí nadiéia. Jav tasiárles (ránes) amaré vastésa, amaré zrakhibnasa dro pharó časo.

³Tyré darane zaniatyr našéna narody, kóli uštesa, rosprastanape kherítka ródy (pliémi).

⁴I javéna te keden tumaró doresybén, syr kirmo skedéla, čhurdenape pe léste, syr phakitka skočki (saranča) čhurdenape.

⁵Baró isyn Raj Devél, savó dre vučipén dživéla; Jov pherdiakirela Sióno sendosa i čačipnása.

⁶I javéla časo, kóli na javéna te darén nikonestyr, kóli javéla baró zrakhibén, godý i džinybén, a dar Devléskiri javéla tyré kučipnasa.

⁷Ake, léngire zoralé muršá godlena pe vulícy (gásy); bičhadé vaš ramánjo (miro) rovena kirke jasvénca.

⁸Nane nikonés pe dromá, nikón odój na tradéla; jov otgijá dorakiribnastyr, rosphagirdiá fórja, jov nikonés na ginéla pal manušénde (ni dro so čhuvéla manušén).

⁹Phuv sýrby tuginela, šutjola. Liváno ladžakirdó, zašutija, Sarono jaciá syr čhučí phuv, Vasáno i Karmilo sčhurdyne péskire patria (listy).

¹⁰“Akaná Me ĥazdavape, — rakiréla Raj Devél, — “Me ĥazdavape akaná.

¹¹Tumé san pharé khasesa, tumé bijanena phus; tumaró phurdypen-jag,[4] saví tumen shala.

¹²I javéna narody syr xačkirdy zvjoska, syr phusady čar, saví sčhindle; i javéna zhačkirde jagása.

¹³Šunén, duratuné, so Me keráva, i tumé, pašatuné, galjon Miro zoralypén.”

¹⁴Piridarandyne (strahádyne) grehítka manušá pe Sióno, daréna i izdrana bidevlytkarja! “Kon améndyr vydživela paš jag, saví saró pohala, kon vydživela paš jag, saví xačola viéčnes?”

¹⁵Odová, kon psiréla dro čačipén i rakiréla čačunó lav, kon na kaméla te otlel péskire pšalestyr, kon obrikirela péskire vastá, sob (kaj) te na lel myto (dáro) manušéndyr pal nalačhé réndy, kon zakerela péskire kaná, sob (kaj) te na šunél, syr rat čhuvélape, i zakerela péskire jakhá, sob (kaj) te na dykhél, syr kerélape fuipén.

¹⁶Odová zadživela pe vučipén; garadjola pe bérgi, karik nikón na ĥazdélape; maró léske délape, paní léste na pirijačéla te thadel.

¹⁷Tyré jakhá dykhéna Kralís dro Léskiro gožypen, jone javéna te dykhén duratuny phuv.

¹⁸Iló javéla te priripirel jekh pal dar, saví butýr na dykhésa: “Kaj odová, savó piriginelas manušén dre lylvarí? Kaj isyn odová, savó važynela pritasady (dan')? Kaj isyn odová, savó vučardia (bašni) obdykhelas?”

¹⁹Na dykhésa butýr xoliamó narodo, narodo, čib konéskiri tu na ĥaljosa, i na rozlesa.

²⁰Podykh pe Sióno, fóro, kaj prodžála amaró svenkitko skedyibén; tyré jakhá javéna te dykhén Jerusalimo, štéto, kaj nane maribén, šátra, saví na peréla, beranda lákire nikoli na rosphadjona, i ni jekh šylo na čhinelape [na roskušelape-r.s.].

²¹Odój javéla ke ame baró Raj Devél syr réki (leniá), syr paní: odorík na zatradela ni jekh bari párma (korabljo).

²²Pal-dová so Raj Devél isyn amaró Sendári, Raj Devél déla aménge Zakóno, Raj Devél isyn amaró Králi, Jov zrakhéla amen.

²³Rosphandenape tyré šyle, Asuro, na vyrikirna mačty. Tén'ci javéna te roskeren doresybén, i langale džána te čoren.

²⁴I nikón manušéndyr, savé odój dživéna, na phenéla: “Me som nasvaló”, — manušénge, savé odój dživéna, otmekenape saré gréhi.