Read Biblija - Pe Baltitko Romani čib (Romanes) 2019 Baltic Romani Bible Isajos 34 Bible Online

Isajos 34 - Biblija - Pe Baltitko Romani čib (Romanes) 2019 Baltic Romani Bible bible

Isajos 34

¹Javén, narody! Šunén i prilén, kherítka ródy (pliémi)! Mek te šunél phuv i saró, so isyn pe láte, baró svéto (lot) i saró, so bijandjola dre léste!

²Xolý Ráskire-Devléskiri ĥazdyjápe pe saré narody, pe saré léngire xaladybena (xaladénde). Jov sovlahadiá pal lénde, otdyjá len pe xasibén.

³Léngire zamardé manušá javéna rosčhurdyne, i zakhandena léngire trúpy, bérgi javéna kindle léngire ratestyr.

⁴Hasjola bolybnytko xaladybén (bolybnýtka xaladé), i bolybén zakerelape (phandelape), syr lylvarí; čergeniá peréna, syr patrín (listo) vinagradoskire randiatyr, syr šukí patrín smokovnytkone kaštéstyr.

⁵Skedyny isyn pe bolybén Mirí kurtála, ake, vaš séndo zmekelpe joj pe Jedomo, i pe narodo, konés Me otdyjom prokošybnaske.

⁶Kurtála Ráskire-Devléskiri pherdjola ratésa, thuljola bakreskire i buzneskire ratestyr, bakreskire thulypnastyr, pal-dová so svénto dyibén (žértva) isyn ke Raj Devél dre Vosoro, baró zamariben isyn pe Jedomoskiri phuv.

⁷Guruva peréna lénca, i guruvore khetané guruvenca; čaliakirelape (paniakirelape) phuv léngire ratésa; práho čaljola léngire thulypnasa.

⁸Javdiá dyvés, kóli othala (otdéla) pale Raj Devél, kóli phučelape Jov pal Sióno.

⁹Réki léskire syr smola jačéna, práho léskiro jačéla dzeveliasa (sierasa) i javéla phuv léskiri syr xačkirdy smola.

¹⁰Na pirijačena te xačon ni dyvesé, ni ratý; viéčnes javéla te ĥazdelpe (te džal) thuv látyr, javéla phuv čhučé phuvjása saró časo, nikón odój na prodžála nikoli.

¹¹Čirikliá odój javéna te dživén xulanca, filino i korako javéna te dživén pe doiá phuv i protyrdena pir láte xasibnaskiro šylo i xasiakiribnytko otvieso (urovnjo).

¹²Na jačélape pe láte nikonés lačhé-rodoskire manušéndyr, konés kharéna, sob (kaj) te javén jone kral'jenca saré thagárja (kniázi) lákire javéna syr čhučó štéto.

¹³Lákire baré felatiniá / kolova (dvorcy), lákire tvárdymi (krieposti) zabarjona phusadé čar'jenca; javéla phuv štetosa, kaj šakaly javéna te dživén i javéla gredasa (dvorosa) vaš strausenge.

¹⁴Riskiribnáskire murdalá (zvieri), so dživéna pe šukí phuv, javéna te dykhenpe vešytkone mycenca; odój benga javéna te godlen, sozdyiben (sykaibén) ratítko odój javéla te otkhinjol, poperla péske štéto.

¹⁵Sap phakenca (krylenca) odój javéla te dživél, dre gniázda (kúfo) javéla te barjakirel péskire tyknydoren, javéla te skedel len ke pe tel phaká, i odój skedénape kaĥniale (koršuny).

¹⁶Poroden dre Ráskire-Devléskiri lylvarí i proginen. Saró davá javéla, ničí na otparuvelape i nijékh na paruvelape javiresa, pal-dová so uštá Léskire priphendle i dúho (fáno) Léskiro len skedéla.

¹⁷Jov Kokoró vykedyjá len pir žrebijo, Jov rozdyja lénge daja phuv pir mierakiri miéža; jone zalena la i javéna te dživén odój viéčnes.