Read Biblija - Pe Baltitko Romani čib (Romanes) 2019 Baltic Romani Bible Isajos 35 Bible Online

Isajos 35 - Biblija - Pe Baltitko Romani čib (Romanes) 2019 Baltic Romani Bible bible

Isajos 35

¹Obradynelape čhučí phuv, i phuv šukí, i obradynelape rig, kaj nikón na dživéla, i rozmekelape (rozcvetinela), syr luludí (cveto) narcyso.

²I javéla phuv gožes te rozmekelpe i te radynélpe, javéla radymása i godlenca baripén Livanoskiro láke délape, Karmiloskiro i Saronoskiro barikanypen; jone javéna te dykhén Ráskire-Devléskiro, amaré Devléskiro baripén.

³Ĥazden zorjása vastá, savé obmeknepe, mek te na izdran tumaré čangá!

⁴Phenén odolénge, kon daréla ilésa: “Javén zoralé, na darén! Ake, isyn tumaró Devél, Jov othala (otdéla) pale, Devél sphučela. Jov javéla i zrakhéla tumen.”

⁵Tén'ci otkernape jakhá kororengire i kaná kašukengire javéna te šunén.

⁶Tén'ci langalo syr olienjo javéla te uhtel, bičibakiro (niemo) zabagala, pal-dová, so promarlape paní pe čhučí phuv i pe mal (stiep) promarnape sygna rekicy.

⁷Odój, kaj na sys paní, ziero (oziero) javéla; dre phuv šukí but paní skedelape; pe štéto, kaj šakaly dživénas, javéna vučé čarjá i sil (kamyšo) te barjon.

⁸I javéla odój baró drom, jov javéla te kharelpe sventoné dromésa. Nažužo odój na javéla te psirél, javéla davá drom féni (tóka) vaš odolénge, kon patiála, i kon na džinéla nisó; nikón léndyr dalé droméstyr na zmarlape.

⁹I ščer (liévo) na javéla odój, i januro (xiščno murdál) na zadžála odorík, les na lathéna odój, a zrakhné manušá javéna te psirén.

¹⁰I risjona odolé, konés zrakhéla Raj Devél i javéla pe Sióno radymakire godlása; rádyma javéla lénca saró časo (cýro); i loš (viesielijo) jone lathéna, a bibáht bidasa léndyr otdžala.