Read Biblija - Pe Baltitko Romani čib (Romanes) 2019 Baltic Romani Bible Isajos 36 Bible Online

Isajos 36 - Biblija - Pe Baltitko Romani čib (Romanes) 2019 Baltic Romani Bible bible

Isajos 36

¹I sys davá pe dešuštarto berš, kóli dživelas králi o Jezekíia. Gijá o Sienahirimo, králi Asirijákiro pe saré zoralé Judejákire fórja i lyjá len.

²I bičhadiá Asirijákiro králi Lahisostyr dro Jerusalimo ke králi Jezekíia, Rabsakos xaladenca; jov terdijá odój, kaj thadelas paní paniprolydžaibnytkonestyr upratune venderinjatyr (prudostyr), pe drom pašýl félda, kaj parniakirenas pohtana.

³I vygijá ke jov Jeliakimo, Xielkijaskiro čhavó, phurydyro pe kralítko kher, i Sievna, čhinybnari, i Ioaho, Asafoskiro čhavó, kanceliari (savó začhinelas saró, so kerdiápe).

⁴I phendiá lénge Rabsako: “Phenén Jezekijaske: adiáke rakiréla baró králi, králi Asirijákiro: ‘Saví nadiéia isyn túte, i konéstyr tu užakiresa lačhipén?

⁵Me duminava, so davá isyn čhučé lavá, a vaš maribén trej godý i zor, pe konéste isyn tyrí nadiéia, so tu otgijan mándyr?

⁶Ake, tu duminesa, so tut podrikirla Jegípto, phagirdó destó, kóli léla les vari-kon dro vast, jov vast phusavela. Adasavó isyn faraóno, králi Jegiptóskiro vaš odolénge, konés jov podrikiréla, i kon čhuvéla nadiéia pe léste.

⁷A kóli tu phenésa mánge: “Pe Raste-Devléste isyn amarí nadiéia”, — Ci nane odová devel, koneskire vučé štéty i altári otparudia Jezekíia i phendiá Judejake i Jerusalimoske: “Mangénpe angíl jekh davá altárjo, angíl javír na mangénpe?”

⁸Dorakirpe miré rása, Asirijákire kralísa, me dáva túke duj tysiency gren, ci doresesa tu adákicy manušén, sob (kaj) te bešén pe lénde?

⁹I tu kamésa, sob (kaj) te otdžal barydyró, jekh tykné pishar'jendyr Miré xulaskiren, kóli túte isyn nadiéia pe jekh Jegípto, pe léskire grénde i maribnýtka vurdená?

¹⁰Tu duminesa, so na sys Devléskiri vólia te džav mánge pe daja phuv, sob (kaj) te xasiakiráv i občorav la? Raj Devél phendiá mánge: “Džá pe daja phuv i občor ke xasibén (xasiakir) la.’”

¹¹I phendiá Jeliakimo, i Sievna i Ioaho Rabsakoske: “Rákir tyré pishar'jénge pir aramieitko (siriitko) čib, ame ĥaljovasa daja čib, a pir judýtko čib aménca na rákir, pal-dová so manušá šunéna, savé skedynépe pe vánta.

¹²I phendiá Rabsako: “Ci man bičhadé jekh/ féni (tóka) ke tu i ke tyró raj, sob (kaj) te phenáv dalé lavá? Nad, me som bičhadó i ke manušá, savé isyn bešté pe vánta, sob (kaj) jone te prilén ladžaipén i magiripén khetané tuménca.”

¹³I uštyjá Rabsako i phendiá zoralé zaniása pir judýtko čib: “Šunén lav baré-kralískiro, Asirijákire kralískiro lav!

¹⁴Adiáke rakiréla králi: ‘Mek te na xohavél tumen o Jezekíia, pal-dová so jov tumen na zrakhéla.’

¹⁵Mek te na podrikirél tumen Jezekíia Rása-Devlésa, kóli jov rakiréla: ‘Zrakhéla amen Raj Devél, na otdena davá fóro dre Asirijákire-kralískire vastá.’

¹⁶Na šunén Jeziekijas, pal-dová so adiáke rakiréla Asirijákiro králi: “Javéna bahtalé tumé mánca dro ramánjo (miro), vydžán ke me i, mek kažno manúš tuméndyr te xal péskire vinagradoskire kaštéstyr i smokovnytkone kaštéstyr, mek kažno te p'jel paní péskire ĥanyngatyr.

¹⁷A tén'či me javáva i lavá tumen pe dasaví phuv, saví zdžála (poddžála) pe phuv tumarí, pe phuv, kaj isyn maró i mol (vino), kaj barjola vinagrado (drakh) i javír barjakirdé (plódy).

¹⁸Mek te na xohavél tumen Jezekíia, kóli rakiréla: ‘Raj Devél amen zrakhéla.’ Ci zrakhné javire-narodoskire develá péskiri phuv Asirijákire-kralískire vastéstyr?

¹⁹Kaj isyn Jemafoskire i Ariadoskire develá? Kaj isyn develá Sieparvaimoskire? Ci zrakhné jone Samárija miré vastéstyr?

²⁰Kon saré dalé devlorendyr zrakhciá péskiri phuv miré vastéstyr? I tumé duminéna, so Raj Devél zrakhéla mándyr Jerusalimo?”

²¹Ne jone ničí na phendlé léske, pal-dová so králi priphendiá: “Niči léske na rakirén.”

²²I javné Jeliakimo čhavó Xielkijaskiro, phurydyro pe kralítko felatin i Sievna, čhinybnari, Ioaho, čhavó Asafoskiro, kanceliari, (savó začhinelas saró, so kerdiápe) ke Jezekíia dre rozriskirde ídi i piriphendle léske Rabsakoskire lavá.