Read Biblija - Pe Baltitko Romani čib (Romanes) 2019 Baltic Romani Bible Isajos 37 Bible Online

Isajos 37 - Biblija - Pe Baltitko Romani čib (Romanes) 2019 Baltic Romani Bible bible

Isajos 37

¹Kóli šundiá davá králi o Jezekíia, to roskuscia péskire ídi, uridiape dro balytko gonó praskasa i gijá dro Kher (Khangirí) Ráskire-Devléskiro.

²I bičhadiá Jeliakimos, phurydyres pe kralítko kher i Sievnas, čhinybnaris i phuredyršone rašán, uriden, dre roskušne ídi syr dre bibáht ke proróko Isajo, čhavó Amososkiro.

³I jone phendlé léske: “Adiáke rakiréla Jezekíia: ‘Bibahtaló isyn dyvés, dyvés, kóli javné bída, kára i ladžaipén, sýrby, kiéli čhavoré kaména te vydžán dákire ločoviátyr, ne nane zor date te bijanél.

⁴Mek te šunél tyró Raj Devél lavá Rabsakostyr, konés bičhadiá králi Asirijákiro, xuláj léskiro, sob (kaj) jov (Rabsako) te kaliakirel džidé Devlés, sob (kaj) te košel Les lavénca, savé šundiá tyró Raj Devél, pomangpe pal manušénde, savé jačnépe, savé iščo (inké) džidé.’”

⁵I javné kralískire-Jezekijaskire dynárja ke Isajo.

⁶I phendiá lénge Isajo: “Adiáke phenén tumaré xuláske: ‘Phendia Raj Devél: ‘Na dar lavéndyr, savé tu šundián, savénca košenas Man Asirijákire kralískire dynárja.

⁷Ake, Me bičhaváva dre léste dúho (fáno), so jov šunéla lav i risjola pe péskiri phuv i Me domarava les odój kurtalása.’”

⁸I risijá Rabsako, i dykhciá, so Asirijákiro králi marelape Livnasa, pal-dová so odová otgijá Lahisostyr.

⁹I šundiá jov pal Tirgakoste, Jefiopijakire kralíste. Léske phendlé: “Ake, jov gijá te marélpe túsa.” Syr jov šundiá davá, to jov bičhadiá ke Jezekíia i phendiá:

¹⁰“Adiáke phenén Jezekijaske, Judejákire kralíske: ‘Mek te na xohavél tut tyró Devél, pe Konéste isyn Tyrí nadiéia, kóli tu duminesa’: ‘Na otdena Jerusalimo dre Asirijákire-kralískire vastá.’

¹¹Ake, tu šundián, so kerdé králja Asirijákire saré phuv'jenca, kóli čhudé pe lénde sovlahaibnytko lav; i tu dumenesa, so tu zrakhesape?

¹²Ci zrakhné devloré odolé narodengire, savén občorde ke xasibén Miré dadá? Ci zrakhné Gozano i Xarano, i Riecefo i Jedienoskire čhavén, savé isyn dro Falasaro?

¹³Kaj isyn Jemafoskiro králi i králi Arpadoskiro, králi foróstyr Sieparvaimostyr, Jenatyr i Ivatyr?”

¹⁴I lyjá Jezekíia lyl bičhadé-manušéngire vastéstyr i gindia les i gijá dro Kher Ráskire-Devléskiro , i otkerdia (psiradia) les Jezekíia angíl Raste-Devléste.

¹⁵I mangelaspe Jezekíia angíl Raste-Devléste i rakirélas:

¹⁶“Rajo Dévla, bolybnáskire-jangoléngiro, Devél Izrailjoskiro, Savó isyn beštó pe xieruvimy! Tu san jekh Devél pe saré phuvitka kralipená, Tu sozdyjan phuv i bolybén.

¹⁷Odker, Rajo Dévla, Tyró kan i pošun, odker, Rajo-Dévla, Tyré jakhá i podykh, vyšún lavá Sienahirimoskire, savó bičhadiá, sob (kaj) te kaliakiren Tut, Džidé Devlés.

¹⁸Čačó, Rajo Dévla! Králja Asirijákire občorde ke xasibén saré rigá i léngire phuvjá.

¹⁹I čhurdyné dre jag léngire devloré, ne dalé sys na develá, a butý, saví kerdé vastá manušéskire, kašt i bar, paldavá xasiakirdé len.

²⁰A akaná, amaró Rajo Dévla, Devél amaró, zrákh amen léskire vastéstyr, te džinén saré kralipená pe phuv, so Tu, Rajo Dévla, isyn jekh Devél.”

²¹I bičhadiá Isajo, Amososkiro čhavó, ke Jezekíia, sob (kaj) te phenén: “Adiáke rakirél Raj Devél, Devél Izrailjoskiro: ‘Tu mangdianpe Mánge proti Sienahirimoste, Asirijákire kralíste.’

²²Ake, isyn lav, savó Raj Devél phendiá pal léste: ‘Na podykhela pe túte, javéla te salpe tútyr patyvalý čhaj, terný čhaj Sionóskiri, pokrencynela šerésa, kóli tut dykhéla čhaj Jerusalimóskiri.’

²³Konés tu košesas i kaliakiresas? Pe konéste godlesas i pe konéste ĥazdyjan tyré jakhá adiáke vučés? Pe Sventoné Izrailjoskire Devléste.

²⁴Tyré pishar'jénca tu kaliakiresas Ras-Devlés i phendián: ‘Miré vurdenenca, savé but isyn, me ĥazdyjompe pe vučé bérgi, pe rig Livanoskiri i phagirdjom léske baré kiedry, léskire lačhé kiparisy, javdjom pe léskiro vučipén, dre léskiri únta (sado).

²⁵Me ĥanavavas i paní pjavas, i vyšut'kirava miré ĥerénca saré réki (leniá) dro Jegípto.’

²⁶Ci tu na šundián, so Me ĥará kerdjom davá, dre ĥaratuné dyvesá priphendjom pal dová, a akaná kerdjom, pal-dová so tu phagiresas zoralé fórja ke xasibén i jekh bará léndyr jačkiresa?

²⁷Manušá, savé odój dživéna, xasiakirdé péskiri zor, izdran, prilén ladžaipén, jone kerdépe, syr čar pe félda, syr zeleny kovly čar, syr čar, so pe kher barjola, syr shačkirdo maró angíl dová, syr jov gijá dre kolosy.

²⁸Bešesa tu, ci vydžasa, ci zadžasa, me saró džinava, džinava i dová, syr tu ĥazdyjanpe proti Mánde.

²⁹Pal-dová so tu pe Mánde ĥazdyjanpe xoliamipnasa, pal-dová so tumé šundlé Miré kaná, syr tu phutjosa, Me čhuváva Mirí angrusty dro Tyró nakh i Miro savari dro Tyró muj i riskiráva tut pale dolé dromésa, savésa tu javdián.

³⁰Ake, túke, Jezekíia, ĥiertýk (znamiénijo): Xan dro davá berš maró, savó vybarija ziarkatyr, so pyjá pe phuv, pe javír berš xan maró, savó kokoró péstyr vybarija, a pe tríto berš barjakirén maró, barjakirén vinagradýtko únta (sado) i xan léndyr.

³¹Jačaibén, savó isyn dro Judáskiro kher, zrakhciape i vybarjola telé, i janéla barjakirdó (plódo) uprál.

³²Pal-dová so Jerusalimóstyr vydžála jačaibén, a zrakhibén javéla bergátyr Sionóstyr. Raj Devél keréla adiáke léskire zevlynypnastyr (rievnostiatyr).

³³Adiáke rakiréla Raj Devél pal kralíste Asirijakireste: “Na zadžála jov dre davá fóro, na ĥazdénape pe léste maribnýtka bustiá (striély), jov na džála angíl ščytosa, jov na ĥazdéla (na čhuvéla) phuvjátyr valo.

³⁴Risjola pale dolé dromésa, pir savó javdiá, a dre davá fóro jov na zadžála’, — rakiréla Raj Devél.

³⁵‘Me zrakháva davá fóro, zrakháva les vaš Péske i vaš Davidóske, Miré pisharíske.”

³⁶I vygijá Jangólo Devléskiro i zamardiá dro Asirijákire-xaladéngiro stáno šel ohtodešá pandž tysjoncy manušén. Uštyné pe sámo zlóko (zoria) i, ake, — saré manušá isyn mulé.

³⁷I otgijá, i gijá, i risijá Sienahirimo, Asirijákiro králi i dživdiá ke Ninievija.

³⁸I kóli jov mangelaspe dro Nisrohoskiro, péskire-Devléskiro Kher, Adramielieho i Šariecero, léskire čhavé, zamardé les kurtalása, a kokoré našné pe phuv Araratoskiri. I jaciá kralísa Asardano, léskiro čhavó, pe léskiro štéto.