Read Biblija - Pe Baltitko Romani čib (Romanes) 2019 Baltic Romani Bible Isajos 40 Bible Online

Isajos 40 - Biblija - Pe Baltitko Romani čib (Romanes) 2019 Baltic Romani Bible bible

Isajos 40

¹“Podrikiren, podrikiren dúho (fáno) dro Miro narodo,” — rakiréla tumaró Devél.

²Rakirén ke Jerusalimoskiro iló, phenén léske, so pirijaciá léskiro maribén, so na otdelape pale léske pal grého, pal-dová so jov prilyjá Ráskire-Devléskire vastéstyr pal saré gréhi dre duj móly butýr, syr treindiá.

³Zan, saví godlela pe čhučí phuv: “Kerén drom Ráske-Devléske, kerén pe mal (stiep) mamúj dromá vaš amaré Devléske.

⁴Kažno dólo mek te pherdjol, kažno bérga i bérgica mek te perén, dová, so isyn bangó, te jačél roŭno (vórto), i bangé dromá te kerenpe gladkone droménca.

⁵I sykadjola Ráskire-Devléskiro baripén, i kažno loč' (plot') dykhéla zrakhibén Ráskire-Devléskiro, pal-dová, so adiáke phendlé Ráskire-Devléskire uštá.”

⁶Zan rakiréla: “Phen!” “Ne so mánge te phenáv?” “Kažno loč (plot') — čar, a gožypen lákiro — syr luludí (cveto) feldytko.

⁷Čar zašutjola, luludí (cveto) zašutjola, a kóli phurdela pe léste Raj-Devél, adiáke i narodo — jov isyn čar.

⁸Čar zašutjola, luludí zašutjola, a lav amaré Ráskire-Devléskiro jačélape viéčnes.”

⁹Džá pe vučí bérga, Sióno, savó mištó phenéla Devléskiro lav! Ĥazde zorjása zan tyrí, Jerusalimo, savó rakiréla lav Devléskiro! Ĥazde zan, na dar! Phen ke fórja Judáskire: “Ake, isyn tumaró Devél!”

¹⁰Ake, Raj Devél, Devél javéla zorjása i Léskiro vast isyn zorjása. Ake, mazúri (nagrada) Léskiri isyn Lésa, Jov otdéla pale sarénge angíl Péskiro muj.

¹¹Syr čhupnári Jov rakhéla Péskire bakrén; a bakrorén léla Jov pe vastá i javéla te lydžál pe Péskiro kolýn, i savé déna thud te lydžál.

¹²Kon vyčhudiá paní péskire vastésa, vygindiá bolybén i práho phuvjákiro, zvažyndia pe ubladýtka (viesy) bérgi i bérgicy pe ubladýtka čaré?

¹³Kon ĥalyjá dúho (fáno) Ráskire-Devléskiro, kon podphenelas Léske i sykliakirelas Les?

¹⁴Konéstyr mangéla Jov godypén (sovieto), i kon déla godý Léske, čhuvéla Les po drom čačunó, kon déla Léske džinybén i sykavéla drom, kaj isyn godý.

¹⁵Ake, narody — syr čolynia (kapli) paní vedratyr i ginenape syr práho pe ubladýtka (viesy). Ake, ostrovy (phuvjá maškír mórjo (derjáv)), Jov ĥazdéla syr práho.

¹⁶Na uhtýlla (nádosi) Livanos, sob (kaj) te kerél jag vaš svénto dyibén, na uhtýlla (nádosi) murdalén pe léste, sob (kaj) te janel dyibená vaš célo shačkiribén.

¹⁷Saré narody, syr nisó isyn angíl Léste, syr ničí, syr čhučó štéto Léste ginenpe.

¹⁸Pe konéste zdžála (podžala) Devél, so tumé phenéna? I so pe Léste zdžála (podžala)?

¹⁹Spieco te vyčhinel keréla idolo, suvnakunari učhakiréla les suvnakása, prikerela ke jov rupove zandirorja (cepočki).

²⁰A kon isyn čororó, odová vykedéla kašt, savó na kirnjola, rodéla sykliakirdé manušés-spiecos te vyčhinel gožes, sob (kaj) te kerél idolo, savó b tvardes te terdjol.

²¹Ci tumé na džinéna? Ci tumé na šundlé? Ci na rakirénas tuménge angledýr saréstyr, ci na ĥalyné tumé phuvjákire sozdyibnastyr?

²²Jov isyn Odová, Kon bešéla uprál pe krenglypen phuvjákiro i pe manušénde, savé pe phuv dživéna, i, savé isyn syr kirme angíl Léste. Jov protyrdyjá bolybén, syr sano pohtan, čhudiá len syr šátra.

²³Dro nisó Jov pirikerela thagar'jen (kniaz'jen), syr vari-so čhučó keréla jov phuvjákire sendar'jen.

²⁴Ake, jone naĥara čhudé, naĥara barjakirdé, naĥara dre phuv pridživdepe, ne syr Jov phurdyja pe lénde, i jone vyšutine, i balvál lydžijá len krig, syr phus.

²⁵So ž tumé phenéna pal Mánde, pe konéste Me zdžava (podžava)? Konesa tumé priroŭninena (priparuvena) Man,” — rakiréla Svénto.

²⁶Ĥazden tumaré jakhá ke vučó bolybén i podykhen? Kon les sozdyjá? Kon vylydžala Péskire čergeniá i ginéla len? Saré čergeniá Jov kharéla pir lav, ničí na xasjola Léste, pal-dová so isyn léste bari zor i zoralypén.

²⁷Sóske ž tu rakirésa, Jakovo, sóske tu vyphenesa, Izrailjo: “Ĥarado isyn miro drom Rástyr-Devléstyr, bistyrdo isyn miro réndo Miré Devléste”?

²⁸Ci tu na džinésa, ci tu na šundián, so viéčno isyn Raj Devél, Savó sozdyjá phuv, nikoli na khinjola, i na našavela zor, ne tu na ĥaljosa Léskiri godý.

²⁹Kon khinyja — odoléske Jov déla zor, i kon isyn bizorjákiro — odolés Jov podrikiréla.

³⁰I terné čhavé khinjona, xasiakirena zor, i terné manušá peréna.

³¹A odová, konéste pe Raste-Devléste isyn nadiéia, priléna neví zor, ĥazdéna phaká (kryly), syr kidy (orly), našéna i na javéna khine, prastána i na khinjona.