Read Biblija - Pe Baltitko Romani čib (Romanes) 2019 Baltic Romani Bible Isajos 41 Bible Online

Isajos 41 - Biblija - Pe Baltitko Romani čib (Romanes) 2019 Baltic Romani Bible bible

Isajos 41

¹“Javén štyl angíl Mánde, ostrovy, i mek manušýtka nácyi te keden nevéstyr péskiro zoralypén! Mek jone te javén pašýl, i mek jone te phenén: ‘Terdjovasa khetané pašyledýr pe séndo.’

²Kon ĥazdyjá čačipnaskire manušés vastokóstyr? Kon khardiá les te džal pal péste? Kon dyjá léske tel vast manušéngire nácyi i kerdiá les, jekhés te xulainél pe kral'jénde? Kon otdyjá len sýrby práho vaš léskiri kurtála, sýrby phus, so vurniala, vaš léskiro lúko?

³Jov tradéla len, i džála bidaripnaskire dromésa, pir savó Jov na psirdiá nijékhvar péskire ĥerénca.

⁴Kon sozdyjá i kerdiá saró davá? Kon kharelas ke Pe manušýtka ródy anglypnástyr! Me som Raj Devél, Pérvo, i dre palatuné (posliednia) Me adiáke-pac' Som.”

⁵Ostrovy dykhné davá i trašandyne, jagóry (kraí) phuvjákire strahádyne, jone podtyrdenape pašyledýr i javné.

⁶Kažno délas vast péskire pašatuné manušéske, i rakirélas péskire pšaléske: “Rikirpe murškanés.”

⁷O petalengiro (kovaljo) poddela dúho (fáno) suvnakuné spiecoske, i jov, kon, roŭninela baré mlotkosa listy ĥazdéla dúho (fáno) kodoléske, kon marela pe kavadlo (amoni), savó rakiréla pal spajka: “Isyn mištó,” tén'či jov zoraliakirela gvozdenca (karfinenca), sob (kaj) te javél saró zoraló pe štéto.’

⁸Ne tu, Izrailjo, san Miro pishári, Jakovo, konés Me vykedyjom, Avramos, Miré males (drugos).

⁹Tu, konés Me vykedyjom phuvjákire jagorendyr, i konés khardjom Me ke pe samone duratuné šteténdyr, i konéske Me phendjom: ‘Tu san Miro pishári,’ Me vykedyjom tut i na durjakirdjom tut krig.”

¹⁰Na dar, pal-dová so Me som túsa: na našadjov dro dúho (fáno), pal-dová so Me som Devél tyró. Me javáva te zorjakirav tut, i, Me podava vast túke, Me podrikirava tut Miré čačipnaskire čačé vastésa.”

¹¹Ake, saré, kon gijá xoliása pe túte, javéna ladžakirdé i peréna patyvatyr, javéna syr nisó, i odolé, kon čingardyjape túsa, odolé xasjona.

¹²Tu javésa te rodes len, i tu na lathesa len, kodolé, savé kamlé te marénpe túsa, savé giné maribnása pe túte — jone javéna syr nisó, syr dová, so butýr na dživéla.

¹³Pal-dová so Me, Raj Devél, Devél tyró, javáva te rikirav tut pal čačó vast, i phenáva túke: “Na dar, Me dáva vast (pomoginava) túke.”

¹⁴“Na dar, tu san kirmo Jakovóskiro, tumé, nábut, manušále Izrailjoskire! Me podava vast túke”, — rakiréla Raj Devél, i Me som tyró Vykinybnaskiro (Vyrakhibnaskiro), Svénto Izrailjoskiro.

¹⁵Ake, Me keráva tútyr neví obmaribnaskiri (molotilka) vostrone dandenca, tu javésa te obmares bérgi i tu rozmaresa len pe koterá, i tu pirikeresa bérgicy dre šprija (miakina).

¹⁶Tu javésa te pirikedes (te vieines) len pe balvál, i balvál lydžála krig len, i riskiribnaskiri balvál syr vihro rosphurdela len, tu javésa drieván te radynespe pal Raste-Devléste, i tu javésa barikano (te šarespe) Sventonesa Izrailjosa.

¹⁷Kiéli čororé i bógi (manušá dre trébima) javéna te rodén paní, i nane paní, i léngire čibá (čibjá) javéna te šutjon trušatyr (smegatyr), to Me, Raj Devél, javáva te šunav len; Me Devél Izrailjoskiro, na mekava len.

¹⁸Me otkerava réki (leniá) pe čhučé bergicakire vučipená i ĥanyngorja maškír doloskire féldy Me keráva čhučé phuvjátyr ziero (oziero), Me keráva šuké phuvjátyr ĥanyngorja paniésa.

¹⁹Me čhuváva te barjol kiedro, akacyja, mirta i olivítko kašt dre čhučí phuv, i Me čhuváva te barjol dre prahitko phuv kipariso, sosna i buko khetané,

²⁰sob (kaj) jone te dykhén i te dodžinenpe (te ĥaljon), te riskirén péskiro iló i te ĥaljon, so vast Ráskire-Devléskiro sozdyjá davá, i so Svénto Izrailjoskiro sozdyjá davá.

²¹“Sykavén (phenén) pal péskiro réndo (diélo)”, — rakiréla Raj Devél. “Poden (janén) tumaré dophenybena”, — rakiréla Králi Jakovóskiro.

²²“Mek jone te phenén i te sykavén aménge, so javéla mek jone te sykavén anglatuné (pérva) pričyny, savé isyn, sob (kaj) ame te rozlas (te roz ĥaljovas) len, i sob (kaj) ame te džinas, sósa končynelape kadavá réndo, ci so te phenén angíl sarénde, so javéla angíl.

²³Phenén aménge dová, so javéla angíl, sob (kaj) ame te džinas, so tumé san develá, ci kerén lačhipén ci fuipén, sob (kaj) ame te kerás baré jakhá (te divinasape) i te dykhas davá khetané tuménca.

²⁴Čačes, nane nisavó lačhipén tuméndyr, i tumarí butý ničý na mol; džungaló (brydko) isyn kodová, kon vykedéla tumen.

²⁵Me ĥazdyjom les paš-ratitkoné (sieviernone) rigátyr, i jov javéla, jov javéla te kharel Miro lav pe ránko (pe zlóko), kiéli kham ĥazdélape, i jov javéla te tasavel thagar'jen sýrby bláta (rastvoro), sýrby piritkonengiro tasavela ĥleja (glina).

²⁶Kon phendiá angíl sarénde samone anglypnástyr, sob (kaj) te džinas aménge, i ĥará angíl davá, sob (kaj) aménge saštý te phenas: “Davá isyn čačipén.” Ne nane nikonés, kon te phenél angíl sarénde, ci vari-kon te šunél tumaré lavá.

²⁷Me pérvo phendjom Sionoske: “Dykhén, kaj jov isyn!” I Me dyjom Jerusalimoske jekhés, kon janéla bahtalý zan (zvies').

²⁸Pal-dová so Me dykhcjom, i na sys nijékh manúš, i Me lyjom te dykháv maškír lénde, ne na sys junkaro (sovietniko), savó, kiéli Me phučavas léndyr, to te del ráda te otphenel pe lav.

²⁹Čačes, jone saré ničý na mol; léngire butiá nisó, a léngire vybilade muiá (istukany), isyn balvál i čhučipen.