Read Biblija - Pe Baltitko Romani čib (Romanes) 2019 Baltic Romani Bible Isajos 42 Bible Online

Isajos 42 - Biblija - Pe Baltitko Romani čib (Romanes) 2019 Baltic Romani Bible bible

Isajos 42

¹“Ake isyn Miro pishári, Konés Me rikirava pal vast, Konés Me vykedyjom, ke Kon pasjola Miro iló, Me čhuváva pe Léste Miro dúho (fáno), i Jov phenéla pal séndo ke narody.

²Jov na zagodlela, na ĥazdéla Péskiri zan, i Jov na déla te šunén la pe vulícy (gásy).

³Sphagirdo destó Jov na phagiréla, jag saví, syg murdjola, Jov na murdiakirela, Jov javéla te kerél séndo čačipnása.

⁴Na peréla Jov bizorjakoro, na khinjola ke dová časo, syr Jov keréla séndo phuvjake; i pe Zakóno Léskiro užakiréna lačhipnása ostrovy.”

⁵Adiáke rakiréla Raj Devél, Savó sozdyjá bolybén i štéty léngire, Savó sozdyjá phuv lákire džiibnasa, Savó déla, sob (kaj) te dživél lákiro narodo, Savó déla dúho (fáno) odolénge, kon pir phuv psiréla.

⁶Me, Raj Devél, prikhardjom Tut pir čačipén, Me láva te rikirav Tut pal vast, Me láva te rakhav Tut, i Me čhuváva Tut syr zavieto vaš manušénge, sob (kaj) te dykhén dud (svéto) Najudýtka manušá (jazyčniki),

⁷sob (kaj) te otkeres jakhá kororenge, sob (kaj) te vylydžas pe vólia odolén, kon dre navolia isyn beštó, a odolén, kon isyn beštó dro kalypén, Me vylydžava léngire bešybnastyr.

⁸Me som Raj Devél, davá isyn Miro lav, i Me na davá patýv Miré javire manušénge, i baripén Miro Me na davá idolénge.

⁹Ake, kerdiápe dro džiibén, so phendlé angledýr, i nevó lav Me phenáva; angíl dová, syr jov kerélape čačipnása, Me otkerava tuménge.”

¹⁰Bagán Devléske neví gilý, šarén Les saré phuvjákire jagorendyr; tumé, kon tradéla pir mórjo (derjáv), saré, kon dživéla odój, ostrovy i odolé, kon pe lénde dživéla!

¹¹Mek te ĥazdel péskiri zan čhučí phuv lákire for'jenca, kaj Kidaro dživéla; mek te radynénpe odolé, kon dživéla pe bérgi, mek te šarén bergakire upralypnastyr!

¹²Mek te den patýv Ráske-Devléske, mek te šarén Les pe ostrovy.

¹³Raj Devél vydžála syr drieván zoraló murš, syr murš maribnýtko, Jov ĥazdéla zevlynypén, Jov kharéla ke Pe i déla gódla maribnytkes, Jov sykavéla Léskire vergénge, so Jov isyn zoraló.

¹⁴Dlúges (ĥará) Me ničí na rakiravas, Me vyrikiravas saró, akaná Me láva te godlav, syr džuvlý (manušny), kóli joj bijanéla, lavá te rozmarav, Me láva te phagirav saró.

¹⁵Šut'kirava Me bérgi i bérgicy, vyšut'kirava sarí čar, so barjola pe lénde; vyšut'kirava réki (leniá) i ĥanyngá.

¹⁶I lydžáva Me kororen dolé dromésa, savó jone na džinéna; Me lydžáva len dolé dromorenca, kaj na psirenas. Me pirikerava kalypén dro dud (svéto) i bangé dromá Me keráva čačé droménca; ake, so Me keráva vaš lénge i Me na jačavava len.

¹⁷Tén'ci risjona pale i drieván ladžana odolé, konéskiri nadiéia sys pe ídoly, kon rakiréla ke kerdé devloré: “Tumé — amaré develá.”

¹⁸Šunén, kašuke, dykhén, kororé, sob (kaj) te dykhén.

¹⁹Kon isyn iščo (inké) adasavó kororó, syr Miro pishári, isyn adasavó isyn kašuko, syr odová, konés Me bičhadjom? Kon isyn adasavó kororó, syr odová, kon jaciá pir iló Mánge, syr pishári Ráskire-Devléskiro?

²⁰Tu but dykhesas, ne na dykhcián, so trej; kaná sys otkerde, ne tu na šundián.

²¹Ráske-Devléske sys pir iló vaš Péskiro čačipén te ĥazdel Zakóno i te del léske patýv.

²²Ne kadalé manušá isyn občorde i oblyne ke xasibén, saré jone isyn sphandle i garadé dro bešyben; len oblyne i nikón len na zrakhéla; občorde, i nikón na rakírla: “Otdé pale!”

²³Kon tuméndyr šundiá mištés pal davá péskire kanenca, ĥalyjá i vyšundia vaš anglypén?

²⁴Kon otdyjá Jakovós čorenge te xasiakirén, Izrailjo, sob (kaj) te rosčoren? Ci na kerdiá Raj Devél, pal-dová so ame kerdiám gréhi angíl Léste? Jone na kamenas te psirén Léskire droménca i jone na šunenas Léskiro Zakóno.

²⁵I Jov vyčhudiá pe lénde Péskiri xolý i maribnýtko xoliamipen; joj xačola jagása saré rigéndyr, ne jone na dykhné; xačolas lénde, ne jone na ĥalyné davá ilésa.