Read Biblija - Pe Baltitko Romani čib (Romanes) 2019 Baltic Romani Bible Isajos 43 Bible Online

Isajos 43 - Biblija - Pe Baltitko Romani čib (Romanes) 2019 Baltic Romani Bible bible

Isajos 43

¹Akaná adiáke rakiréla Raj Devél, Savó sozdyjá tut, Jakovo, i Savó dyjá džiibén túke, Izrailjo: “Na dar, pal-dová so Me vykindjom tut, khardjom tut tyré lavésa, tu san Miro.

²Kóli tu javésa te piridžas pir paní, Me som túsa; ci pir réki (leniá) — jone tut na tasadiakirena; poddžasa ke jag — joj tut na shačkirla.

³Pal-dová so Me som Raj Devél, tyró Devél, Svénto Izrailjoskiro, Zrakhibnari tyró; Me Jegípto, Jefiopija, Saveja (Šeba) otdyjom pal túte, sob (kaj) te vykinav tut.

⁴Pal-dová so tu san drógo dre Miré jakhá, i jacián drieván kuč i Mánge tu jacián pir iló, to Me otdáva javire manušén pal túte i narody pal tyró di.

⁵Na dar, dykh, Me som túsa; vastokóstyr Me janáva tyró kherítko ródo, zapadostyr skedáva tut.

⁶Ke paš-rat (sieviero) phenáva: “Otdé!” — i ke paš-dyvés (jugo): “Na rikir, lýdža duralypnastyr Miré čhavorén i Miré čhajén phuvjákire jagorendyr (krajendyr);

⁷kažnones, kon kharélape Miré lavésa, konés Me sozdyjom vaš Miro baripén, konéske Me dyjom džiibén.”

⁸Vylydža narodo, konéste isyn jakhá, ne jov kororó, isyn kaná, ne jov isyn kašuko.

⁹Mek saré narody te skedénpe khetané, i saré kherítka ródy te javén khetané. Kon maškír lénde davá angíl phendiá? Mek te phenén, so sys angledýr saréstyr, mek te den kherítka péskire manušén te dosykaven (te dophenen) pal davá, mek te phenén pal péste čačipén, sob (kaj) te šunés i te phenés: “Čačó!”

¹⁰A Miré manušá, savé dophenena, pal čačipén, — phenéla Raj Devél, — tumé i Miro pishári, konés Me vykedyjom, sob (kaj) tumé te džinén i te patián Mánge, so davá Me som; angledýr na sys nikoli javire Devlés i na javéla.

¹¹Me, Me som Raj Devél i nane javirés Zrakhibnaris apríč Mánde.

¹²Me angilphendjom, i zrakhcjom i phendjom pal davá, a javirés nane ke tumé, i tumé — Miré manušá, savé dophenena, so Me — Devél, — rakirél Raj Devél.

¹³Angledýr saréstyr Me sómas adasavó, nikón na zrakhéla Miré vastéstyr; Me keráva, i kon davá otparuvela?

¹⁴Adiáke rakiréla Raj Devél, Savó vykindia (vyrakhcia) tumen, Svénto Izrailjoskiro: “Vaš tuménge Me bičhadjom ke Vavilóno, rosphagirdjom saró, so sys zakerdo i Xaldiejen, savé sys phut'kirdé péskire parmenca (korablienca).

¹⁵Me som Raj Devél, tumaró Svénto, Kodová, Kon sozdyjá Izrailjo, tumaró Králi.

¹⁶Adiáke rakiréla Raj Devél, Savó otkerdia drom pe mórjo (derjáv), Savó otkerdia drom pir zoralé paniá.

¹⁷Savó vylydžijá gren i maribnýtka vurdená, xaladén i zor; saré pasine khetané, na uštyné, murdine, syr momolytka (svietil'niki), xasiné.

¹⁸Ne tumé na priripirena pal proginé dyvesá, na duminéna pal dová, so sys ĥará.

¹⁹Ake, Me keráva neví butý, akaná joj sykadjola, ci tumé na kaména te džinén pal davá? Me keráva drom pe félda, réki (leniá) pe čhučí phuv.

²⁰Feldytka murdalá (zvieri) pe félda Man vyšarena, šarena šakaly i čirikliá (strausy), pal-dová so Me pe čhučí phuv davá paní, Me keráva réki (leniá) pe šukí mal (stiep), sob (kaj) te p'jel Miro narodo, savó Me vykedyjom.

²¹Davá narodo Me sozdyjom vaš Péske; jov déla patýv Mánge.

²²A tu, Jakovo, na khardian Man, tu, Izrailjo, na kerdián ničý vaš Mánge.

²³Tu na jandian mánge bakrorén vaš célo shačkiribén, na vyšardian Man tyré sventoné dyibnasa. Me na začhuvavas tut, sob (kaj) te dynarines (služynes) Mánge mareskire janybnasa, na priphendjom, sob (kaj) te janes fimiámo.

²⁴Tu na kindian Mánge destó lačhé sungasa pal rup, Tu na čaliakirdian Man thulypnasa tyré sventoné dyibnástyr, ne tyré grehénca kerdián Mánge pharipén; Mánge isyn pharó tyré nalačhé rendostyr.

²⁵Me, Me Kokoró, otmekáva tyré gréhi vaš Péske Kokoreske, Me na priripirava gréhi tyré butýr.

²⁶De Mánge te priripirav; ame javása te kerás séndo (te sendiakiraspe); rákir tu, sob (kaj) te dophenes tyró čačipén.

²⁷Tyré-dadéskiro dad kerdiá grého i odolé, kon mangdiápe pal túte, otginé Mándyr.

²⁸Paldová Me rašángire barydyrendyr pe svénto štéto zalyjom léngiri butý, i otdyjom pe xasibén Jakovós, i otdyjom Izrailjo, sob (kaj) les te magirén.