Read Biblija - Pe Baltitko Romani čib (Romanes) 2019 Baltic Romani Bible Isajos 44 Bible Online

Isajos 44 - Biblija - Pe Baltitko Romani čib (Romanes) 2019 Baltic Romani Bible bible

Isajos 44

¹“Akaná šun, Jakovo, Miro pishári, šun, Izrailjo, savó Me vykedyjom.

²Adiáke rakiréla Raj Devél, Savó sozdyjá tut, Savó podrikirelas tut dákire ločoviátyr: ‘Na dar, Miro pishári, Jakovo, na dar, drógo Izrailjo, savó Me vykedyjom.

³Me vyčhuvava paní pe odoléste, kon drieván kaméla paní, i baré paningá pe dová, so vyšutija; Me vyčhuvava Miro dúho (fáno) pe tyró kherítko ródo i bahtiakiribén Miro pe tyré čhavorende, savé iščo (inké) javéna angíl.

⁴I javéna jone te barjon maškír čar, syr vierby (ivy) pašýl paní.

⁵Jekh manúš phenéla: ‘Me som Ráskire-Devléskiro’, javír kharéla pes Jakovóskire lavésa, tríto čhinela péskire vastésa ‘Me som Ráskire-Devléskiro,’ i les kharéna Izrailjoskire lavésa.”

⁶Adiáke rakiréla Raj Devél, Králi Izrailjoskiro, Savó vykindia les. Raj Devél, bolybnáskire-jangoléngiro: “Me som pérvo i Me som palatunó (posliednjo), nane javire Devlés, apríč (kromie) Mánde.

⁷Kon isyn iščo (inké) adasavó, syr Me som? Mek jov te phenél, mek te rosphenel Mánge jekh pal jekh saró dolé časostyr, syr Me sozdyjom ĥaratuno narodo, ci mek jone te angilphenen pal dová, so javéla.

⁸Na darén, i na trašan: ci na phendjom Me túke ĥará, ci na angilphendjom? I tumé dosykavena (dophenena) pal Mánde. Ci isyn javír Devél apríč Mánde? Nane ni saví javír skála [nane javír Devél-ju.o.], ni so butýr Me na džináv.

⁹Odolé, kon keréla ídoly, odolé keréna dylnypén, i dolé ídoly, savé isyn dróga vaš lénge, ke savé jone tyrdenape, na janéna lénge nisavó lačhipén; adalé manušá ĥaljona davá dre péste. Jone na dykhéna, na ĥaljona, paldavá javéna ladžakirdé.

¹⁰Kon kerdiá javire devlores, kon vyčhudiá idolo, savéstyr nane ni savó lačhipén?

¹¹Saré, kon keréla davá, javéna ladžakirdé, pal-dová so spiecy te vyčhinen pe kašt, savé keréna ídoly, isyn kokoré féni manušá. Mek saré jone te skedénape, mek te javén terdé: jone piridarena (strahadjona) i javéna ladžakirdé.

¹²Faurnari (kovaljo) keréla sastyrestyr tover, i jov obkerela pe vangara les; vykerela les baré mlotenca i obkerela les péskire zoralé vastésa; adiáke keréla butý, so jov jačéla bokhalo i bizorjákiro, jov na p'jela paní, i jov khinjola.

¹³Kherá-keribnaskiro (plotniko), syr vykedyjá kašt, i protyrdela pir léste mamuitko (linija) i otčertinela les jarjasa, občhinela vostrone strumientosa, obkrengliakirela les i keréla léstyr gožone manušores, sob (kaj) te čhuvél les dro kher.

¹⁴Adavá manúš phagiréla péske kiedry, vykedéla maškír kaštá dro veš egli i dembo; čhuvéla jasienjo, dre phuv, a bryšýnd davá kašt barjakiréla.

¹⁵Dalé kaštéstyr manúš tatjola, xačkiréla les dre jag i pekela maró. I dalé kaštéstyr keréla devlores i mangelape léske; keréla idolo i peréla angíl léste pe čangá.

¹⁶Jov xačkiréla pašýl kašt dre jag, pe javír paš jov keravela mas, čaljola i tatjola, i rakiréla: “Kuč tatijom, lačhí jag.”

¹⁷A doléstyr, so kaštéstyr jaciápe, keréla devlores, keréla péskire idolo, mangelape léske, peréla angíl léste pe čangá i rakiréla léske: “Zrákh man, tu san miro devla!”

¹⁸Jone ničí na džinéna i na ĥaljona: Raj Devél zakerdia léngire jakhá, sob (kaj) te na dykhén i léngire ile, te na ĥaljon.

¹⁹I na priléla manúš ke iló, i nane léste godý, sob (kaj) te phenél: “Me shačkirdjom kašt pe jag i pe vangara pekcjom maró, keradjom mas ci trej mánge te keráv nalačhipen kaštéstyr, so jaciápe? Ci trej te mangavpe kašteske?”

²⁰Jov xála, xohavelape, xohado iló lydžála javire dromésa les; i nisyr jov na vyriskirela péskiro iló, na phenéla: “Ci nane xohaibén dro Miro čačó vast?”

²¹Ripiren davá, i Izrailjo, tumé san Miré pishárja. Me sozdyjom tut, Izrailjo, tu san Miro pishári, na bistyr pal Mánde.

²²Me skhosava (zlava) tyró čoripén syr migla (tumano), tyré gréhi syr óbloko, obrisjov ke Me, pal-dová so Me vykindjom tut.

²³Mek te radynélpe ke bagaipen bolybén, pal-dová so Raj Devél kerdiá davá! Mek te godlel phuvitko xoripén, mek te šuminen bahtiatyr bérgi, veš, saré kaštá dro veš, pal-dová so Raj Devél vykindia Jakovós, Jov ĥazdéla Péskiri patýv dro Izrailjo.

²⁴Adiáke rakiréla Raj Devél, Savó vykindia tut, i Savó sozdyjá tut dre dakiri ločoví: “Me som Raj Devél, Savó sozdyjá saró, Me jekhdžinó protyrdyjom bolybén i Péskire zorjása rosčhudjom phuv.

²⁵Me, Devél, Savó keréla adiáke, so giertyka (znamiénii), savé déna xohané angilphenybnarja, ne saró ivjá (naprásnes), Savó sykavéla, syr zdžana godiatyr čovahane manušá, savé keréna čorahano phenybén, Savó vytradela god'varen manušén (magen) i léngiro džinybén keréla dylnypnasa.

²⁶Me, Devél, Savó déla zor lavéske, so phendiá Miro pishári, Savó keréla pir lavá, so phenéna bičhadé manušá Léske, Savó rakiréla ke Jerusalimo: “Javéna te dživén dre túte”, — i ke fórja Judáskire: “Tumé na javéna butýr rosphagirdé, Tumé javéna nevéstyr čhudé, i Me neviakirava tumaré ruíny.”

²⁷Me, Devél, Savó rakiréla ke panieskiro xoripén (biezdna): “Vyšutjov, i tyré réki (leniá) Me vyšut'kirava.”

²⁸Savó rakiréla pal Kiraste: “Miro čhupnári; jov keréla saró pir Mirí vólia, jov phenéla ke Jerusalimo. “Tu na javésa butýr rosphagirdo, phenéla ke Khangirí: “Tu javésa čhudý pe štéto!”