Read Biblija - Pe Baltitko Romani čib (Romanes) 2019 Baltic Romani Bible Isajos 45 Bible Online

Isajos 45 - Biblija - Pe Baltitko Romani čib (Romanes) 2019 Baltic Romani Bible bible

Isajos 45

¹Adiáke rakiréla Raj Devél ke Kira, savés Jov pomakhcia: Me rikirava tut pal čačó vast, sob (kaj) te otdav túke narody, Me zlava kustyka, so sys pe trušula kral'jénde, sob (kaj) te otkeren túke vudará, i sob (kaj) pórta te na zaphandelpe.

²‘Me džáva angíl túte, bérgi rosphagirava, xarkuné (miedítka) vudará rozmarava, i štaby (zapory) sastruné piriphagirava.

³I Me otdáva túke garadé dro kalypén (cjomnyma) kučipena (sokroviščy) i prirakhne barvalypena, sob (kaj) tu te ĥaljos, so Me som Raj Devél, Savó kharéla tut pir lav, Savó isyn Devél Izrailjoskiro.

⁴Vaš Jakovóske, Miré pisharíske, vaš Izrailjo, Konés Me vykedyjom, Me khardjom tut pir lav, dyjom túke patýv, mek (xot') tu na džindian Man.

⁵Me som Raj Devél i javirés nane; nane Devlés apríč Mánde, Jekh Me som. Me vykedyjom tut, kóli tu na džindian Man,

⁶sob (kaj) te džinén vastokóstyr, kaj kham ĥazdélape i ke zapado (pal-panitko rig), kaj kham bešéla, so nane javire Devlés: Me som Raj Devél i javirés nane.

⁷Me keráva dud (svéto) i keráva kalypén (cjomnyma), Me dáva ramánjo (miro) i keráva bari bída (bibáht); Me, Raj Devél, keráva davá.

⁸Mek bolybén te del bryšýnd, mek te čhuvelpe čačipén bolybnástyr, mek te otkerelpe phuv, sob (kaj) te del zrakhibén, mek khetané te barjol čačipén. Me, Raj Devél, keráva saró davá.

⁹Bida kodoléske, kon čingardelape Devlésa: Savó sozdyjá les, kon isyn čeriepko čerepkendyr pe phuv. Ci phenéla ĥleja (glina) péskire mastieroske: “So tu kerésa?”, ci phenéla tyrí butý pal túte: “Léste nane vastá?”

¹⁰Bida odoléske, kon phenéla péskire dadéske: “Sóske tu dyján mánge džiibén?”, a dáke ci phenéla jov: “Sóske tu bijandian man?”

¹¹Adiáke rakiréla Raj Devél, Svénto Izrailjoskiro, Savó sozdyjá les: “Tumé phučena Mándyr, so javéla Miré čhavénca? I tumé kaména te podphenen, so trej Mánge te keráv?”

¹²Me sozdyjom phuv i manušés pe láte; Me — Miré vastá protyrdyne bolybén i Me dyjom priphenybén ke saré bolybnýtka čergeniá (bolybnytko xaladybén).

¹³Me čhudjom les dro čačipén, Me keráva saré léskire dromá mamúj (Me mamuiakirava). Jov keréla Miro fóro, otmekéla pe vólia Miré manušén plienóstyr, na léla léndyr nisavó vykinybén, ni dáry”, — rakiréla Raj Devél, bolybnáskire-jangoléngiro.”

¹⁴Adiáke rakiréla Raj Devél: “Jegiptiáni, savé keréna butý, i Jefiopliani, savé biknena, i Savieicy, vučé manušá, javéna tyré manušénca; jone pal túte javéna te džán phandle zandir'jenca (cepenca), javéna, peréna pe čangá, léna te mangén tut, rakirí: “Jekh (féni) túte isyn Jekh Devél, i javire nane Devlés.”

¹⁵Čačó, Tu san, Devél garadó? Devél Izrailjoskiro, Zrakhibnari.

¹⁶Saré jone javéna ladžakirdé; khetané lénca džána ladžasa i odolé, kon keréla ídoly.

¹⁷A Izrailjo javéla zrakhno pir viéčno zrakhibén dro Raste-Devléste; tumé na javéna ladžakirdé nikieli.

¹⁸Adiáke rakiréla Raj Devél, Savó sozdyjá bolybén; Jov — Devél, Savó sčhudia phuv i dyjá zor láke; na ivjá (naprásnes) sčhudia la, a sob (kaj) te dživén pe láte; Me som Raj Devél i javirés nane.

¹⁹Na čorahanés Me rakiravas, Me na rakirdjom pe kaló (tjomno) phuvjákiro štéto; Me na rakirdjom ke kherítko ródo Jakovóskiro: “Ivjá (naprásnes) tumé Man rodéna.” Me som Raj Devél, Savó rakiréla čačipén i sykavéla čačipén.

²⁰Skedénpe, javén, poddžan saré, kon zrakhciape narodóstyr. Mek te javén odolé dylyné i bura, kon lydžála kaštuno idolo, kon mangelape devloreske, savó na zrakhéla.

²¹Den te džinén manušénge i phenén: “Kon phendiá davá dro ĥaratuno časo, kon angilphendia davá? Ci na Me, Raj Devél, i nane javire Devlés apríč Mánde, a isyn jekh Devél — Me som Devél čačunó, Savó zrakhéla i nane nikonés javirés apríč Mánde.

²²Ke Me obrisjon i tumé zrakhenape, saré jagóry (kraí) pe phuv, pal-dová so Me som Devél i nane javirés.

²³Me Kokoró Pésa sovlahava: Miré uštendyr vydžála čačipén, lav, savó na parudjola, so angíl Mánde peréla pe čangá kažno ródyco, pe Mánde sovlahala kažno jekhe-čibakiri iri (čib).

²⁴I javéna te rakirén pal Mánde adiáke: “Féni (tóka) Jekhe Raste-Devléste isyn zor i čačipén; ke Jov javéna i javéna te ladžan saré Léskire vérgi.

²⁵Raj Devél zrakhéla i pir Léste javéla te slavinelpe kherítko ródo Izrailjoskiro.