Read Biblija - Pe Baltitko Romani čib (Romanes) 2019 Baltic Romani Bible Isajos 46 Bible Online

Isajos 46 - Biblija - Pe Baltitko Romani čib (Romanes) 2019 Baltic Romani Bible bible

Isajos 46

¹Pyjá Vilo [Bel-ju.o.][6], pyjá Nievo; léngire ídoly pasjona pe grénde i guruvende, pharó lénge davá te lydžán khine murdalénge!

²Pyné, pyné khetané, na zrakhné odolén, kon len lydžalas, i kokoré giné dro pliéno.

³Šunén man, kher Jakovóskiro, saré, kon jaciápe Izrailjoskire kheréstyr, konés Me prilyjom bijanypnastyr i Me lydžavas dákire ločoviátyr.

⁴Tumé phurjona, a Me adasavó javáva; parnjona tumaré balá, a Me javáva te lydžav tumen. Me sozdyjom tumen i lavá te lydžav, Me láva te podrikirav, Me javáva te rakhav tumen.

⁵Pe konéste Me zdžava (podžava), syr tumé duminéna, kon isyn Adasavó, syr Me som?

⁶Manušá doreséna suvnakáj kisykatyr, ublavena rup i kharéna manušés, sob (kaj) jov te kerél léstyr devles; mangénpe devleske i perén pe čangá angíl léste.

⁷Jone léna les pe psiké, lydžána les, čhuvéna pe léskiro štéto, jov isyn terdó, jov na zdžála štetóstyr; manušá godlena, ne jov ničí na phenéla, na rakhéla bidatyr.

⁸Priripiren davá i sykavén pes muršenca; prilén davá ke iló, manušále, savé otginé čačuné Devléstyr.

⁹Priripiren dová, so sys angledýr saréstyr, pal-dová so Me som Devél i nane javire Devlés, nane nikonés, kon zdžála (podžala) pe Mánde.

¹⁰Me phenáva angledýr saréstyr, so tén'či dro kónco (dro jagóro) javéla, ĥaratuné časostyr Me rakiráva pal dová, so iščo (inké) na kerdiápe: Javéla pir Miro godypén (sovieto); Me keráva saró, so Mánge isyn pir iló.

¹¹Me khardjom orlós (kidós) vastokóstyr; duratuné rigátyr Me khardjom odolés, kon keréla pir Miro priphenybén. Me phendjom i keráva ke kónco (jagóro); angilphendjom i javéla adiáke.

¹²Pošunen Man, manušá xoliamé ilésa, savé otginé čačipnastyr.

¹³Podgíia Miro čačipén, jov isyn nádur, sýges javéla Miro zrakhibén; Me dáva zrakhibén Sionoske, a Izrailjoske — Mirí patýv.