Read Biblija - Pe Baltitko Romani čib (Romanes) 2019 Baltic Romani Bible Isajos 47 Bible Online

Isajos 47 - Biblija - Pe Baltitko Romani čib (Romanes) 2019 Baltic Romani Bible bible

Isajos 47

¹“Džá, beš pe práho, patyvalý terný džuvlý, čhaj Vavilonoskiri, beš pe phuv. Nane trono (kralítko štéto), čhaj Xaldiejengiri, na phenéna pal túte butýr, so tu san šukár i barvaly.

²Le žorny (veledin) i mielin jaržó, zle tyró dykhlo, ĥázde tyrí podia (truiuny), sykáv tyré ĥerá, džá pir réki (leniá).

³Odkerlape tyró nangipén, javéla bicialy tyrí ladž. Keráva Me séndo, Me na potanginava nikonés.”

⁴Amaró Zrakhibnari isyn Svénto Izrailjoskiro, Léskiro lav — Raj Devél, bolybnáskire-jangoléngiro.

⁵Beš, na rákir ničí, džá dre kalypén (cjomnyma), čhaj Xaldiejengiri, butýr na javéna te kharén tut raniasa dro kralipén.

⁶Xoliasyjom Me pe Miro narodo, xasiakirdjom Miré čhavén, otdyjom len dre tyré vastá, Vavilóno, a tu na potangindian len; phuró manúš lydžijá tyró pharipén.

⁷Tu rakiresas: ‘Saró džiibén me javáva raniasa,’ — a tu na prilyjan tyré godiása, na dumindian, so duredýr javéla.

⁸Akaná vyšún davá, rospiestindly, birakhibnaskiri, saví rakiréla dro péskiro iló: ‘Me som jekh adasavi, javirja nane; me na jačavape biromeskiri (pivliasa), me na xasiakiráva čhavorén.’

⁹Ne kóli tu na užakiresa, to saró ke tu javéla: i romes xasiakiresa i čhavorén dro jekh dyvés; javéla ke tu bibáht pherdés, na zrakhéla tut čorahano džinybén i bari zor čorahany.

¹⁰Túte sys nadiéia pe tyré nalačhé réndy, tu phendián: ‘Nikón man na dykhéla.’ Tyrí godý i tyró džinybén zmarde tut droméstyr; tu rakiresas dro tyró iló: ‘Me som, i butýr nane nikonés apríč Mánde.’

¹¹Javéla ke tu čoripén (bibáht); tu na ĥaljosa, savé rigátyr joj ĥazdélape; javéla ke tu bída, i tu látyr na našesa; javéla xasibén, pal savó tu na duminesa.

¹²Jačpe tyré čorahane džinybnasa, savó tu lyjan te kerés iščo (inké) dro ternypen, zrakhpe lésa bidatyr.

¹³Tu khinyjan, pal-dová so prilyjan but godypén (soviety); mek te javén odolé, kon angilphenela pir bolybén, pir nevó čhon i čergeniá, mek te zrakhen jone tut doléstyr, so javéla.

¹⁴Ake, jone isyn syr phus, jag shačkirdiá len, na zrakhné jone péskiro džiibén jagatyr; ničí na jaciápe — ni vangar, sob (kaj) te tatjos, ni jag, sob (kaj) te bešes nábut paš láte.

¹⁵Ake, savé jačné odolé, konesa tu keresas butý, konesa tu timisiakiresas (targinesas) iščo (inké) dro tyré terné beršá. Kažno gijá pe péskiri rig; nikón na zrakhéla tut.