Read Biblija - Pe Baltitko Romani čib (Romanes) 2019 Baltic Romani Bible Isajos 49 Bible Online

Isajos 49 - Biblija - Pe Baltitko Romani čib (Romanes) 2019 Baltic Romani Bible bible

Isajos 49

¹Šunén Man, ostrovy (phuvjá pe mórjo (derjáv)). Šunén, duratuné narody: Raj Devél prikhardia man, (Izrailjo), dákire ločoviátyr; Me iščo (inké) na bijandyjom, a Jov kharelas Man pir lav.

²I sozdyjá Jov Miré uštá syr vostro kurtála; Léskire vastésa Jov učhakirelas Man; Jov kerdiá Mándyr vostro maribnýtko bust (striela), Jov rakhelas Man dro Péskiro kolčano.

³I phendiá Mánge: “Tu san pishári Miro, Izrailjo, Tu désa Mánge patýv i baripén:

⁴A Me phendjom: “Ivjá (naprásnes) Me keravas butý, Me našadjom (xasiakirdjom) péskiri zor. Ne miro čačipén ke Raj Devél; Devél miro otparikirela Mánge.”

⁵Akaná rakiréla Raj Devél, Savó khardiá Man iščo (inké) dre dakiri ločoví, sob (kaj) te javav Me Léskire dynarisa, sob (kaj) Me te prikharav ke Jov Jakovós, i, sob (kaj) Izrailjo ke Jov te skedelpe. Me prilyjom patýv dre jakhá Ráskire-Devléskire; Devél Miro isyn Mirí zor.

⁶I Jov phendiá: “Davá isyn nabaró réndo vaš Túke, so tu javésa Miro pishári, sob (kaj) te dživél ródyco Jakovóskiro, sob (kaj) te risjol jačaibén Izrailjoskiro; ne davá iščo (inké) nane saró. Ne keráva Me Tut dudesa (svetosa) vaš manušénge, sob (kaj) te džinén Miro zrakhibén saré jagóry (koncy) pe phuv.”

⁷Adiáke rakiréla Raj Devél, Izrailjoskiro Svénto, Savó vykindia Izrailjo, adiáke rakiréla ke narodo, savés saré košena i tradéna, savó isyn pishári baré rande: “Králja dykhéna i uštena; thagárja (kniázi) pe čangá perna vaš Ráske-Devléske, Savó isyn čačunó, vaš Svénto Izrailjoskiro, Savó Tut vykedyjá.”

⁸Adiáke rakiréla Raj Devél: “Dre lačhé dyvesá Me tut šundjom; dro dyvés, kóli isyn zrakhibén, Me podrikirdjom Tut. Me javáva te rakhav Tut, keráva Tútyr zavieto vaš manušénge, sob (kaj) phuv te otdžidiakires; sob (kaj) te otles pale rosčordo meknó mištypén, te riskires la (phuv) prilyibnaskirenge (nasliednikenge);

⁹sob (kaj) te phenés manušénge dre bešyben: ‘Vydžán!’ — manušénge, savé isyn dro kalypén (ciamlypén): ‘Sykavén pes!’ Jone pašýl drom javéna te čaraven, pir saré bérgicy javéna léngire čaritka féldy.

¹⁰Na javéna jone te bokhaljon, na javéna jone bi panieskiro (trušale), kham len na pekela; Kodová, Kon tanginela (žalinela) len, lydžála len i janéla ke paní.

¹¹I saré Miré bergendyr Me keráva dromoro; i dromá Miré ĥazdénape (javéna ĥazdyné).

¹²Ake, javéna manušá duripnastyr, javéna paš-ratiatyr (sievierostyr) i morjostyr (derjavestyr), a javír javéna Sinimoskiro phuvjátyr.”

¹³Rádynpe, bolybén, jav lošaljov (viesielinpe), phuv; bérgi, godlen bahtiatyr: podrikirdia Raj Devél Péskiro narodo, potangindia Péskire manušén, savé stradynenas.

¹⁴A Sióno rakiréla: “Jačkirdiá man Raj Devél; bistyrdia man Devél miro!”

¹⁵Ci zabistrela džuvlý (manušny) péskire bijatós, ci na potanginela péskire čhavés? Ne kóli joj bistrela, Me tut na bistrava.

¹⁶Ake, Me čhindjom tut pe Miré vastá; vánty tyré saró časo isyn angíl Mánde.

¹⁷Tyré čhavé javéna te prastan ke tu, džána tútyr odolé, kon phagirelas i občorelas tut.

¹⁸Ĥazde tyré jakhá, podykh pir rigá, — saré jone skedénape, džána ke tu. Te dživáv Me, — rakiréla Raj Devél: — lénca sarénca tu ukedesape, syr gožone uribnasa; ukedesape lénca, syr terný.

¹⁹Dre tyré rosphagirdé kherá, pe tyré čhučé phuvjá i pe tyrí občordy phuv na javéla štéto, sob (kaj) te dživén odolé, kon xalas tut, džána krig tútyr.

²⁰Bijaty, savé vybarjona túte, kóli javire čhavorén tu xasiakiresa, phenéna túke: ‘Nane mánge štéto, de mánge les, sob (kaj) me te dživáv.’

²¹I phenésa tu dro péskiro iló: “Kon bijandiá len vaš mánge? Mánde na sys čhavoré, me na bijanavas, zalyne man dro pliéno dur adathýr, a kon len barjakirdia? Ake, me sómas jekhdžiny kokori, a kaj jone sys?”

²²Adiáke rakiréla Raj Devél: “Ake, Me ĥazdáva Miro vast ke narody, Me sykaváva Miro stiago (flago) rodycenge i janéna pe vastá tyré čhavén, a čhajén tyrén — pe psiké.

²³I javéna králja te čaliakiren tut; kralicy léngire tut čaliakirena. I javéna te perén angíl túte pe čangá i te xan práho tyré ĥerendyr. Tén'ci udžinesa tu, so Me som Raj Devél; so na ladžana manušá, konéste isyn pe Mánde nadiéia.”

²⁴Ci otlena zoralestyr dová, so jov dorestia? Ci zalena zoralé manušéstyr odolén, konés jov zalyja dro pliéno?

²⁵Adiáke rakiréla Raj-Devél: “I otlena pliennone manušén, konés lyjá dro pliéno zoraló xalado; otlena doresybén tiranostyr (zobarostyr) i zrakhena len, pal-dová so Me láva te maravpe, tyré vergenca, i Me zrakháva tyré čhavén.

²⁶I odolé, kon pe túte ĥazdyjápe, javéna te xan péskiri loč (plot'); i javéna te p'jen péskiro rat, syr terný mol (vino), i kažno loč (plot') ĥaljola, so Me som Raj Devél, Zrakhibnari tyró, Savó Tut vykindia, Zoraló Jakovóskiro.”