Read Biblija - Pe Baltitko Romani čib (Romanes) 2019 Baltic Romani Bible Isajos 5 Bible Online

Isajos 5 - Biblija - Pe Baltitko Romani čib (Romanes) 2019 Baltic Romani Bible bible

Isajos 5

¹Bagava Me Miré-Drogoneske gilý Mirí, saví isyn drogonoskiri pal Léskiro vinagrádniko. Sys vinagrádniko Miré-Drogoneskiro pe bergitko vučipén.

²Jov obkerdia (oblydžija) les tynosa, žužakirdia les barendyr, čhudiá dre léste lačhé vinagradoskire kaštá, kerdiá kher dre léste, vyĥanadia odój štéto, sob (kaj) te tasaven vinagrado, i užakirelas, so janéla jov lačhó barjakirdó (plódo), a jov jandiá barjakirdó nálačho.

³“Kakaná, rossendiakiren Man, manušále, savé dživéna ke Jerusalimo, muršá Judejákire Miré vinagradnikosa.

⁴So iščo (inké) treindiá te keráv vaš léske, so Me léske na kerdjom? Sóske jov jandiá nalačhé múri, kóli užakiravas léstyr lačhó barjakirdó?

⁵Paldavá phenáva tuménge, so keráva Me Miré vinagradnikosa: Me lav Péske léstyr tyno, i javéla jov čhučó, Me rosphagirava léskire vánty, i javéna te phagiren les.

⁶Dasavesa Me les jačkirava: na javéna te občhinen les, na javéna te obĥanaven les, zabarjola jov nalačhé čarjasa, Me priphenava bolybnaske, sob (kaj) jov te na del bryšýnd léske.”

⁷Ráskire-Devléskiro, bolybnáskiro-jangoléngiro vinagrádniko isyn kher Izrailjoskiro, a muršá Judejátyr — drógo Léskiro barjakirdó, savó Jov barjakirdia. Užakirelas Jov, so javéla čačunó séndo, ne ake — rat čhuvélape, užakirelas čačipén, ne ake — godlena.

⁸Bida tuménge, kon kinela jekh kher pal javír, jekh félda pal javír félda, adiáke, so nane štéto vaš javire manušénge, adiáke, so, sýrby tumé san jekhdžine pe phuv.

⁹Raj Devél, bolybnáskiro-jangoléngiro, phendiá dre miré kaná: “Dalé kherá javéna čhučé (pusta), baré i goža javéna, ne nikón na javéla te dživél odój.

¹⁰Deš dielianki dro vinagrádniko janéna jekh bato ziárki, ne jekh xomiero, ziárki, so čhuvenape dre phuv nábut so (liedz') janéla jekh efa.”

¹¹Bida odolénge, kon tasiarlatyr pe zlóko (pe ránko) rodéla bravinta i ke rat xačkiréla pes moliasa (vinosa).

¹²Isyn bašaiben i mol pe léngire svénki, a pe Ráskire-Devléskire réndy jone na dykhéna, na duminéna pal dová, so keréna Léskire vastá.

¹³Pal saró davá džála miro narodo dro pliéno, kóli nikón léstyr davá na užakirelas; léskire rajo javéna bokhalé, léskire barvalé zakamena te p'jen (javéna trušale).

¹⁴Pal saró davá buĥlyja liúno (ado), i otkerdia péskiro muj; zdžála odorík léngiro phut'kiribén, léngiro barvalypén, léngiro šumo i saró, so radynela len.

¹⁵Peréla manúš pe čangá, poddelape murš, phut'kirdengire jakhá zmekenape telé začhakirenape.

¹⁶A Raj Devél, bolybnáskire-jangoléngiro, ĥazdélape pe séndo, Svénto Devél sykavéla dro čačipén, so Jov isyn svénto.

¹⁷Bakriá javéna te čaravenpe kokoré pir péste, čúža manušá javéna te xan barvalengire feldatyr.

¹⁸Bida odolénge, savé tyrdena ke pe grého bi rakhibnaskire šelenca, tyrdena ke pe grého sýrby simirienca pe rota.

¹⁹Save rakiréna: “Mek Jov te džal sygedýr, mek te kerél Péskiri butý, sob (kaj) ame te dykhas. Mek te javél, mek te sykavél, so davá isyn — Sventoné-Izrailjoskiro godypén, sob (kaj) ame te ĥaljovas!”

²⁰Bida odolénge, savé nalačhipen kharén lačhipnása, a lačhipén — nalačhipnasa; i phenéna pe kalypén, so davá isyn dud, a pe svéto — so davá isyn kalypén; phenéna pe kirko, so davá isyn gudló, a pe gudló phenéna — kirkipen!

²¹Bida odolénge, savé isyn god'varé dre péskire jakhá, god'varé kokoré angíl péste.

²²Bida odolénge, savé na daréna te p'jen mol (vino), i savé isyn zoralé te kerén la.

²³Save pal lové otmekena odolés, kon isyn bangó, a manušés, savó isyn čačunó, občorena.

²⁴Pal-dová, so syr jag xála phus i syr xála jag khas, adiáke kirnjola léngiro kašt, luludí (cveto) léngiro rosphurdelape syr práho, pal-dová, so jone začhurdyne Ráskire-Devléskiro, bolybnáskire-jangoléngiro Zakóno, i na šundlé jone lav Sventoné Izrailjoskiro.

²⁵Pal dová zahačola Ráskire-Devléskiri xolý pe Léskiro narodo, protyrdela Jov Péskiro vast pe lénde, i Jov čilavéla len adiáke, so bérgi izdrana, a léngire trúpy javéna vyčhurdyne pe vulícy (gásy) syr gnejo. I na pirijačéla Léskiri xolý, i vast Léskiro javéla protyrdyno.

²⁶I Jov ĥazdéla sciago (déla priphenybén) ke narody, savé dur dživéna, vykharela odolés, savó dživéla pe phuvjákiro jagóro (krajo), i, ake — jov lokhes i sýges javéla.

²⁷Na javéla léste odolés, kon khinyja, kon isyn bizorjákiro, ni jekh na zasovela, na zakerela péskire jakhá; na zlelape léstyr kustýk, na riskirnape léskire triviki.

²⁸Kurtála léskiri kerdy vaš maribén, petaly léskire grénde isyn syr bar, róty léskire — syr balvál.

²⁹Godlela jov, syr ščerica (lievica), godlela syr ščer (liévo); zagodlela, uhtyléla doresybén, i nikón na otlela.

³⁰Zagodlela pe léste dro dová dyvés sýrby mórjo (derjáv), savó xoliásyja; podykhela jov pe phuv, ake: — kalypén, bída, murdija dud (svéto) pe bolybén.