Read Biblija - Pe Baltitko Romani čib (Romanes) 2019 Baltic Romani Bible Isajos 50 Bible Online

Isajos 50 - Biblija - Pe Baltitko Romani čib (Romanes) 2019 Baltic Romani Bible bible

Isajos 50

¹Adiáke rakiréla Raj Devél: “Kaj isyn lyl pal dová, so tumarí daj rozgijápe romesa, kaj isyn davá lyl, savésa Me otmekcjom la? I konéske Me bikindjom tumen? Ake, bikindle tumen pal tumaré gréhi, pal čoripén tumaró sys otmekny tumarí daj.

²Sóske na sys nikonés, kóli Me javavas, i nikón na otphendiá, kiéli Me khardjom? Ci Miro vast butýr na zrakhéla, ci nane Mánde zor, sob (kaj) te zrakhav? Ake, Miré strahasa Me šut'kirava mórjo (derjáv), keráva čhučí phuv rekendyr (lenor'jendyr); mačhé dre lénde kirnjona i meréna, pal-dová so nane paní.

³Me učhakirava bolybén kalypnasa i syr žalobnone gonestyr praskasa Me keráva učhakiriben vaš bolybén.”

⁴Raj Devél dyjá mánge čib god'varé manušéndyr, sob (kaj) Me lavésa te podrikirav kodolés, kon butýr na vyrikiréla; tasiárles (ránes) Jov džingavela Man, džingavela kan Miro, sob (kaj) Me te šunav, syr sykliaibnýtko.

⁵Raj Devél otkerdia Mánge kan, i Me na sómas proti, Me na gijom pale.

⁶Me otdyjom Miro dumo, sob (kaj) te marén Man; Miré čama (ščoki), sob (kaj) te pekaven; muj Miro Me na zakerdjom košybnastyr i čungardypnastyr.

⁷I Raj Devél déla vast (pomoginela) Mánge, paldavá Me na ladžava, paldavá Me rikirava Miro muj syr bar, i Me džinóm (džináv), so Me na jačavape ladžakirdó.

⁸Pašyledýr isyn odová, kon phenéla čačipén pal Mánde: kon kaméla te marélpe Mánca? Terdjovasa khetané! Kon kaméla te sendiakirelpe Mánca? Mek jov te poddžál ke Me.

⁹Ake, Raj Devél déla vast (pomoginela) Mánge: kon sendiakiréla Man? Ake, saré jone isyn, syr ídia: phurjona, xasjona.

¹⁰Kon tumender daréla Rástyr-Devléstyr, kandéla Léskire-Pishariskiri (Raboskiri) zan? Kon psiréla dro kalypén (mrako) bi dudeskiro (bi svetoskiro), mek jov te rikirelpe Ráskire-Devléskire lavésa, mek jov te čhuvél péskiro iló dre péskire Devléste.

¹¹Ake, saré tumé, kon xačkiréla jag, konéstyr džána xačkirdé iskry syr maribnýtka bustiá (striély)! Džán dre jag i iskry tumaré strielendyr! Davá priléna tumé Miré vastéstyr, dre mén'ki (bibáht) tumé xasjona (meréna).