Read Biblija - Pe Baltitko Romani čib (Romanes) 2019 Baltic Romani Bible Isajos 51 Bible Online

Isajos 51 - Biblija - Pe Baltitko Romani čib (Romanes) 2019 Baltic Romani Bible bible

Isajos 51

¹““Šunén Man odolé, kon rodéla čačipén, rodéla Ras-Devlés! Dykhén akaná pe bérga, savjátyr tumen vyčingirde, pe xoripén dro rovo (xohói), katýr tumen doresné.

²Podykhen pe Avraamoste, tumaré dadéste i pe Sarate, saví tumen bijandiá! Me khardjom les jekhés, dyjom léske bahtiakiribén, dyjom léske but čhavorén.

³Čačó, Raj Devél podrikirla Sióno, podrikirla léskire rosphagirdé kherá; a čhučí phuv léskiri Jov keréla syr rajo, i mal (stiep) léskiri pirikerela syr únta (sado) Raskiri-Devléskiri; rádyma i viesjolyma (loš) odój javéna, parikiriben i bagaiben.

⁴Pošunen Man, Miro narodo i kherítko ródo Miro! Pošunen Man tumaré kanenca! Mándyr vydžála Zakóno, i séndo Miro čhuváva syr dud (svéto) vaš narody.

⁵Pašyledýr isyn Miro čačipén; i džála upré Miro zrakhibén i vast Miro sendiakiréla narody. Ostrovy javéna te rikirén nadiéia pe Mánde, i javéla nadiéia pe Miro vast.

⁶Ĥazden tumaré jakhá ke bolybén i podykhen telé pe phuv: bolybén xasjola syr thuv, a phuv kerlape syr phurany ídia, manušá pe láte vymerena, a Miro zrakhibén isyn viéčno; čačipén Miro na xasjola.

⁷Pošunen Man, kon džinéla čačipén, narodo, savéste dro iló isyn Miro Zakóno! Na darén, kóli tradéna tumen manušá, na darén léngire nalačhé lavéndyr!

⁸Pal-dová so jone xasjona; kirmo shala len, syr výlna (šers'), a čačipén Miro javéla viéčno, zrakhibén Miro nikoli na pirijačéla.”

⁹Ĥazdepe, ĥazdepe, jav zoraló, vast Ráskire-Devléskiro! Ĥazdepe syr dre phurané beršá, kóli ĥaratuno ródo dživelas! Ci na tu xasiakirdian Raavos, xasiakirdian krokodilos?

¹⁰Ci na tu vyšut'kirdian mórjo (derjáv); šut'kirdian paní, savó isyn dro liúno (ado) xor telál; kerdián mórjo (derjáv) dromésa, sob (kaj) te džán manušá, savén vykindia Raj Devél?

¹¹I risjona odolé, savén zrakhciá Raj Devél, i javéna pe Sióno bagaibnasa, rádyma léngiri nikoli na pirijačéla; jone javéna bahtalé i viesiéla (lošalé); jasva i bibahtalé ĥondiá (ŭzdohi) otdžana.

¹²“Me, Me Kokoró podrikirava tumen. Kon tu san, kóli daresa manušéstyr, savó meréla, daresa manušéskire čhavestyr, savó isyn adasavó, syr čar?

¹³Kon tu san, kóli bistresa Ras-Devlés, Savó tut sozdyjá, Savó protyrdyjá bolybén i dyjá džiibén phuvjake? Kažno dyvés tu daresa tyré-vergoskire xoliátyr, adiáke, sýrby vérgo isyn pašýl túte, savó kaméla te xasiakirél tut. Ne kaj isyn léskiri xolý?

¹⁴Sýges vydžála zaphandlo manúš (dro pliéno) pe vólia, i jov na meréla dre ĥanbín (jama), i javéla léste maró.

¹⁵Me som Raj Devél, Devél tyró, Savó ĥazdéla mórjo (derjáv) adiáke, so jov godlela (rievinela); Raj Devél, bolybnáskire-jangoléngiro isyn Léskiro lav.

¹⁶Me čhuváva andré Miré lavá dre tyré uštá, zerjasa (tienjosa) Péskire vastéstyr Me učhakirava tut, sob (kaj) te keráv bolybén, i te dav zor phuvjake, i te phenáv ke Sióno: ‘Tu san Miro narodo.’”

¹⁷Uštý, uštý, ĥazdepe, Jerusalimo, tu, savó vypijan Ráskire-Devléskire vastéstyr tahtáj (čaša) xoliása, tu vypijan tahtáj pibnasa, savó matiakirela, vypijan les sarésa.

¹⁸Na sys konéske te lydžál les, saré čhavéndyr, savé bijándyne léstyr, na sys konéske te podrikirél pal vast, saré čhavéndyr, savén jov barjakirdia.

¹⁹Javné ke tu duj bidy, kon tut potanginela (požalinela): čhučipen (pustota) i xasiakiriben, bokh i kurtála; konesa Me tut te podrikirav?

²⁰Tyré čhavé jačné bizorjákire, jone isyn pašté pe saré vulícy (gásy), phandle syr mirga (sierna) dre felý (pietlia); pe lénde pherdija Tyré Ráskire-Devléskiri xolý; Tyré-Devléskiro godlypen.

²¹Paldavá, vyšún davá, bibahtaló, i mato na moliátyr (vinostyr)!

²²Adiáke rakiréla tyró Raj Devél, i Devél tyró, Savó othala (otdéla pale) pal Péskiro narodo: “Ake, Me láva tyré vastéstyr tahtáj (čaša) pibnasa, savó mat'kirela; roščyna (droždžy) Miré tahtastyr xoliása; Tu butýr odothýr na p'jesa.

²³I Me dáva les (tahtái) tyré vergénge, savé tut menčynenas; Me dáva tahtáj dre léngire vastá. Me dáva les odolénge, savé rakirnas: ‘Per tyré mósa, sob (kaj) te džas pir túte”, — i dumo tyró javélas sýrby phuv i gása, sob (kaj) te džán.’”