Read Biblija - Pe Baltitko Romani čib (Romanes) 2019 Baltic Romani Bible Isajos 52 Bible Online

Isajos 52 - Biblija - Pe Baltitko Romani čib (Romanes) 2019 Baltic Romani Bible bible

Isajos 52

¹Uštý, uštý, prilé tyrí zor, Sióno! Uri tyré ídi, Jerusalimo, ídi, savé déna túke patýv, svénto fóro! Butýr na zadžála ke tu naobčhindlo i magirdó manúš.

²Trinskir péstyr práho, uštý, Jerusalimo, savó sys dre navolia, zle zandir (lanco) tyré meniatyr, čhaj Sionóskiri dro pliéno!

³Adiáke rakiréla Raj Devél: “Bilovengiro tumen bikindle, birupeskiro tumen vykinena.”

⁴Adiáke rakiréla Raj Devél: “Miro narodo psirelas angledýr dro Jegípto, sob (kaj) te dživél odój; Asuro (Asiriicy) ni palsó pritasavelas len.

⁵Kakaná, so isyn Mánde adái?” — rakiréla Raj Devél: “Dová, so ivjá (naprásnes) zalyne Miro narodo; léngire baré raja xoliasona,” — rakiréla Raj Devél, — “i kažno mólo, kažno dyvés jone na déna patýv Miré lavéske.

⁶Paldavá udžinela Miro narodo Miro lav, paldavá udžinela dro dová dyvés, so Me som Odová, Kon phendiá: Ake, Me som!”

⁷Save lačhé, savé goža isyn pe bérgi odolé-manušéskire ĥerá, savó phenéla lačhí zan (zvies'), savó phenéla pal rádyma, rosphenéla pal zrakhibén, savó rakiréla Sionoske: “Prilyjá kralipén tyró Devél!”

⁸Ake, ĥazdyné zan tyré rakhibnárja, ĥazdyné zan, jone radynénpe khetané, pal-dová, so dykhéna péskire jakhénca, syr Raj Devél risjola dro Sióno.

⁹Radynénpe, bagán khetané, štéty Jerusalimóskire: podrikirdia Raj Devél Péskiro narodo, vykindia Jerusalimo.

¹⁰Sykadiá sarénge Raj Devél Péskiro svénto vast, sob (kaj) te dykhén saré narody; saré phuvjákire jagóry (koncy) dykhéna amaré Devléskiro zrakhibén.

¹¹Džán, džán, vydžán odothýr, na lenpe pal magirdó, udžan léstyr, žužakiren pes odolé, kon lydžála khoré (sasúdy) Ráskire-Devléskire.

¹²Tuménge na javéla trej sýges te džán, tumé na poprastana; pal-dová so Raj Devél angíl tuménde javéla, Devél Izrailjoskiro javéla tumaré rakhibnarisa palál pal tuménde.

¹³Ake, pishári Miro bahtiakirdó javéla, ĥazdélape dre patýv, javéla šardo, i priléla baripén.

¹⁴Kicý manušá divinenaspe, kiéli dykhné pe Túte! Jov adiáke parudiape maribnastyr, so na sys Léste manušýtko muj, adiáke Jov vydykhelas, so i na sys Léste manušýtko patrín (óbrazo)?

¹⁵Adiáke but narody divinenaspe Léstyr; králja zakerna (phandena) péskire uštá angíl Léste, pal-dová so jone dykhéna i džinéna dová, so jone na šundlé, so nikoli lénge na rakirdé.