Read Biblija - Pe Baltitko Romani čib (Romanes) 2019 Baltic Romani Bible Isajos 53 Bible Online

Isajos 53 - Biblija - Pe Baltitko Romani čib (Romanes) 2019 Baltic Romani Bible bible

Isajos 53

¹Kon patiandyja lavéske, savó šundlé améndyr, konéske otkerdiape Ráskire-Devléskiro vast?

²Jov vybarija angíl Léste syr čarori, syr otbaripen šuké phuvjátyr; Jov na vydykhelas, syr manúš patyvalé minasa, na sys dre Léste baripén; ame Les dykhciam, i Léste na sys dasavo, so b prityrdyja amen ke Jov.

³Jov sys, syr nisó angíl manušénde, Léske na dyné patýv manušá; Murš, Savó prilyjá dukhá amaré i nasvalypen; ame otrisijam Léstyr péskire mósa; ame na kamdiam te dykhas pe Léste, ame na prilasas Les.

⁴Ne Jov lyjá pe Péste amaró bizorjakiriben, Jov lydžijá amaró nasvalypen, a ame dumindiam, so davá Devél dukhadia Les, čhudiá kára pe Léste i čhudiá pharipén pe Léste.

⁵Ne Jov stradynelas pal amaré gréhi, pal amaró čoripén Les menčinenas; kára, saví jandiá svéto pe aménde, sys pe Léste, Léskire fransostyr (dukhatyr) ame jaciám saste.

⁶Saré ame, syr bakriá psirasas, gijam kažno péskire dromésa, i Raj Devél čhudiá pe Léste gréhi, savé saré ame kerdiám.

⁷Les marenas, i pritasavenas, ne Jov vykedyjá te stradynel, Jov na otkerelas Péskire uštá; syr bakri Jov gijá pe meribén; syr bakroró ničí na phenéla, kóli zlenas léskiri výlna, adiáke Jov Péskire uštá na otkerelas.

⁸Les lyné sendostyr i bešybnastyr, ne pal ródo Léskiro, kon phenéla? Jov sys otčurdyno džidé manušéngire phuvjátyr; myjá pal grého, savó kerdiá Miro narodo.

⁹Les kamlé te garaven khetané prahar'jenca, ne Jov sys garadó ke barvaló manúš, pal-dová so Jov na kerdiá grého, i na sys xohaibén dre Léskire uštá.

¹⁰Ne sys Ráskire-Devléskiri vólia, sob (kaj) Les te marén ke kalé masá; Jov otdyjá Les pe mén'ki; kóli ž Léskiro di janéla svénto dyibén, sob (kaj) te otmekenpe gréhi, to Jov udykhéla Péskiro ródo angíl, i Ráskire-Devléskiri vólia javéla te kerélpe Léskire vastésa.

¹¹Bahtaló javéla Jov odoléstyr te dykhél, so kerdiá Léskiro di; Péskire ĥalyibnastyr Jov, čačipnáskiro, pishári Miro, zrakhéla but manušén i gréhi léngire lydžála pe Péste.

¹²Paldavá Me dáva Léske kotér (paš) maškír barende, i zoralenca Jov doresybén roskerela (rozdielinela), pal-dová so Jov otdyjá Pes pe meribén. Les gindlé pal prahariste, ne Jov lydžijá pe Péste buté-manušéngiro grého i pal prahar'jende adiáke mangelas.