Read Biblija - Pe Baltitko Romani čib (Romanes) 2019 Baltic Romani Bible Isajos 55 Bible Online

Isajos 55 - Biblija - Pe Baltitko Romani čib (Romanes) 2019 Baltic Romani Bible bible

Isajos 55

¹“Kon drieván kaméla te p'jel (isyn trušalo), mek te džal ke paní! Kóli nane tuménde lové, usajékh džán, kinen i xan! Kinen bilovengiro mol (vino) i thud!

²Sóske tuménge otdén lové pal dová, so nane maró; sóske te otdén lové pal dová, so na čaliakerela? Šunén akaná Man i xan lačhipén; mek tumaró di te javél čalo thulypnasa.

³Otkeren tumaré kaná, javén ke Me; pošunen i javéla te dživél tumaró iló; i Me dáva tuménge viéčno zavieto, Me dáva lačhipén, pal savó dyjom lav Davidóske.

⁴Ake, Me čhudjom les, sob (kaj) jov te dosykavel (te dophenel) čačipén narodenge, sob (kaj) te sykliakirél len.

⁵Ake, tu kharesa narodo, savés Tu na džindian; narody, i savé tut na džinéna, savé džána ke tu vaš Tyré Ráske-Devléske, vaš Svénto Izrailjo, pal-dová so Jov dyjá túke bari patýv.

⁶Rodén Ras-Devlés, kóli saštý te lathén Les; kharén Les, kóli Jov isyn pašýl.

⁷Mek grehítko manúš te mekel péskiro drom i péskire nalačhé dúmy, mek te javél jov ke Raj Devél, i Devél otmekéla léskiro grého; mek jov te javél ke Devél amaró, Savéske saré isyn dróga.

⁸Miré dúmy — nane tumaré dúmy; Miré dromá — nane tumaré dromá, — rakiréla Raj Devél.

⁹Ne syr bolybén isyn vučedýr phuvjátyr, adiáke-pac' i Miré dromá: jone isyn vučedýr tumaré dromendyr, i dúmy Miré isyn vučedýr tumarendyr.

¹⁰Syr iv i bryšýnd peréna bolybnástyr, ne pale na risjona, a peréna pe phuv, sob (kaj) joj te bijanél i te barjakirel; sob (kaj) te del giv (ziárka) odoléske, kon čhuvéla dre phuv, i maró odoléske, kon xála:

¹¹adiáke i lav Miro, savó vydžála Miré uštendyr, — jov na risjola ke Me pale nisosa, ne keréla dová, so Mánge trej pir Mirí vólia, i keréla dová, vaš so Me bičhadjom les.

¹²A tumé vydžána radymása, i lačhipnása tumen prolydžana; bérgi i bérgicy javéna te bagán gilý angíl tuménde, i saré kaštá pe félda javéna sýrby radymása manušá, savé marena dre vastá.

¹³Vybarjola kipariso pe štéto, kaj xrústo suv'jenca, pe štéto cuknudiakiro vybarjola mirto; saró davá javéla vaš baripén Devléskiro, davá isyn dosykaiben viéčno.”