Read Biblija - Pe Baltitko Romani čib (Romanes) 2019 Baltic Romani Bible Isajos 56 Bible Online

Isajos 56 - Biblija - Pe Baltitko Romani čib (Romanes) 2019 Baltic Romani Bible bible

Isajos 56

¹Adiáke rakiréla Raj Devél: “Rakhén séndo i kerén čačipén, pal-dová so podgíia Miro zrakhibén i Miro čačipén sykadjola (otkerlape).

²Bahtaló isyn murš, savó keréla davá, i manušéskiro čhavó, savó davá rikiréla, savó rakhéla sávato (subóta), sob (kaj) te na javél magirdó, rakhéla péskiro vast, sob (kaj) te na kerél nisavó čoripén.

³Te na phenél čhavó javire narodóstyr, savó lyjá te patial Ráske-Devléske: “Raj Devél na prilyjá Man dro Péskiro narodo, i te na rakirél manúš jevnuho: “Ake, me som šuko kašt.”

⁴Pal-dová so Raj Devél adiáke rakiréla pal adasavé manušénde (jevnuhende): “Kóli jone rakhena Miré sávaty (suboty), vykedena dová, so isyn lačhó Mánge, rikiréna Miro zavieto.

⁵Odolénge Me dáva štéto dro Miro kher i dre Miré vánty; Me dáva lav fedýr lénge, syr čhavénge, i syr čhajenge; Me dáva viéčno lav, savó na xasjola.

⁶I čhavén javire narodóstyr, savé javné ke Raj Devél, sob (kaj) te kerén léske butý i te rikirén dro iló Ráskire-Devléskiro lav, i te javén Léskire pishar'jénca, sarén, kon rakhéla sávato (subóta) te na javél magirdó i zoralés te rikirelpe ke Miro zavieto.

⁷Me janáva len pe Mirí svénto bérga, Me obradynava (lošakirava) len dro Miro kher, kaj mangénape; léngire céla shačkiribena i svénta dyibená lačhé javéna pe Miro altárjo (žertvieniko), pal-dová so Miro kher kharélape kheresa, kaj mangénape saré narody.

⁸Raj Devél, Savó skedéla rostradynen manušén Izrailjostyr, rakiréla: “Ke vykedene léskire Me iščo (inké) lavá te skedav javirén.”

⁹Džán te xan, saré riskiribnáskire murdalá (zvieri) feldýtka, saré murdalá vešytka džán te xan!

¹⁰Léngire rakhibnárja saré riskiribnáskire isyn kororé i bura (nahrata) manušá nasykliakirde; saré jone sýrby džukela bičibakire, džukela, savé na bašena, džukela nasvale, len tyrdela te soven.

¹¹Kadalé isyn džukela zahale ilésa, jone nisyr na čaljona, kadalé isyn čhupnárja (pastyri) bigodiakire; saré dykhéna pe péskiro drom; kažno léndyr rodéla kófo péske, nane javire manušén.

¹²Jone rakiréna: “Javén, me doresava mol (vino); ame bravinta vypjasa ke kirlo, atasiá javéla dová, so i adadyvés; i iščo (inké) butýr javéla.”