Read Biblija - Pe Baltitko Romani čib (Romanes) 2019 Baltic Romani Bible Isajos 57 Bible Online

Isajos 57 - Biblija - Pe Baltitko Romani čib (Romanes) 2019 Baltic Romani Bible bible

Isajos 57

¹Meréla devlýtko manúš, i nikón na priléla davá ke iló; patiaibnytka muršá zalenape phuvjátyr, i nikón na duminéla, so devlýtko zalelape pe phuv nalačhipnastyr.

²Jov džála krig dro ramánjo (miro); kon psiréla čačé dromésa, odolé bahtalé javéna.

³Ne javén adarík, tumé, džuvliakire čhavé, saví čorahanypen keréla; o ródo odolengiro, kon isyn biladžakuno i nane patiaibnýtko semjake (irjake)!

⁴Konéstyr tumé sanape? Pe konéste otkerena muj, konéske sykavéna čib? Ci na tumé san čhavoré čoripnástyr, ródo xohaibnaskiro.

⁵Save xačkiribnasa, tyrdenape ke ídoly tel kažno kašt baré randienca; savé zamarena čhavorén pašýl sygna rekicy, maškír bérgi.

⁶Dre gladka barore sygnone rekicakire isyn tyrí dólia (bažyn); jone otkerena anglypén; lénge tu čhuvésa thaduno rozmekno janybén i te janes svénta dyibená; ci phenáva Me, so davá javélas kuč vaš Mánge?

⁷Pe bari, vučí bérga isyn tyró pasiben; odorík tu ĥazdesape, sob (kaj) te janes svénto dyibén.

⁸Paló vudará, paló stýlby progoskire tu čhuvésa ripiribnytka špery; kóli tu otdžasas Mándyr, tén'či tu zlesas tyré ídi i ĥazdesaspe; tu dorakiresaspe odolenca léndyr, savénca tu kamésa te pasjos; tu vydykhesa štéto.

⁹Tu psirdian ke králi kučoné-khandypnytkone makhibnasa; tu but kerdián dasavé makhibena; tu bičhavesas tyré manušén dur, sob (kaj) jone te lydžán lav; tu san drieván ladžakirdy.

¹⁰Tu khinyjan baré droméstyr, ne tu na phendián: “Hasiakirdjom nadiéia!” — tyró vast iščo (inké) sys džidó, i zor túte iščo (inké) sys.

¹¹Konéstyr tu darandyjan, kon tut darjakirdia (strahakirdia), so tu jacián xohany, pirijacian te ripires Man, tu na rakhesa Man dro iló? Na pal dová ci adiáke kerdián, so Me ĥará (dlúges) ničí na rakiravas, i tu pirijacian Mándyr te dares?

¹²Me sykaváva tyró čačipén i tyré réndy (diély); daléstyr na javéla túke mištó.

¹³Kóli tu zagodlesa, ci zrakhéla tut tyró skedyibén? Len sarén balvál lydžála krig, rosphurdela phurdypnasa, a konéste isyn nadiéia pe Mánde, odová priléla phuv dro meknó mištypén, priléla Mirí svénto bérga.”

¹⁴I phendiá: “Ĥazden, ĥazdén, kerén čačó drom; kerén mamúj (priámo) drom vaš Miro narodo.”

¹⁵Pal-dová so adiáke rakiréla Vučó, Vučés ĥazdynó, Savó dživéla viéčnes, Léskiro lav isyn “Svénto”: “Me dživáva pe vučó bolybén i pe svénto štéto i adiáke-pac' odolé manušénca, konéskiro dúho (fáno) isyn phagirdó, i kon isyn na phut'kirdo, sob (kaj) te otdžidiakirav dúho (fáno), kon na phut'kirdo, i te otdžidiakirav ile, konéste dúho (fáno) isyn phagirdó.

¹⁶Pal-dová so na saró časo Me javáva te sendiakirav i te xoliasovav, sob (kaj) te na xasjol angíl Mánde kažno dúho (fáno) i kažno phurdypen, savó Me sozdyjom.

¹⁷Paldová, so jov duminéla pal mištypén vaš péske kokoreske, Me xoliasovavas i dukhavavas les, garavavas muj i Me sómas xoliamó, ne jov otrisija i gijá pir drom, savésa lydžijá léskiro iló.

¹⁸Me dykhcjom léskire dromá; Me sastiakirava les, Me javáva te lydžav les, Me láva te podrikirav les i odolén, kon tuginela lésa.

¹⁹Me keráva saró pir Miro lav: “Ramánjo (miro), ramánjo pašatuné manušéske i duratuné manušéske,” — rakiréla Raj Devél, i Me sastiakirava les.

²⁰A grehítko manúš isyn syr mórjo (derjáv), savó ĥazdyjápe i nisyr na pirijačéla, i paní léskiro vyčhurdela iló i bláta.

²¹“Nane ramánjo (miro) grehitkoné manušénge,” — rakiréla Miro Devél.