Read Biblija - Pe Baltitko Romani čib (Romanes) 2019 Baltic Romani Bible Isajos 58 Bible Online

Isajos 58 - Biblija - Pe Baltitko Romani čib (Romanes) 2019 Baltic Romani Bible bible

Isajos 58

¹“Khar zoralé zaniása, na andyrša; ĥázde tyrí zan syr rógo (truba), sykáv Miré narodoske pe léskire nalačhé réndy, sykáv Jakovóskire kheréske pe léskire gréhi.

²Jone rodéna Man kažno dyvés, jone kaména te džinén Miré dromá sýrby narodo, savó keréla pir čačipén, savó na jačkiréla Péskire Devléskire uphenybená; jone phučena Mándyr pal čačuné sendy, jone kaména te javén pašyledýr ke Devél.

³“Sóske ame rikirasa posto, a Tu na dykhésa? Ame obrikirasa péskire ile [amaré ile na phutjona-ju.o.], a Tu na džinésa?” Ake, dro dová dyvés, kóli rikiréna posto, tumé keréna pir tumarí vólia, triebinena, sob (kaj) javír manušá te kerén pharí butý.

⁴Ake, tumé rikiréna posto, sob (kaj) te xanpe i te košenpe, i sob (kaj) te marén manušén; tumé na postinena adiáke, sob (kaj) šundly sys pe vučipén tumarí zan.

⁵Ci dasavo isyn posto, savó Me vykedyjom? Dyvés, kóli manúš te zrikirel pes? Manúš péskiro di, kóli bandiakirel pes, syr triščyna (trostniko), péskiro šeró; syr jov ur'jelape dre phurané ídi, bešéla dro práho. Ci kadavá kharesa tu postosa, phenésa, so davá dyvés javéla lačhó Ráske-Devléske?

⁶Ake, isyn posto, savó Me vykedyjom: rosphagir xohaibnaskire sastyrá, rosphandle šyle, otmek pe vólia phandle manušén, zle pharipén léndyr.

⁷De tyró maró bokhalé manušéske; mek čororé, savé psiréna pir svéto te zadžán dro tyró kher; kóli dykhésa, so džála nango — de léske ídia; i jekhe-rateskire tyrestyr na garadjov.

⁸Tén'ci otkerlape, syr tasiarluno zlóko (zoria), tyró dud, i javéla ke tu sastiakiriben; čačipén tyró angíl túte džála, i patýv Raskiri-Devléskiri javéla túsa.

⁹Tén'ci kharesa, i Raj Devél šunéla, zagodlesa, i Jov phenéla: “Ake, Me som!” Kóli zlesa pharipén péstyr, tu pirijačesa te ĥazdes angúšt i te rakirés zlydnitka lavá.

¹⁰Otdesa tu bokhaleske péskiro iló; tu čaliakiresa manušéskiro di, savó stradynela, tén'či dud (svéto) tyró xačola dre ciamlypén, kalypén tyró javéla syr paš-dyvés.

¹¹I Raj Devél javéla te lydžál tut saró časo (cýro), kóli na javéna bryšynda i phuv šutjola, Raj Devél čaliakirela tyró iló i masá, tu javésa syr šukár únta (sado), syr ĥanýng, kaj paní, savó nikoli na šutjola.

¹²Pe čhučé phuvjá javéna te kerén butý tyré čhavé, kon javéla angíl; tu désa zor ke baré ródy; pal túte phenéna, so tu ĥazdyjan rosphagirdo, te kerdián neve dromá vaš manušénge.

¹³Kóli tu vyrikires sávato (subóta), sob (kaj) te na kerés pir tyró iló dro Miro svénto dyvés; tu javésa te khares sávato radynypnasa, sventoné Ráskire-Devléskire dyvesesa, patyvalé dyvesesa; kóli tu désa patýv léske, na javésa te kerés tyré réndy i te kerés pir péskiri godý i te phenés čhučé (pusta) lavá.

¹⁴Tén'ci tu javésa radymakiro (te radynespe dre Raste-Devléste), Me ĥazdáva tut pe phuvjákiro vučipén, Me dáva túke dová, so prilyjá Jakovo, tyró dad! Uštá Ráskire-Devléskire phendlé davá.”