Read Biblija - Pe Baltitko Romani čib (Romanes) 2019 Baltic Romani Bible Isajos 59 Bible Online

Isajos 59 - Biblija - Pe Baltitko Romani čib (Romanes) 2019 Baltic Romani Bible bible

Isajos 59

¹Ake, vast Ráskire-Devléskiro na tyknyja, sob (kaj) te zrakhél i kan Léskiro nane kašuko, sob (kaj) te šunél.

²Ne tumaró čoripén (nalačhé réndy) isyn maškír tuménde i Devléste; tumaré gréhi isyn dro dová, so Léskiro muj otrisjola tuméndyr, i sob (kaj) Devél te na šunél.

³Pal-dová, so tumaré vastá magirdé ratésa, a tumaré angušta (pal'cy) — grehénca; tumaré uštá xohavena, tumarí čib na phenéla čačipén.

⁴Nikón na ĥazdéla péskiri zan pal čačipén, nikón pal čačipén na zadžála (na zaterdjola); léngiri nadiéia isyn xohany; jone xohavena; jone léna te kerén fuipén i nalačhé réndy janéna pale.

⁵Jone vybešena sapeskire parnore, khuvena pautina? Kon xála léngire parnore — meréla, a kóli rostasavela len — to odothýr sap vydžála.

⁶Léngiri pautina na ur'jesa, i kokoré jone na ur'jena len, so jone ssude; léngire réndy isyn načačune; léngire vastá isyn pherdé xoliása.

⁷Léngire ĥerá prastána ke nalačhé réndy, sob (kaj) te pročhuven rat manušéskiro, savó isyn nabango; léngire dúmy — dúmy zlydnitka; našaiben i xasibén isyn pe léngire dromá.

⁸Jone na džinéna drom ke ramánjo (miro), nane séndo pe léngire dromá; dalé dromá isyn bangé, i odová, kon džála lénca, odová na džinéla ramánjo.

⁹Paldavá séndo isyn dur améndyr, nane i aménde čačunó séndo; užakirasa dud (svéto), ne, ake — ciamlypén; jarkima, ne ame psirasa dro kalypén (mrako).

¹⁰Rodasa drom, syr kororé rodéna, vánta, psirasa, sýrby nane aménde jakhá; perasa dyvesé sýrby ratiákiro; maškír džidende ame sam syr mulé.

¹¹Saré ame brilinasa (rievinasa) syr riča, ĥazdasa pharó di, syr golumby; užakirasa séndo, ne les nane; užakirasa zrakhibén, ne jov isyn dur améndyr.

¹²Pal-dová so but čoripén ame kerdiám angíl Túte; amaré gréhi dophenena (dosykavena) pal aménde; amaré nalačhé réndy isyn aménca, amaró čoripén ame džinása.

¹³Ame parudiam Ráske-Devléske i xohadiam; otgijam amaré Devléstyr; ame rakirasas xohaibén i pal paruiben; amaré iléstyr vydžánas xohané lavá.

¹⁴I séndo gijá pale, čačipén dur terdijá, pal-dová, so čačipén pyjá pe gása [foruný/plóšča.-r.s.], i patýv nisyr na zadžála.

¹⁵Nane čačipén; odolés, kon rakhelape čoripnástyr, les jone košena. Dykhciá davá Raj Devél i namišto jaciá angíl Léskire jakhá, so nane séndo.

¹⁶I Jov dykhciá, so nane manušés, divno jaciá Léske, so nane odolés, kon by te zaterdjol, pomogindia by Léske Léskiro vast, i čačipén Léskiro Les podrikirdia.

¹⁷Jov čhudiá pe péste čačipén, syr bronia (maribnýtka ídi); zrakhibnaskiro šliemo pe Péskiro šeró; uridiape dre xolý, syr dre ídia, učhakirdiá pes zevlynypnasa syr uribnasa.

¹⁸Jov otdéla pale fuipnasa, kicý trej, kicý trej javéla dre xolý ke Péskire vérgi, Jov othala (otdéla) pale Péskire vergénge; ostrovenge Jov otdéla pale.

¹⁹I javéna te darén Ráskire-Devléskire lavéstyr pe zapado (pe pal-panitko rig), daréna Léskire baré patyvatyr pe doiá rig, kaj kham ĥazdélape. Kóli vérgo javéla, syr reka (len'), to phurdypen Ráskiro Devléskiro les vytradela.”

²⁰“I javéla Odová, Kon vykinela Sióno i Jakovóskire čhavén, savé otginé čoripnástyr”, — rakiréla Raj Devél.

²¹“Ake, isyn Miro Zavieto lénca, — rakiréla Raj Devél: Miro Dúho (Fáno), savó isyn pe túte i Miré lavá, savé čhudjom dre tyré uštá, na otdžana tyré uštendyr, na otdžana tyré čhavorendyr, i na otdžana léngire-čhavorengire uštendyr,” — rakiréla Raj Devél, nikoli na otdžana.